1. пат̣хамабха̄н̣ава̄ро

446. тена кхо пана самайена вассасатапариниббуте бхагавати веса̄лика̄ ваджджипуттака̄ бхиккхӯ веса̄лийам̣ даса ваттхӯни дӣпенти – каппати син̇гилон̣акаппо, каппати дван̇гулакаппо, каппати га̄мантаракаппо, каппати а̄ва̄сакаппо, каппати ануматикаппо, каппати а̄чин̣н̣акаппо, каппати аматхитакаппо, каппати джал̣огим̣ па̄тум̣, каппати адасакам̣ нисӣданам̣, каппати джа̄тарӯпараджатанти.

тена кхо пана самайена а̄йасма̄ йасо ка̄кан̣д̣акапутто ваджджӣсу ча̄рикам̣ чарама̄но йена веса̄лӣ тадавасари. татра судам̣ а̄йасма̄ йасо ка̄кан̣д̣акапутто веса̄лийам̣ вихарати маха̄ване кӯт̣а̄га̄раса̄ла̄йам̣. тена кхо пана самайена веса̄лика̄ ваджджипуттака̄ бхиккхӯ тадахупосатхе кам̣сапа̄тим̣ [кам̣сача̄т̣им̣ (сйа̄.)] удакена пӯретва̄ маджджхе бхиккхусан̇гхасса т̣хапетва̄ а̄гата̄гате веса̄лике упа̄саке евам̣ ваданти – ‘‘детха̄вусо, сан̇гхасса каха̄пан̣ампи ад̣д̣хампи па̄дампи ма̄сакарӯпампи. бхависсати сан̇гхасса париккха̄рена каран̣ӣйа’’нти. евам̣ вутте а̄йасма̄ йасо ка̄кан̣д̣акапутто веса̄лике упа̄саке етадавоча – ‘‘ма̄вусо, адаттха сан̇гхасса каха̄пан̣ампи ад̣д̣хампи па̄дампи ма̄сакарӯпампи. на каппати саман̣а̄нам̣ сакйапуттийа̄нам̣ джа̄тарӯпараджатам̣; на са̄дийанти саман̣а̄ сакйапуттийа̄ джа̄тарӯпараджатам̣; на пат̣игган̣ханти саман̣а̄ сакйапуттийа̄ джа̄тарӯпараджатам̣; никкхиттаман̣исуван̣н̣а̄ саман̣а̄ сакйапуттийа̄ апетаджа̄тарӯпараджата̄’’ти. евампи кхо веса̄лика̄ упа̄сака̄ а̄йасмата̄ йасена ка̄кан̣д̣акапуттена вуччама̄на̄ адам̣суйева сан̇гхасса каха̄пан̣ампи ад̣д̣хампи па̄дампи ма̄сакарӯпампи.

атха кхо веса̄лика̄ ваджджипуттака̄ бхиккхӯ тасса̄ раттийа̄ аччайена там̣ хиран̃н̃ам̣ бхиккхаггена [бхиккхуггена (сйа̄.)] пат̣ивӣсам̣ [пат̣ивим̣сам̣ (сӣ.), пат̣ивисам̣ (сйа̄.)] т̣хапетва̄ бха̄джесум̣. атха кхо веса̄лика̄ ваджджипуттака̄ бхиккхӯ а̄йасмантам̣ йасам̣ ка̄кан̣д̣акапуттам̣ етадавочум̣ – ‘‘есо те, а̄вусо йаса, хиран̃н̃асса пат̣ивӣсо’’ти. ‘‘наттхи, ме а̄вусо, хиран̃н̃асса пат̣ивӣсо, на̄хам̣ хиран̃н̃ам̣ са̄дийа̄мӣ’’ти. атха кхо веса̄лика̄ ваджджипуттака̄ бхиккхӯ – ‘‘айам̣ а̄вусо йасо ка̄кан̣д̣акапутто упа̄саке саддхе пасанне аккосати, парибха̄сати, аппаса̄дам̣ кароти; хандасса майам̣ пат̣иса̄ран̣ӣйакаммам̣ карома̄’’ти те. тасса пат̣иса̄ран̣ӣйакаммам̣ акам̣су. атха кхо а̄йасма̄ йасо ка̄кан̣д̣акапутто веса̄лике ваджджипуттаке бхиккхӯ етадавоча – ‘‘бхагавата̄, а̄вусо, пан̃н̃аттам̣ – ‘пат̣иса̄ран̣ӣйакаммакатасса бхиккхуно анудӯто да̄таббо’ти. детха ме, а̄вусо, анудӯтам̣ бхиккху’’нти.

