3. ма̄натта̄рахаваттам̣

88. тена кхо пана самайена ма̄натта̄раха̄ бхиккхӯ са̄дийанти пакататта̄нам̣ бхиккхӯнам̣ абхива̄данам̣, паччут̣т̣ха̄нам̣, ан̃джаликаммам̣, са̄мӣчикаммам̣, а̄сана̄бхиха̄рам̣, сеййа̄бхиха̄рам̣, па̄додакам̣ па̄дапӣт̣хам̣, па̄дакатхаликам̣, паттачӣварапат̣иггахан̣ам̣, наха̄не пит̣т̣хипарикаммам̣. йе те бхиккхӯ аппиччха̄ …пе… те уджджха̄йанти кхиййанти випа̄ченти – ‘‘катхан̃хи на̄ма ма̄натта̄раха̄ бхиккхӯ са̄дийиссанти пакататта̄нам̣ бхиккхӯнам̣ абхива̄данам̣, паччут̣т̣ха̄нам̣, ан̃джаликаммам̣, са̄мӣчикаммам̣, а̄сана̄бхиха̄рам̣, сеййа̄бхиха̄рам̣, па̄додакам̣ па̄дапӣт̣хам̣, па̄дакатхаликам̣, паттачӣварапат̣иггахан̣ам̣, наха̄не пит̣т̣хипарикамма’’нти! атха кхо те бхиккхӯ бхагавато етаматтхам̣ а̄рочесум̣…пе… ‘‘саччам̣ кира, бхиккхаве, ма̄натта̄раха̄ бхиккхӯ са̄дийанти пакататта̄нам̣ бхиккхӯнам̣ абхива̄данам̣, паччут̣т̣ха̄нам̣…пе… наха̄не пит̣т̣хипарикамма’’нти? ‘‘саччам̣ бхагава̄’’ти. вигарахи буддхо бхагава̄ – ‘‘анануччхавикам̣…пе… катхан̃хи на̄ма, бхиккхаве, ма̄натта̄раха̄ бхиккхӯ са̄дийиссанти пакататта̄нам̣ бхиккхӯнам̣ абхива̄данам̣…пе… наха̄не пит̣т̣хипарикаммам̣! нетам̣, бхиккхаве, аппасанна̄нам̣ ва̄ паса̄да̄йа…пе… вигарахитва̄…пе… дхаммим̣ катхам̣ катва̄ бхиккхӯ а̄мантеси – ‘‘на, бхиккхаве, ма̄натта̄рахена бхиккхуна̄ са̄дитаббам̣ пакататта̄нам̣ бхиккхӯнам̣ абхива̄данам̣, паччут̣т̣ха̄нам̣…пе… наха̄не пит̣т̣хипарикаммам̣. йо са̄дийеййа, а̄патти дуккат̣асса. ануджа̄на̄ми, бхиккхаве, ма̄натта̄раха̄нам̣ бхиккхӯнам̣ митху йатха̄вуд̣д̣хам̣ абхива̄данам̣, паччут̣т̣ха̄нам̣…пе… наха̄не пит̣т̣хипарикаммам̣. ануджа̄на̄ми, бхиккхаве, ма̄натта̄раха̄нам̣ бхиккхӯнам̣ пан̃ча йатха̄вуд̣д̣хам̣ – упосатхам̣, пава̄ран̣ам̣, вассикаса̄т̣икам̣, он̣оджанам̣, бхаттам̣. тена хи, бхиккхаве, ма̄натта̄раха̄нам̣ бхиккхӯнам̣ ваттам̣ пан̃н̃а̄песса̄ми йатха̄ ма̄натта̄рахехи бхиккхӯхи ваттитаббам̣.

89. ‘‘ма̄натта̄рахена, бхиккхаве, бхиккхуна̄ самма̄ ваттитаббам̣. татра̄йам̣ самма̄ваттана̄ –

на упасампа̄детаббам̣…пе… (йатха̄ мӯла̄йа пат̣икассана̄, татха̄ виттха̄ретаббам̣.) на бхиккхӯхи сампайоджетаббам̣.

