1. таджджанӣйакаммам̣

1. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена пан̣д̣укалохитака̄ бхиккхӯ аттана̄ бхан̣д̣анака̄рака̄ калахака̄рака̄ вива̄дака̄рака̄ бхассака̄рака̄ сан̇гхе адхикаран̣ака̄рака̄, йепи чан̃н̃е бхиккхӯ бхан̣д̣анака̄рака̄ калахака̄рака̄ вива̄дака̄рака̄ бхассака̄рака̄ сан̇гхе адхикаран̣ака̄рака̄ те упасан̇камитва̄ евам̣ ваданти – ‘‘ма̄ кхо тумхе, а̄йасманто, есо аджеси. балава̄балавам̣ пат̣имантетха. тумхе тена пан̣д̣итатара̄ ча бйаттатара̄ ча бахуссутатара̄ ча аламаттатара̄ ча [аламаттхатара̄ ча (сйа̄. ка.)]. ма̄ часса бха̄йиттха. майампи тумха̄кам̣ паккха̄ бхависса̄ма̄’’ти. тена ануппанна̄ни чева бхан̣д̣ана̄ни уппаджджанти уппанна̄ни ча бхан̣д̣ана̄ни бхиййобха̄ва̄йа вепулла̄йа сам̣ваттанти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма пан̣д̣укалохитака̄ бхиккхӯ аттана̄ бхан̣д̣анака̄рака̄ калахака̄рака̄ вива̄дака̄рака̄ бхассака̄рака̄ сан̇гхе адхикаран̣ака̄рака̄, йепи чан̃н̃е бхиккхӯ бхан̣д̣анака̄рака̄ калахака̄рака̄ вива̄дака̄рака̄ бхассака̄рака̄ сан̇гхе адхикаран̣ака̄рака̄ те упасан̇камитва̄ евам̣ ваккханти – ‘ма̄ кхо тумхе, а̄йасманто, есо аджеси. балава̄балавам̣ пат̣имантетха. тумхе тена пан̣д̣итатара̄ ча бйаттатара̄ ча бахуссутатара̄ ча аламаттатара̄ ча. ма̄ часса бха̄йиттха. майампи тумха̄кам̣ паккха̄ бхависса̄ма̄’ти. тена ануппанна̄ни чева бхан̣д̣ана̄ни уппаджджанти уппанна̄ни ча бхан̣д̣ана̄ни бхиййобха̄ва̄йа вепулла̄йа сам̣ваттантӣ’’ти.