атха кхо веса̄лика̄ ваджджипуттака̄ бхиккхӯ екам̣ бхиккхум̣ самманнитва̄ а̄йасмато йасасса ка̄кан̣д̣акапуттасса анудӯтам̣ адам̣су. атха кхо а̄йасма̄ йасо ка̄кан̣д̣акапутто анудӯтена бхиккхуна̄ саддхим̣ веса̄лим̣ пависитва̄ веса̄лике упа̄саке етадавоча – ‘‘ахам̣ кира̄йасманте упа̄саке саддхе пасанне аккоса̄ми, парибха̄са̄ми, аппаса̄дам̣ кароми; йохам̣ адхаммам̣ адхаммоти вада̄ми, дхаммам̣ дхаммоти вада̄ми, авинайам̣ авинайоти вада̄ми, винайам̣ винайоти вада̄ми.

447. ‘‘екамидам̣, а̄вусо, самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. татра кхо, а̄вусо, бхагава̄ бхиккхӯ а̄мантеси – [а. ни. 4.50] ‘чатта̄роме, бхиккхаве, чандимасӯрийа̄нам̣ упаккилеса̄, йехи упаккилесехи упаккилит̣т̣ха̄ чандимасӯрийа̄ на тапанти, на бха̄санти, на вирочанти. катаме чатта̄ро? аббхам̣, бхиккхаве, чандимасӯрийа̄нам̣ упаккилесо, йена упаккилесена упаккилит̣т̣ха̄ чандимасӯрийа̄ на тапанти, на бха̄санти на вирочанти. махика̄, бхиккхаве, чандимасӯрийа̄нам̣ упаккилесо, йена упаккилесена упаккилит̣т̣ха̄ чандимасӯрийа̄ на тапанти, на бха̄санти, на вирочанти, дхӯмараджо, бхиккхаве, чандимасӯрийа̄нам̣ упаккилесо, йена упаккилесена упаккилит̣т̣ха̄ чандимасӯрийа̄ на тапанти, на бха̄санти, на вирочанти. ра̄ху, бхиккхаве, асуриндо чандимасӯрийа̄нам̣ упаккилесо, йена упаккилесена упаккилит̣т̣ха̄ чандимасӯрийа̄ на тапанти, на бха̄санти, на вирочанти. име кхо, бхиккхаве, чатта̄ро чандимасӯрийа̄нам̣ упаккилеса̄, йехи упаккилесехи упаккилит̣т̣ха̄ чандимасӯрийа̄ на тапанти, на бха̄санти, на вирочанти. евамева кхо, бхиккхаве, чатта̄роме саман̣абра̄хман̣а̄нам̣ упаккилеса̄, йехи упаккилесехи упаккилит̣т̣ха̄ еке саман̣абра̄хман̣а̄ на тапанти, на бха̄санти, на вирочанти. катаме чатта̄ро? санти, бхиккхаве, еке саман̣абра̄хман̣а̄ сурам̣ пиванти, мерайам̣ пиванти, сура̄мерайапа̄на̄ аппат̣ивирата̄ – айам̣, бхиккхаве, пат̣хамо саман̣абра̄хман̣а̄нам̣ упаккилесо, йена упаккилесена упаккилит̣т̣ха̄ еке саман̣абра̄хман̣а̄ на тапанти, на бха̄санти, на вирочанти. пуна чапарам̣, бхиккхаве, еке саман̣абра̄хман̣а̄ метхунам̣ дхаммам̣ пат̣исеванти, метхунадхамма̄ аппат̣ивирата̄ – айам̣, бхиккхаве, дутийо саман̣абра̄хман̣а̄нам̣ упаккилесо, йена упаккилесена упаккилит̣т̣ха̄ еке саман̣абра̄хман̣а̄ на тапанти, на бха̄санти, на вирочанти. пуна чапарам̣, бхиккхаве, еке саман̣абра̄хман̣а̄ джа̄тарӯпараджатам̣ са̄дийанти, джа̄тарӯпараджатаппат̣иггахан̣а̄ аппат̣ивирата̄ – айам̣, бхиккхаве, татийо саман̣абра̄хман̣а̄нам̣ упаккилесо, йена упаккилесена упаккилит̣т̣ха̄ еке саман̣абра̄хман̣а̄ на тапанти, на бха̄санти, на вирочанти. пуна чапарам̣, бхиккхаве, еке саман̣абра̄хман̣а̄ миччха̄джӣвена джӣвитам̣ каппенти; миччха̄джӣва̄ аппат̣ивирата̄ – айам̣, бхиккхаве, чатуттхо саман̣абра̄хман̣а̄нам̣ упаккилесо, йена упаккилесена упаккилит̣т̣ха̄ еке саман̣абра̄хман̣а̄ на тапанти, на бха̄санти, на вирочанти. име кхо, бхиккхаве, чатта̄ро саман̣абра̄хман̣а̄нам̣ упаккилеса̄, йехи упаккилесехи упаккилит̣т̣ха̄ еке саман̣абра̄хман̣а̄ на тапанти, на бха̄санти, на вирочанти’. ‘‘идамавоча̄вусо, бхагава̄. идам̣ ватва̄на сугато атха̄парам̣ етадавоча саттха̄ –

