5. аббха̄на̄рахаваттам̣

95. тена кхо пана самайена аббха̄на̄раха̄ бхиккхӯ са̄дийанти пакататта̄нам̣ бхиккхӯнам̣ абхива̄данам̣ паччут̣т̣ха̄нам̣…пе… наха̄не пит̣т̣хипарикаммам̣. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма аббха̄на̄раха̄ бхиккхӯ са̄дийиссанти пакататта̄нам̣ бхиккхӯнам̣ абхива̄данам̣ паччут̣т̣ха̄нам̣…пе… наха̄не пит̣т̣хипарикамма’’нти! атха кхо те бхиккхӯ бхагавато етаматтхам̣ а̄рочесум̣.

атха кхо бхагава̄ етасмим̣ нида̄не етасмим̣ пакаран̣е бхиккхусан̇гхам̣ саннипа̄та̄петва̄ бхиккхӯ пат̣ипуччхи – ‘‘саччам̣ кира, бхиккхаве, аббха̄на̄раха̄ бхиккхӯ са̄дийанти пакататта̄нам̣ бхиккхӯнам̣ абхива̄данам̣ паччут̣т̣ха̄нам̣…пе… наха̄не пит̣т̣хипарикамманти? ‘‘саччам̣ бхагава̄’’ти. вигарахи буддхо бхагава̄ – ‘‘анануччхавикам̣…пе… катхан̃хи на̄ма, бхиккхаве, аббха̄на̄раха̄ бхиккхӯ са̄дийиссанти пакататта̄нам̣ бхиккхӯнам̣ абхива̄данам̣ паччут̣т̣ха̄нам̣…пе… наха̄не пит̣т̣хипарикаммам̣! нетам̣, бхиккхаве, аппасанна̄нам̣ ва̄ паса̄да̄йа…пе… вигарахитва̄…пе… дхаммим̣ катхам̣ катва̄ бхиккхӯ а̄мантеси – ‘‘на, бхиккхаве, аббха̄на̄рахена бхиккхуна̄ са̄дитаббам̣ пакататта̄нам̣ бхиккхӯнам̣ абхива̄данам̣ паччупат̣т̣ха̄нам̣…пе… наха̄не пит̣т̣хипарикаммам̣. йо са̄дийеййа, а̄патти дуккат̣асса. ануджа̄на̄ми, бхиккхаве, аббха̄на̄раха̄нам̣ бхиккхӯнам̣ митху йатха̄вуд̣д̣хам̣ абхива̄данам̣ паччут̣т̣ха̄нам̣…пе… наха̄не пит̣т̣хипарикаммам̣. ануджа̄на̄ми, бхиккхаве, аббха̄на̄раха̄нам̣ бхиккхӯнам̣ пан̃ча йатха̄вуд̣д̣хам̣ – упосатхам̣, пава̄ран̣ам̣, вассикаса̄т̣икам̣, он̣оджанам̣, бхаттам̣. тена хи, бхиккхаве, аббха̄на̄раха̄нам̣ бхиккхӯнам̣ ваттам̣ пан̃н̃а̄песса̄ми йатха̄ аббха̄на̄рахехи бхиккхӯхи ваттитаббам̣.

96. ‘‘аббха̄на̄рахена, бхиккхаве, бхиккхуна̄ самма̄ ваттитаббам̣. татра̄йам̣ самма̄ваттана̄ –

на упасампа̄детаббам̣…пе… (йатха̄ хет̣т̣ха̄, татха̄ виттха̄ретаббам̣,) на бхиккхӯхи сампайоджетаббам̣.

‘‘на, бхиккхаве, аббха̄на̄рахена бхиккхуна̄ пакататтасса бхиккхуно пурато гантаббам̣, на пурато нисӣдитаббам̣. йо хоти сан̇гхасса а̄санапарийанто сеййа̄парийанто виха̄рапарийанто со тасса пада̄таббо. тена ча со са̄дитаббо.

‘‘на, бхиккхаве, аббха̄на̄рахена бхиккхуна̄ пакататтена бхиккхуна̄ пуресаман̣ена ва̄ паччха̄саман̣ена ва̄ кула̄ни упасан̇камитабба̄ни; на а̄ран̃н̃икан̇гам̣ сама̄да̄таббам̣; на пин̣д̣апа̄тикан̇гам̣ сама̄да̄таббам̣; на ча таппаччайа̄ пин̣д̣апа̄то нӣхара̄петаббо – ма̄ мам̣ джа̄ним̣сӯти.

‘‘на, бхиккхаве, аббха̄на̄рахена бхиккхуна̄ сабхиккхука̄ а̄ва̄са̄ абхиккхуко а̄ва̄со гантаббо, ан̃н̃атра пакататтена, ан̃н̃атра антара̄йа̄.

‘‘на, бхиккхаве, аббха̄на̄рахена бхиккхуна̄ сабхиккхука̄ а̄ва̄са̄ абхиккхуко ана̄ва̄со гантаббо, ан̃н̃атра пакататтена, ан̃н̃атра антара̄йа̄…пе…. (йатха̄ хет̣т̣ха̄, татха̄ виттха̄ретабба̄.)