2. атха кхо те бхиккхӯ бхагавато етаматтхам̣ а̄рочесум̣. атха кхо бхагава̄ етасмим̣ нида̄не етасмим̣ пакаран̣е бхиккхусан̇гхам̣ саннипа̄та̄петва̄ бхиккхӯ пат̣ипуччхи – ‘‘саччам̣ кира, бхиккхаве, пан̣д̣укалохитака̄ бхиккхӯ аттана̄ бхан̣д̣анака̄рака̄ калахака̄рака̄ вива̄дака̄рака̄ бхассака̄рака̄ сан̇гхе адхикаран̣ака̄рака̄, йепи чан̃н̃е бхиккхӯ бхан̣д̣анака̄рака̄ калахака̄рака̄ вива̄дака̄рака̄ бхассака̄рака̄ сан̇гхе адхикаран̣ака̄рака̄ те упасан̇камитва̄ евам̣ ваданти – ‘ма̄ кхо тумхе, а̄йасманто, есо аджеси. балава̄балавам̣ пат̣имантетха. тумхе тена пан̣д̣итатара̄ ча бйаттатара̄ ча бахуссутатара̄ ча аламаттатара̄ ча. ма̄ часса бха̄йиттха. майампи тумха̄кам̣ паккха̄ бхависса̄ма̄’ти. тена ануппанна̄ни чева бхан̣д̣ана̄ни уппаджджанти, уппанна̄ни ча бхан̣д̣ана̄ни бхиййобха̄ва̄йа вепулла̄йа сам̣ваттантӣ’’ти? ‘‘саччам̣ бхагава̄’’ти. вигарахи буддхо бхагава̄ – ‘‘анануччхавикам̣, бхиккхаве, тесам̣ могхапуриса̄нам̣ анануломикам̣ аппатирӯпам̣ асса̄ман̣акам̣ акаппийам̣ акаран̣ӣйам̣. катхан̃хи на̄ма те, бхиккхаве, могхапуриса̄ аттана̄ бхан̣д̣анака̄рака̄…пе… сан̇гхе адхикаран̣ака̄рака̄, йепи чан̃н̃е бхиккхӯ бхан̣д̣анака̄рака̄…пе… сан̇гхе адхикаран̣ака̄рака̄ те упасан̇камитва̄ евам̣ ваккханти – ‘ма̄ кхо тумхе, а̄йасманто, есо аджеси. балава̄балавам̣ пат̣имантетха. тумхе тена пан̣д̣итатара̄ ча бйаттатара̄ ча бахуссутатара̄ ча аламаттатара̄ ча. ма̄ часса бха̄йиттха. майампи тумха̄кам̣ паккха̄ бхависса̄ма̄’ти? тена ануппанна̄ни чева бхан̣д̣ана̄ни уппаджджанти, уппанна̄ни ча бхан̣д̣ана̄ни бхиййобха̄ва̄йа вепулла̄йа сам̣ваттанти. нетам̣, бхиккхаве, аппасанна̄нам̣ ва̄ паса̄да̄йа пасанна̄нам̣ ва̄ бхиййобха̄ва̄йа. атха кхветам̣, бхиккхаве, аппасанна̄нан̃чева аппаса̄да̄йа пасанна̄нан̃ча екачча̄нам̣ ан̃н̃атхатта̄йа̄’’ти.

атха кхо бхагава̄ те [пан̣д̣укалохитаке (сйа̄.)] бхиккхӯ анекапарийа̄йена вигарахитва̄ дуббхарата̄йа дуппосата̄йа махиччхата̄йа асантут̣т̣хита̄йа [асантут̣т̣хата̄йа (сйа̄.), асантут̣т̣хийа̄ (сӣ.)] сан̇ган̣ика̄йа косаджджасса аван̣н̣ам̣ бха̄ситва̄ анекапарийа̄йена субхарата̄йа супосата̄йа аппиччхасса сантут̣т̣хасса саллекхасса дхутасса па̄са̄дикасса апачайасса вӣрийа̄рамбхасса [вирийа̄рамбхасса (сӣ.), вӣрийа̄раббхасса (ка.)] ван̣н̣ам̣ бха̄ситва̄ бхиккхӯнам̣ тадануччхавикам̣ тадануломикам̣ дхаммим̣ катхам̣ катва̄ бхиккхӯ а̄мантеси – ‘‘тена хи, бхиккхаве, сан̇гхо пан̣д̣укалохитака̄нам̣ бхиккхӯнам̣ таджджанӣйакаммам̣ кароту. еван̃ча пана, бхиккхаве, ка̄таббам̣. пат̣хамам̣ пан̣д̣укалохитака̄ бхиккхӯ чодетабба̄, чодетва̄ са̄ретабба̄, са̄ретва̄ а̄паттим̣ [а̄патти (сӣ. сйа̄.)] а̄ропетабба̄, а̄паттим̣ а̄ропетва̄ бйаттена бхиккхуна̄ пат̣ибалена сан̇гхо н̃а̄петаббо –

3. ‘‘сун̣а̄ту ме, бханте, сан̇гхо. име пан̣д̣укалохитака̄ бхиккхӯ аттана̄ бхан̣д̣анака̄рака̄ калахака̄рака̄ вива̄дака̄рака̄ бхассака̄рака̄ сан̇гхе адхикаран̣ака̄рака̄, йепи чан̃н̃е бхиккхӯ бхан̣д̣анака̄рака̄ калахака̄рака̄ вива̄дака̄рака̄ бхассака̄рака̄ сан̇гхе адхикаран̣ака̄рака̄ те упасан̇камитва̄ евам̣ ваданти – ‘ма̄ кхо тумхе, а̄йасманто, есо аджеси. балава̄балавам̣ пат̣имантетха. тумхе тена пан̣д̣итатара̄ ча бйаттатара̄ ча бахуссутатара̄ ча аламаттатара̄ ча. ма̄ часса бха̄йиттха. майампи тумха̄кам̣ паккха̄ бхависса̄ма̄’ти. тена ануппанна̄ни чева бхан̣д̣ана̄ни уппаджджанти, уппанна̄ни ча бхан̣д̣ана̄ни бхиййобха̄ва̄йа вепулла̄йа сам̣ваттанти. йади сан̇гхасса паттакаллам̣, сан̇гхо пан̣д̣укалохитака̄нам̣ бхиккхӯнам̣ таджджанӣйакаммам̣ кареййа. еса̄ н̃атти.