‘‘ра̄гадосапариклит̣т̣ха̄, еке саман̣абра̄хман̣а̄;

авиджджа̄нивут̣а̄ [авиджджа̄нӣвута̄ (сйа̄.)] поса̄, пийарӯпа̄бхинандино.

‘‘сурам̣ пиванти мерайам̣, пат̣исеванти метхунам̣;

раджатам̣ джа̄тарӯпан̃ча, са̄дийанти авиддасӯ.

‘‘миччха̄джӣвена джӣванти, еке саман̣абра̄хман̣а̄;

ете упаккилеса̄ вутта̄, буддхена̄диччабандхуна̄.

‘‘йехи упаккилесехи упаккилит̣т̣ха̄, еке саман̣абра̄хман̣а̄;

на тапанти на бха̄санти, асуддха̄ сараджа̄ мага̄.

‘‘андхака̄рена онаддха̄, тан̣ха̄да̄са̄ санеттика̄;

вад̣д̣хенти кат̣асим̣ гхорам̣, а̄дийанти пунаббхаванти.

‘‘евам̣ва̄дӣ кира̄хам̣ а̄йасманте упа̄саке саддхе пасанне аккоса̄ми, парибха̄са̄ми, аппаса̄дам̣ кароми; йохам̣ адхаммам̣ адхаммоти вада̄ми, дхаммам̣ дхаммоти вада̄ми, авинайам̣ авинайоти вада̄ми, винайам̣ винайоти вада̄ми.

448. [сам̣. ни. 4.362 идам̣ ваттху а̄гатам̣] ‘‘екамидам̣, а̄вусо, самайам̣ бхагава̄ ра̄джагахе вихарати вел̣уване каландаканива̄пе. тена кхо пана самайена ра̄джантепуре ра̄джапариса̄йам̣ саннисинна̄нам̣ саннипатита̄нам̣ айамантаракатха̄ удапа̄ди – ‘каппати саман̣а̄нам̣ сакйапуттийа̄нам̣ джа̄тарӯпараджатам̣; са̄дийанти саман̣а̄ сакйапуттийа̄ джа̄тарӯпараджатам̣; пат̣игган̣ханти саман̣а̄ сакйапуттийа̄ джа̄тарӯпараджата’нти. тена кхо пана̄вусо самайена, ман̣ичӯл̣ако га̄ман̣ӣ тассам̣ париса̄йам̣ нисинно хоти. атха кхо, а̄вусо, ман̣ичӯл̣ако га̄ман̣ӣ там̣ парисам̣ етадавоча – ‘ма̄ аййа̄ евам̣ авачуттха. на каппати саман̣а̄нам̣ сакйапуттийа̄нам̣ джа̄тарӯпараджатам̣; на са̄дийанти саман̣а̄ сакйапуттийа̄ джа̄тарӯпараджатам̣; на пат̣игган̣ханти саман̣а̄ сакйапуттийа̄ джа̄тарӯпараджатам̣; никкхиттаман̣исуван̣н̣а̄ саман̣а̄ сакйапуттийа̄ апетаджа̄тарӯпараджата̄’ти. асаккхи кхо, а̄вусо, ман̣ичӯл̣ако га̄ман̣ӣ там̣ парисам̣ сан̃н̃а̄петум̣.