‘‘на, бхиккхаве, ма̄натта̄рахена бхиккхуна̄ пакататтасса бхиккхуно пурато гантаббам̣, на пурато нисӣдитаббам̣. йо хоти сан̇гхасса а̄санапарийанто сеййа̄парийанто виха̄рапарийанто со тасса пада̄таббо. тена ча со са̄дитаббо.

‘‘на, бхиккхаве, ма̄натта̄рахена бхиккхуна̄ пакататтена бхиккхуна̄ пуресаман̣ена ва̄ паччха̄саман̣ена ва̄ кула̄ни упасан̇камитабба̄ни, на а̄ран̃н̃икан̇гам̣ сама̄да̄таббам̣, на пин̣д̣апа̄тикан̇гам̣ сама̄да̄таббам̣, на ча таппаччайа̄ пин̣д̣апа̄то нӣхара̄петаббо – ма̄ мам̣ джа̄ним̣сӯти.

‘‘на, бхиккхаве, ма̄натта̄рахена бхиккхуна̄ сабхиккхука̄ а̄ва̄са̄ абхиккхуко а̄ва̄со гантаббо, ан̃н̃атра пакататтена, ан̃н̃атра антара̄йа̄.

‘‘на, бхиккхаве, манатта̄рахена бхиккхуна̄ сабхиккхука̄ а̄ва̄са̄ абхиккхуко ана̄ва̄со гантаббо, ан̃н̃атра пакататтена, ан̃н̃атра антара̄йа̄.

‘‘на, бхиккхаве, ма̄натта̄рахена бхиккхуна̄ сабхиккхука̄ а̄ва̄са̄ абхиккхуко а̄ва̄со ва̄ ана̄ва̄со ва̄ гантаббо, ан̃н̃атра пакататтена, ан̃н̃атра антара̄йа̄.

‘‘на, бхиккхаве, ма̄натта̄рахена бхиккхуна̄ сабхиккхука̄ ана̄ва̄са̄ абхиккхуко а̄ва̄со гантаббо…пе… абхиккхуко ана̄ва̄со гантаббо…пе… абхиккхуко а̄ва̄со ва̄ ана̄ва̄со ва̄ гантаббо, ан̃н̃атра пакататтена, ан̃н̃атра антара̄йа̄.

‘‘на, бхиккхаве, ма̄натта̄рахена бхиккхуна̄ сабхиккхука̄ а̄ва̄са̄ ва̄ ана̄ва̄са̄ ва̄ абхиккхуко а̄ва̄со гантаббо…пе… абхиккхуко ана̄ва̄со гантаббо…пе… абхиккхуко а̄ва̄со ва̄ ана̄ва̄со ва̄ гантаббо, ан̃н̃атра пакататтена, ан̃н̃атра антара̄йа̄.

‘‘на, бхиккхаве, ма̄натта̄рахена бхиккхуна̄ сабхиккхука̄ а̄ва̄са̄ сабхиккхуко а̄ва̄со гантаббо…пе… сабхиккхуко ана̄ва̄со гантаббо…пе… сабхиккхуко а̄ва̄со ва̄ ана̄ва̄со ва̄ гантаббо, йаттхассу бхиккхӯ на̄на̄сам̣ва̄сака̄, ан̃н̃атра пакататтена, ан̃н̃атра антара̄йа̄.

‘‘на, бхиккхаве, ма̄натта̄рахена бхиккхуна̄ сабхиккхука̄ ана̄ва̄са̄ сабхиккхуко а̄ва̄со гантаббо…пе… сабхиккхуко ана̄ва̄со гантаббо …пе… сабхиккхуко а̄ва̄со ва̄ ана̄ва̄со ва̄ гантаббо, йаттхассу бхиккхӯ на̄на̄сам̣ва̄сака̄, ан̃н̃атра пакататтена, ан̃н̃атра антара̄йа̄.

‘‘на, бхиккхаве, ма̄натта̄рахена бхиккхуна̄ сабхиккхука̄ а̄ва̄са̄ ва̄ ана̄ва̄са̄ ва̄ сабхиккхуко а̄ва̄со гантаббо…пе… сабхиккхуко ана̄ва̄со гантаббо…пе… сабхиккхуко а̄ва̄со ва̄ ана̄ва̄со ва̄ гантаббо, йаттхассу бхиккхӯ на̄на̄сам̣ва̄сака̄, ан̃н̃атра пакататтена, ан̃н̃атра антара̄йа̄.