‘‘сун̣а̄ту ме, бханте, сан̇гхо. име пан̣д̣укалохитака̄ бхиккхӯ аттана̄ бхан̣д̣анака̄рака̄…пе… сан̇гхе адхикаран̣ака̄рака̄, йепи чан̃н̃е бхиккхӯ бхан̣д̣анака̄рака̄…пе… сан̇гхе адхикаран̣ака̄рака̄ те упасан̇камитва̄ евам̣ ваданти – ‘ма̄ кхо тумхе, а̄йасманто, есо аджеси. балава̄балавам̣ пат̣имантетха. тумхе тена пан̣д̣итатара̄ ча бйаттатара̄ ча бахуссутатара̄ ча аламаттатара̄ ча. ма̄ часса бха̄йиттха. майампи тумха̄кам̣ паккха̄ бхависса̄ма̄’ти. тена ануппанна̄ни чева бхан̣д̣ана̄ни уппаджджанти, уппанна̄ни ча бхан̣д̣ана̄ни бхиййобха̄ва̄йа вепулла̄йа сам̣ваттанти. сан̇гхо пан̣д̣укалохитака̄нам̣ бхиккхӯнам̣ таджджанӣйакаммам̣ кароти. йасса̄йасмато кхамати пан̣д̣укалохитака̄нам̣ бхиккхӯнам̣ таджджанӣйасса каммасса каран̣ам̣, со тун̣хасса; йасса наккхамати, со бха̄сеййа.

‘‘дутийампи етаматтхам̣ вада̄ми – сун̣а̄ту ме, бханте, сан̇гхо. име пан̣д̣укалохитака̄ бхиккхӯ аттана̄ бхан̣д̣анака̄рака̄…пе… сан̇гхе адхикаран̣ака̄рака̄, йепи чан̃н̃е бхиккхӯ бхан̣д̣анака̄рака̄…пе… сан̇гхе адхикаран̣ака̄рака̄ те упасан̇камитва̄ евам̣ ваданти – ‘ма̄ кхо тумхе, а̄йасманто, есо аджеси. балава̄балавам̣ пат̣имантетха. тумхе тена пан̣д̣итатара̄ ча бйаттатара̄ ча бахуссутатара̄ ча аламаттатара̄ ча. ма̄ часса бха̄йиттха. майампи тумха̄кам̣ паккха̄ бхависса̄ма̄’ти. тена ануппанна̄ни чева бхан̣д̣ана̄ни уппаджджанти, уппанна̄ни ча бхан̣д̣ана̄ни бхиййобха̄ва̄йа вепулла̄йа сам̣ваттанти. сан̇гхо пан̣д̣укалохитака̄нам̣ бхиккхӯнам̣ таджджанӣйакаммам̣ кароти. йасса̄йасмато кхамати пан̣д̣укалохитака̄нам̣ бхиккхӯнам̣ таджджанӣйасса каммасса каран̣ам̣, со тун̣хасса; йасса наккхамати, со бха̄сеййа.