‘‘атха кхо, а̄вусо, ман̣ичӯл̣ако га̄ман̣ӣ там̣ парисам̣ сан̃н̃а̄петва̄ йена бхагава̄ тенупасан̇ками, упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо, а̄вусо, ман̣ичӯл̣ако га̄ман̣ӣ бхагавантам̣ етадавоча – ‘идха, бханте, ра̄джантепуре ра̄джапариса̄йам̣ саннисинна̄нам̣ саннипатита̄нам̣ айамантаракатха̄ удапа̄ди – каппати саман̣а̄нам̣ сакйапуттийа̄нам̣ джа̄тарӯпараджатам̣; са̄дийанти саман̣а̄ сакйапуттийа̄ джа̄тарӯпараджатам̣; пат̣игган̣ханти саман̣а̄ сакйапуттийа̄ джа̄тарӯпараджатанти. евам̣ вутте ахам̣ бханте, там̣ парисам̣ етадавочам̣ – ма̄ аййа̄ евам̣ авачуттха. на каппати саман̣а̄нам̣ сакйапуттийа̄нам̣ джа̄тарӯпараджатам̣; на са̄дийанти саман̣а̄ сакйапуттийа̄ джа̄тарӯпараджатам̣; на пат̣игган̣ханти саман̣а̄ сакйапуттийа̄ джа̄тарӯпараджатам̣; никкхиттаман̣исуван̣н̣а̄ саман̣а̄ сакйапуттийа̄ апетаджа̄тарӯпараджата̄ти. асаккхим̣ кхо ахам̣, бханте, там̣ парисам̣ сан̃н̃а̄петум̣. качча̄хам̣, бханте, евам̣ бйа̄карама̄но вуттава̄дӣ чева бхагавато хоми, на ча бхагавантам̣ абхӯтена аббха̄чиккха̄ми, дхаммасса ча̄нудхаммам̣ бйа̄кароми, на ча кочи сахадхаммико ва̄да̄нува̄до га̄райхам̣ т̣ха̄нам̣ а̄гаччхатӣ’ти? ‘таггха твам̣, га̄ман̣и, евам̣ бйа̄карама̄но вуттава̄дӣ чева ме хоси; на ча мам̣ абхӯтена аббха̄чиккхаси [па̄ра̄. 582], дхаммасса ча̄нудхаммам̣ бйа̄кароси, на ча кочи сахадхаммико ва̄да̄нува̄до га̄райхам̣ т̣ха̄нам̣ а̄гаччхати. на хи, га̄ман̣и, каппати саман̣а̄нам̣ сакйапуттийа̄нам̣ джа̄тарӯпараджатам̣; на са̄дийанти саман̣а̄ сакйапуттийа̄ джа̄тарӯпараджатам̣; на пат̣игган̣ханти саман̣а̄ сакйапуттийа̄ джа̄тарӯпараджатам̣; никкхиттаман̣исуван̣н̣а̄ саман̣а̄ сакйапуттийа̄ апетаджа̄тарӯпараджата̄. йасса кхо, га̄ман̣и, джа̄тарӯпараджатам̣ каппати, пан̃чапи тасса ка̄магун̣а̄ каппанти. йасса пан̃ча ка̄магун̣а̄ каппанти екам̣сенетам̣, га̄ман̣и, дха̄реййа̄си – ассаман̣адхаммо асакйапуттийадхаммоти. апи ча̄хам̣, га̄ман̣и, евам̣ вада̄ми тин̣ам̣ тин̣аттхикена парийеситаббам̣; да̄ру да̄руттхикена парийеситаббам̣; сакат̣ам̣ сакат̣аттхикена парийеситаббам̣; пурисо пурисаттхикена парийеситаббо. на твева̄хам̣, га̄ман̣и, кеначи парийа̄йена джа̄тарӯпараджатам̣ са̄дитаббам̣ парийеситаббанти вада̄мӣ’ти.