‘‘гантаббо, бхиккхаве, ма̄натта̄рахена бхиккхуна̄ сабхиккхука̄ а̄ва̄са̄ сабхиккхуко а̄ва̄со…пе… сабхиккхуко ана̄ва̄со…пе… сабхиккхуко а̄ва̄со ва̄ ана̄ва̄со ва̄, йаттхассу бхиккхӯ сама̄насам̣ва̄сака̄, йам̣ джан̃н̃а̄ саккоми аджджева гантунти.

‘‘гантаббо, бхиккхаве, ма̄натта̄рахена бхиккхуна̄ сабхиккхука̄ ана̄ва̄са̄ сабхиккхуко а̄ва̄со…пе… сабхиккхуко ана̄ва̄со…пе… сабхиккхуко а̄ва̄со ва̄ ана̄ва̄со ва̄, йаттхассу бхиккхӯ сама̄насам̣ва̄сака̄, йам̣ джан̃н̃а̄ саккоми аджджева гантунти.

‘‘гантаббо, бхиккхаве, ма̄натта̄рахена бхиккхуна̄ сабхиккхука̄ а̄ва̄са̄ ва̄ ана̄ва̄са̄ ва̄ сабхиккхуко а̄ва̄со…пе… сабхиккхуко ана̄ва̄со…пе… сабхиккхуко а̄ва̄со ва̄ ана̄ва̄со ва̄, йаттхассу бхиккхӯ сама̄насам̣ва̄сака̄, йам̣ джан̃н̃а̄ саккоми аджджева гантунти.

‘‘на, бхиккхаве, ма̄натта̄рахена бхиккхуна̄ пакататтена бхиккхуна̄ саддхим̣ екаччханне а̄ва̄се ваттхаббам̣, на екаччханне ана̄ва̄се ваттхаббам̣, на екаччханне а̄ва̄се ва̄ ана̄ва̄се ва̄ ваттхаббам̣. пакататтам̣ бхиккхум̣ дисва̄ а̄сана̄ вут̣т̣ха̄таббам̣. пакататто бхиккху а̄санена нимантетаббо. на пакататтена бхиккхуна̄ саддхим̣ ека̄сане нисӣдитаббам̣, на нӣче а̄сане нисинне учче а̄сане нисӣдитаббам̣, на чхама̄йам̣ нисинне а̄сане нисӣдитаббам̣; на екачан̇каме чан̇камитаббам̣, на нӣче чан̇каме чан̇каманте учче чан̇каме чан̇камитаббам̣, на чхама̄йам̣ чан̇каманте чан̇каме чан̇камитаббам̣.

‘‘на, бхиккхаве, ма̄натта̄рахена бхиккхуна̄ па̄рива̄сикена бхиккхуна̄ саддхим̣…пе… мӯла̄йапат̣икассана̄рахена бхиккхуна̄ саддхим̣…пе… ма̄натта̄рахена вуд̣д̣хатарена бхиккхуна̄ саддхим̣…пе… ма̄наттача̄рикена бхиккхуна̄ саддхим̣…пе… аббха̄на̄рахена бхиккхуна̄ саддхим̣ екаччханне а̄ва̄се ваттхаббам̣, на екаччханне ана̄ва̄се ваттхаббам̣, на екаччханне а̄ва̄се ва̄ ана̄ва̄се ва̄ ваттхаббам̣; на ека̄сане нисӣдитаббам̣, на нӣче а̄сане нисинне учче а̄сане нисӣдитаббам̣, на чхама̄йам̣ нисинне а̄сане нисӣдитаббам̣; на екачан̇каме чан̇камитаббам̣, на нӣче чан̇каме чан̇каманте учче чан̇каме чан̇камитаббам̣, на чхама̄йам̣ чан̇каманте чан̇каме чан̇камитаббам̣.

[маха̄ва. 393] ‘‘ма̄натта̄рахачатуттхо че, бхиккхаве, парива̄сам̣ дадеййа, мӯла̄йа пат̣икассеййа, ма̄наттам̣ дадеййа, там̣вӣсо аббхеййа, акаммам̣, на ча каран̣ӣйа’’нти.

ма̄натта̄рахаваттам̣ нит̣т̣хитам̣.