‘‘гантаббо, бхиккхаве, аббха̄на̄рахена бхиккхуна̄ сабхиккхука̄ а̄ва̄са̄…пе… ана̄ва̄са̄…пе… а̄ва̄са̄ ва̄ ана̄ва̄са̄ ва̄ сабхиккхуко а̄ва̄со…пе… сабхиккхуко ана̄ва̄со…пе… сабхиккхуко а̄ва̄со ва̄ ана̄ва̄со ва̄, йаттхассу бхиккхӯ сама̄насам̣ва̄сака̄, йам̣ джан̃н̃а̄ саккоми аджджева гантунти.

‘‘на, бхиккхаве, аббха̄на̄рахена бхиккхуна̄ пакататтена бхиккхуна̄ саддхим̣ екаччханне а̄ва̄се ваттхаббам̣, на екаччханне ана̄ва̄се ваттхаббам̣, на екаччханне а̄ва̄се ва̄ ана̄ва̄се ва̄ ваттхаббам̣; пакататтам̣ бхиккхум̣ дисва̄ а̄сана̄ вут̣т̣ха̄таббам̣, пакататто бхиккху а̄санена нимантетаббо; на пакататтена бхиккхуна̄ саддхим̣ ека̄сане нисӣдитаббам̣, на нӣче а̄сане нисинне учче а̄сане нисӣдитаббам̣, на чхама̄йам̣ нисинне а̄сане нисӣдитаббам̣; на екачан̇каме чан̇камитаббам̣, на нӣче чан̇каме чан̇каманте учче чан̇каме чан̇камитаббам̣, на чхама̄йам̣ чан̇каманте чан̇каме чан̇камитаббам̣.

‘‘на, бхиккхаве, аббха̄на̄рахена бхиккхуна̄ па̄рива̄сикена бхиккхуна̄ саддхим̣…пе… мӯла̄йапат̣икассана̄рахена бхиккхуна̄ саддхим̣…пе… ма̄натта̄рахена бхиккхуна̄ саддхим̣…пе… ма̄наттача̄рикена бхиккхуна̄ саддхим̣…пе… аббха̄на̄рахена вуд̣д̣хатарена бхиккхуна̄ саддхим̣ екаччханне а̄ва̄се ваттхаббам̣, на екаччханне ана̄ва̄се ваттхаббам̣; на екаччханне а̄ва̄се ва̄ ана̄ва̄се ва̄ ваттхаббам̣; на ека̄сане нисӣдитаббам̣, на нӣче а̄сане нисинне учче а̄сане нисӣдитаббам̣, на чхама̄йам̣ нисинне а̄сане нисӣдитаббам̣; на екачан̇каме чан̇камитаббам̣, на нӣче чан̇каме чан̇каманте учче чан̇каме чан̇камитаббам̣, на чхама̄йам̣ чан̇каманте чан̇каме чан̇камитаббам̣.

[маха̄ва. 393] ‘‘аббха̄на̄рахачатуттхо че, бхиккхаве, парива̄сам̣ дадеййа, мӯла̄йа пат̣икассеййа, ма̄наттам̣ дадеййа, там̣вӣсо аббхеййа, акаммам̣, на ча каран̣ӣйа’’нти.

аббха̄на̄рахаваттам̣ нит̣т̣хитам̣.

па̄рива̄сикаккхандхако дутийо.

имамхи кхандхаке ваттхӯ пан̃ча.

тассудда̄нам̣ –

па̄рива̄сика̄ са̄денти, пакататта̄на бхиккхунам̣;

абхива̄данам̣ паччут̣т̣ха̄нам̣, ан̃джалин̃ча са̄мӣчийам̣.

а̄санам̣ сеййа̄бхиха̄рам̣, па̄до пӣт̣хам̣ катхаликам̣;

паттам̣ наха̄не парикаммам̣, уджджха̄йанти ча песала̄.

дуккат̣ам̣ са̄дийантасса, митху пан̃ча йатха̄вуд̣д̣хам̣ [пуна̄паре (ка.)];

упосатхам̣ пава̄ран̣ам̣, вассикон̣оджабходжанам̣.

самма̄ ча ваттана̄ таттха, пакататтасса гаччхантам̣;

йо ча хоти парийанто, пуре паччха̄ татхева ча [на пуре паччха̄саман̣ена (сӣ. сйа̄.)].

а̄ран̃н̃апин̣д̣анӣха̄ро, а̄гантуке упосатхе;

пава̄ран̣а̄йа дӯтена, гантаббо ча сабхиккхуко.

екаччханне ча вут̣т̣ха̄нам̣, татхева ча нимантайе;

а̄сане нӣче чан̇каме, чхама̄йам̣ чан̇камена ча.

вуд̣д̣хатарена акаммам̣, раттиччхеда̄ ча содхана̄;

никкхипанам̣ сама̄да̄нам̣, ваттам̣ва па̄рива̄сике [ратти ва̄ па̄рива̄сике (ка.), н̃а̄таббам̣ па̄рива̄сика̄ (сӣ. сйа̄.)].

мӯла̄йа ма̄натта̄раха̄, татха̄ ма̄наттача̄рика̄;

аббха̄на̄рахе найо ча̄пи, самбхедам̣ найато [самбхеданайато (сйа̄.)] пуна.

па̄рива̄сикесу тайо, чату ма̄наттача̄рике;

на саменти раттиччхедесу [раттиччхеде (итипи), раттиччхеда̄ (сйа̄.)], ма̄наттесу ча деваси;

две камма̄ садиса̄ сеса̄, тайо камма̄ сама̄сама̄ти [сама̄ мата̄ти (сӣ.)].

па̄рива̄сикаккхандхакам̣ нит̣т̣хитам̣.