449. ‘‘екамидам̣, а̄вусо, самайам̣ бхагава̄ ра̄джагахе а̄йасмантам̣ упанандам̣ сакйапуттам̣ а̄раббха джа̄тарӯпараджатам̣ пат̣иккхипи, сиккха̄падан̃ча пан̃н̃апеси. евам̣ва̄дӣ кира̄хам̣ а̄йасманте упа̄саке саддхе пасанне аккоса̄ми, парибха̄са̄ми, аппаса̄дам̣ кароми; йохам̣ адхаммам̣ адхаммоти вада̄ми, дхаммам̣ дхаммоти вада̄ми, авинайам̣ авинайоти вада̄ми, винайам̣ винайоти вада̄мӣ’’ти.

евам̣ вутте веса̄лика̄ упа̄сака̄ а̄йасмантам̣ йасам̣ ка̄кан̣д̣акапуттам̣ етадавочум̣ – ‘‘екова бханте, аййо йасо ка̄кан̣д̣акапутто саман̣о сакйапуттийо. саббевиме ассаман̣а̄ асакйапуттийа̄. васату, бханте, аййо йасо ка̄кан̣д̣акапутто веса̄лийам̣. майам̣ аййасса йасасса ка̄кан̣д̣акапуттасса уссуккам̣ карисса̄ма чӣварапин̣д̣апа̄тасена̄санагила̄наппаччайабхесаджджапариккха̄ра̄на’’нти. атха кхо а̄йасма̄ йасо ка̄кан̣д̣акапутто веса̄лике упа̄саке сан̃н̃а̄петва̄ анудӯтена бхиккхуна̄ саддхим̣ а̄ра̄мам̣ агама̄си.

атха кхо веса̄лика̄ ваджджипуттака̄ бхиккхӯ анудӯтам̣ бхиккхум̣ пуччхим̣су – ‘‘кхама̄пита̄вусо, йасена ка̄кан̣д̣акапуттена веса̄лика̄ упа̄сака̄’’ти? ‘‘упа̄сакехи па̄пикам̣ но, а̄вусо, катам̣. екова йасо ка̄кан̣д̣акапутто саман̣о сакйапуттийо като. саббева майам̣ ассаман̣а̄ асакйапуттийа̄ ката̄’’ти. атха кхо веса̄лика̄ ваджджипуттака̄ бхиккхӯ – ‘‘айам̣, а̄вусо, йасо ка̄кан̣д̣акапутто амхехи асаммато гихӣнам̣ пака̄сеси; хандасса майам̣ уккхепанӣйакаммам̣ карома̄’’ти. те тасса уккхепанӣйакаммам̣ каттука̄ма̄ саннипатим̣су. атха кхо а̄йасма̄ йасо ка̄кан̣д̣акапутто веха̄сам̣ аббхуггантва̄ косамбийам̣ паччут̣т̣ха̄си.

450. атха кхо а̄йасма̄ йасо ка̄кан̣д̣акапутто па̄веййака̄нан̃ча [па̄т̣хеййака̄нан̃ча (сйа̄.)] авантидаккхин̣а̄патхака̄нан̃ча бхиккхӯнам̣ сантике дӯтам̣ па̄хеси – ‘‘а̄гаччханту а̄йасманта̄; имам̣ адхикаран̣ам̣ а̄дийисса̄ма. пуре адхаммо диппати, дхаммо пат̣иба̄хиййати; авинайо диппати, винайо пат̣иба̄хиййати; пуре адхаммава̄дино балаванто хонти, дхаммава̄дино дуббала̄ хонти; авинайава̄дино балаванто хонти, винайава̄дино дуббала̄ хонтӣ’’ти.

тена кхо пана самайена а̄йасма̄ самбхӯто са̄н̣ава̄сӣ ахоган̇ге паббате пат̣ивасати. атха кхо а̄йасма̄ йасо ка̄кан̣д̣акапутто йена ахоган̇го паббато, йена̄йасма̄ самбхӯто са̄н̣ава̄сӣ тенупасан̇ками, упасан̇камитва̄ а̄йасмантам̣ самбхӯтам̣ са̄н̣ава̄сим̣ абхива̄детва̄ екамантам̣ нисӣди. екамантам̣ нисинно кхо а̄йасма̄ йасо ка̄кан̣д̣акапутто а̄йасмантам̣ самбхӯтам̣ са̄н̣ава̄сим̣ етадавоча – ‘‘име, бханте, веса̄лика̄ ваджджипуттака̄ бхиккхӯ веса̄лийам̣ даса ваттхӯни дӣпенти – каппати син̇гилон̣акаппо, каппати дван̇гулакаппо, каппати га̄мантаракаппо, каппати а̄ва̄сакаппо, каппати ануматикаппо, каппати а̄чин̣н̣акаппо, каппати аматхитакаппо, каппати джал̣огим̣ па̄тум̣, каппати адасакам̣ нисӣданам̣, каппати джа̄тарӯпараджатанти. ханда майам̣, бханте, имам̣ адхикаран̣ам̣ а̄дийисса̄ма. пуре адхаммо диппати, дхаммо пат̣иба̄хиййати; авинайо диппати, винайо пат̣иба̄хиййати; пуре адхаммава̄дино балаванто хонти, дхаммава̄дино дуббала̄ хонти; авинайава̄дино балаванто хонти, винайава̄дино дуббала̄ хонтӣ’’ти. ‘‘евама̄вусо’’ти кхо а̄йасма̄ самбхӯто са̄н̣ава̄сӣ а̄йасмато йасасса ка̄кан̣д̣акапуттасса паччассоси. атха кхо сат̣т̣химатта̄ па̄веййака̄ бхиккхӯ – саббе а̄ран̃н̃ика̄, саббе пин̣д̣апа̄тика̄, саббе пам̣сукӯлика̄, саббе течӣварика̄, саббева араханто – ахоган̇ге паббате саннипатим̣су. ат̣т̣ха̄сӣтиматта̄ авантидаккхин̣а̄патхака̄ бхиккхӯ – аппекачче а̄ран̃н̃ика̄, аппекачче пин̣д̣апа̄тика̄, аппекачче пам̣сукӯлика̄, аппекачче течӣварика̄, саббева араханто – ахоган̇ге паббате саннипатим̣су. атха кхо тхера̄нам̣ бхиккхӯнам̣ мантайама̄на̄нам̣ етадахоси – ‘‘идам̣ кхо адхикаран̣ам̣ каккхал̣ан̃ча, ва̄л̣ан̃ча; кам̣ ну кхо майам̣ паккхам̣ лабхеййа̄ма, йена майам̣ имасмим̣ адхикаран̣е балавантатара̄ асса̄ма̄’’ти.

451. тена кхо пана самайена а̄йасма̄ ревато сореййе пат̣ивасати – бахуссуто а̄гата̄гамо дхаммадхаро винайадхаро ма̄тика̄дхаро пан̣д̣ито вийатто медха̄вӣ ладжджӣ куккуччако сиккха̄ка̄мо. атха кхо тхера̄нам̣ бхиккхӯнам̣ етадахоси – ‘‘айам̣ кхо а̄йасма̄ ревато сореййе пат̣ивасати – бахуссуто а̄гата̄гамо дхаммадхаро винайадхаро ма̄тика̄дхаро пан̣д̣ито вийатто медха̄вӣ ладжджӣ куккуччако сиккха̄ка̄мо. саче майам̣ а̄йасмантам̣ реватам̣ паккхам̣ лабхисса̄ма, евам̣ майам̣ имасмим̣ адхикаран̣е балавантатара̄ асса̄ма̄’’ти. ассоси кхо а̄йасма̄ ревато – дибба̄йа сотадха̄туйа̄ висуддха̄йа атиккантама̄нусика̄йа – тхера̄нам̣ бхиккхӯнам̣ мантайама̄на̄нам̣. сутва̄насса етадахоси – ‘‘идам̣ кхо адхикаран̣ам̣ каккхал̣ан̃ча ва̄л̣ан̃ча. на кхо метам̣ патирӯпам̣ йохам̣ еварӯпе адхикаран̣е осаккеййам̣. ида̄ни ча пана те бхиккхӯ а̄гаччхиссанти. сохам̣ техи а̄кин̣н̣о на пха̄су гамисса̄ми. йам̣нӯна̄хам̣ пат̣икаччева гаччхеййа’’нти. атха кхо а̄йасма̄ ревато сореййа̄ сан̇кассам̣ агама̄си.

атха кхо тхера̄ бхиккхӯ сореййам̣ гантва̄ пуччхим̣су – ‘‘кахам̣ а̄йасма̄ ревато’’ти? те евама̄хам̣су – ‘‘еса̄йасма̄ ревато сан̇кассам̣ гато’’ти. атха кхо а̄йасма̄ ревато сан̇касса̄ кан̣н̣акуджджам̣ [каннакуджджам̣ (сӣ.)] агама̄си. атха кхо тхера̄ бхиккхӯ сан̇кассам̣ гантва̄ пуччхим̣су – ‘‘кахам̣ а̄йасма̄ ревато’’ти? те евама̄хам̣су – ‘‘еса̄йасма̄ ревато кан̣н̣акуджджам̣ гато’’ти. атха кхо а̄йасма̄ ревато кан̣н̣акуджджа̄ удумбарам̣ агама̄си. атха кхо тхера̄ бхиккхӯ кан̣н̣акуджджам̣ гантва̄ пуччхим̣су – ‘‘кахам̣ а̄йасма̄ ревато’’ти? те евама̄хам̣су – ‘‘еса̄йасма̄ ревато удумбарам̣ гато’’ти. атха кхо а̄йасма̄ ревато удумбара̄ аггал̣апурам̣ агама̄си. атха кхо тхера̄ бхиккхӯ удумбарам̣ гантва̄ пуччхим̣су – ‘‘кахам̣ а̄йасма̄ ревато’’ти? те евама̄хам̣су – ‘‘еса̄йасма̄ ревато аггал̣апурам̣ гато’’ти. атха кхо а̄йасма̄ ревато аггал̣апура̄ сахаджа̄тим̣ [сахам̣джа̄тим̣ (ка.)] агама̄си. атха кхо тхера̄ бхиккхӯ аггал̣апурам̣ гантва̄ пуччхим̣су – ‘‘кахам̣ а̄йасма̄ ревато’’ти? те евама̄хам̣су – ‘‘еса̄йасма̄ ревато сахаджа̄тим̣ гато’’ти. атха кхо тхера̄ бхиккхӯ а̄йасмантам̣ реватам̣ сахаджа̄тийам̣ самбха̄весум̣.

452. атха кхо а̄йасма̄ самбхӯто са̄н̣ава̄сӣ а̄йасмантам̣ йасам̣ ка̄кан̣д̣акапуттам̣ етадавоча – ‘‘айам̣, а̄вусо, а̄йасма̄ ревато бахуссуто а̄гата̄гамо дхаммадхаро винайадхаро ма̄тика̄дхаро пан̣д̣ито вийатто медха̄вӣ ладжджӣ куккуччако сиккха̄ка̄мо. саче майам̣ а̄йасмантам̣ реватам̣ пан̃хам̣ пуччхисса̄ма, пат̣ибало а̄йасма̄ ревато екенева пан̃хена сакалампи раттим̣ вӣтина̄метум̣. ида̄ни ча пана̄йасма̄ ревато антева̄сикам̣ [антева̄сим̣ (сйа̄.)] сарабха̄н̣акам̣ бхиккхум̣ аджджхесиссати. со твам̣ тасса бхиккхуно сарабхан̃н̃апарийоса̄не а̄йасмантам̣ реватам̣ упасан̇камитва̄ има̄ни даса ваттхӯни пуччхеййа̄сӣ’’ти. ‘‘евам̣ бханте’’ти кхо а̄йасма̄ йасо ка̄кан̣д̣акапутто а̄йасмато самбхӯтасса са̄н̣ава̄сисса паччассоси. атха кхо а̄йасма̄ ревато антева̄сикам̣ сарабха̄н̣акам̣ бхиккхум̣ аджджхеси. атха кхо а̄йасма̄ йасо ка̄кан̣д̣акапутто тасса бхиккхуно сарабхан̃н̃апарийоса̄не йена̄йасма̄ ревато тенупасан̇ками, упасан̇камитва̄ а̄йасмантам̣ реватам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ йасо ка̄кан̣д̣акапутто а̄йасмантам̣ реватам̣ етадавоча – ‘‘каппати, бханте, син̇гилон̣акаппо’’ти? ‘‘ко со, а̄вусо, син̇гилон̣акаппо’’ти? ‘‘каппати, бханте, син̇гина̄ лон̣ам̣ парихаритум̣ – йаттха алон̣акам̣ бхависсати таттха парибхун̃джисса̄мӣ’’ти? ‘‘на̄вусо, каппатӣ’’ти. ‘‘каппати, бханте, дван̇гулакаппо’’ти? ‘‘ко со, а̄вусо, дван̇гулакаппо’’ти? ‘‘каппати, бханте, дван̇гула̄йа чха̄йа̄йа вӣтиватта̄йа, вика̄ле бходжанам̣ бхун̃джиту’’нти? ‘‘на̄вусо, каппатӣ’’ти. ‘‘каппати, бханте, га̄мантаракаппо’’ти? ‘‘ко со, а̄вусо, га̄мантаракаппо’’ти? ‘‘каппати, бханте – ида̄ни га̄мантарам̣ гамисса̄мӣти – бхутта̄вина̄ пава̄ритена анатириттам̣ бходжанам̣ бхун̃джиту’’нти? ‘‘на̄вусо, каппатӣ’’ти. ‘‘каппати, бханте, а̄ва̄сакаппо’’ти? ‘‘ко со, а̄вусо, а̄ва̄сакаппо’’ти? ‘‘каппати, бханте, самбахула̄ а̄ва̄са̄ сама̄насӣма̄ на̄нупосатхам̣ ка̄ту’’нти? ‘‘на̄вусо, каппатӣ’’ти. ‘‘каппати, бханте, ануматикаппо’’ти? ‘‘ко со, а̄вусо, ануматикаппо’’ти? ‘‘каппати, бханте, ваггена сан̇гхена каммам̣ ка̄тум̣ – а̄гате бхиккхӯ анума̄несса̄ма̄’’ти [ануджа̄нисса̄ма̄ти, ануджа̄несса̄ма̄ти, ануматим̣ а̄несса̄ма̄ти (ка.)]? ‘‘на̄вусо, каппатӣ’’ти. ‘‘каппати, бханте, а̄чин̣н̣акаппо’’ти? ‘‘ко со, а̄вусо, а̄чин̣н̣акаппо’’ти? ‘‘каппати, бханте, идам̣ ме упаджджха̄йена аджджха̄чин̣н̣ам̣, идам̣ ме а̄чарийена аджджха̄чин̣н̣ам̣, там̣ аджджха̄чариту’’нти? ‘‘а̄чин̣н̣акаппо кхо, а̄вусо, екаччо каппати, екаччо на каппатӣ’’ти. ‘‘каппати, бханте, аматхитакаппо’’ти? ‘‘ко со, а̄вусо, аматхитакаппо’’ти? ‘‘каппати, бханте, йам̣ там̣ кхӣрам̣ кхӣрабха̄вам̣ виджахитам̣, асампаттам̣ дадхибха̄вам̣, там̣ бхутта̄вина̄ пава̄ритена анатириттам̣ па̄ту’’нти? ‘‘на̄вусо, каппатӣ’’ти? ‘‘каппати, бханте, джал̣огим̣ па̄ту’’нти? ‘‘ка̄ са̄, а̄вусо, джал̣огӣ’’ти? ‘‘каппати, бханте, йа̄ са̄ сура̄ а̄сута̄, асампатта̄ маджджабха̄вам̣, са̄ па̄ту’’нти? ‘‘на̄вусо, каппатӣ’’ти. ‘‘каппати, бханте, адасакам̣ нисӣдана’’нти? ‘‘на̄вусо, каппатӣ’’ти. ‘‘каппати, бханте, джа̄тарӯпараджата’’нти? ‘‘на̄вусо, каппатӣ’’ти. ‘‘име, бханте, веса̄лика̄ ваджджипуттака̄ бхиккхӯ веса̄лийам̣ има̄ни даса ваттхӯни дӣпенти. ханда майам̣, бханте, имам̣ адхикаран̣ам̣ а̄дийисса̄ма. пуре адхаммо диппати, дхаммо пат̣иба̄хиййати; авинайо диппати, винайо пат̣иба̄хиййати; пуре адхаммава̄дино балаванто хонти, дхаммава̄дино дуббала̄ хонти; авинайава̄дино балаванто хонти, винайава̄дино дуббала̄ хонтӣ’’ти. ‘‘евама̄вусо’’ти кхо а̄йасма̄ ревато а̄йасмато йасасса ка̄кан̣д̣акапуттасса паччассоси.

пат̣хамабха̄н̣ава̄ро нит̣т̣хито.