‘‘татийампи етаматтхам̣ вада̄ми – сун̣а̄ту ме, бханте, сан̇гхо. име пан̣д̣укалохитака̄ бхиккхӯ аттана̄ бхан̣д̣анака̄рака̄…пе… сан̇гхе адхикаран̣ака̄рака̄, йепи чан̃н̃е бхиккхӯ бхан̣д̣анака̄рака̄…пе… сан̇гхе адхикаран̣ака̄рака̄ те упасан̇камитва̄ евам̣ ваданти – ‘ма̄ кхо тумхе, а̄йасманто, есо аджеси. балава̄балавам̣ пат̣имантетха. тумхе тена пан̣д̣итатара̄ ча бйаттатара̄ ча бахуссутатара̄ ча аламаттатара̄ ча. ма̄ часса бха̄йиттха. майампи тумха̄кам̣ паккха̄ бхависса̄ма̄’ти. тена ануппанна̄ни чева бхан̣д̣ана̄ни уппаджджанти, уппанна̄ни ча бхан̣д̣ана̄ни бхиййобха̄ва̄йа вепулла̄йа сам̣ваттанти. сан̇гхо пан̣д̣укалохитака̄нам̣ бхиккхӯнам̣ таджджанӣйакаммам̣ кароти. йасса̄йасмато кхамати пан̣д̣укалохитака̄нам̣ бхиккхӯнам̣ таджджанӣйасса каммасса каран̣ам̣, со тун̣хасса; йасса наккхамати, со бха̄сеййа.

‘‘катам̣ сан̇гхена пан̣д̣укалохитака̄нам̣ бхиккхӯнам̣ таджджанӣйакаммам̣. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.

адхаммакаммадва̄дасакам̣

4. ‘‘тӣхи, бхиккхаве, ан̇гехи саманна̄гатам̣ таджджанӣйакаммам̣ адхаммакамман̃ча [адхаммакамман̃чева (сйа̄.)] хоти, авинайакамман̃ча, дувӯпасантан̃ча. асаммукха̄ катам̣ хоти, аппат̣ипуччха̄ катам̣ хоти, аппат̣ин̃н̃а̄йа катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча. ана̄паттийа̄ катам̣ хоти, адесана̄га̄минийа̄ а̄паттийа̄ катам̣ хоти, десита̄йа а̄паттийа̄ катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча. ачодетва̄ катам̣ хоти, аса̄ретва̄ катам̣ хоти, а̄паттим̣ ана̄ропетва̄ катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча. асаммукха̄ катам̣ хоти, адхаммена катам̣ хоти, ваггена катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча. аппат̣ипуччха̄ катам̣ хоти, адхаммена катам̣ хоти, ваггена катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча. аппат̣ин̃н̃а̄йа катам̣ хоти, адхаммена катам̣ хоти, ваггена катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча. ана̄паттийа̄ катам̣ хоти, адхаммена катам̣ хоти, ваггена катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча. адесана̄га̄минийа̄ а̄паттийа̄ катам̣ хоти, адхаммена катам̣ хоти, ваггена катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча. десита̄йа а̄паттийа̄ катам̣ хоти, адхаммена катам̣ хоти, ваггена катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча. ачодетва̄ катам̣ хоти, адхаммена катам̣ хоти, ваггена катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча. аса̄ретва̄ катам̣ хоти, адхаммена катам̣ хоти, ваггена катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча. а̄паттим̣ ана̄ропетва̄ катам̣ хоти, адхаммена катам̣ хоти, ваггена катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ адхаммакамман̃ча хоти, авинайакамман̃ча, дувӯпасантан̃ча.

адхаммакаммадва̄дасакам̣ нит̣т̣хитам̣.

дхаммакаммадва̄дасакам̣

5. ‘‘тӣхи, бхиккхаве, ан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча. саммукха̄ катам̣ хоти, пат̣ипуччха̄ катам̣ хоти, пат̣ин̃н̃а̄йа катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча. а̄паттийа̄ катам̣ хоти, десана̄га̄минийа̄ а̄паттийа̄ катам̣ хоти, адесита̄йа а̄паттийа̄ катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча. чодетва̄ катам̣ хоти, са̄ретва̄ катам̣ хоти, а̄паттим̣ а̄ропетва̄ катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча. саммукха̄ катам̣ хоти, дхаммена катам̣ хоти, самаггена катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча. пат̣ипуччха̄ катам̣ хоти, дхаммена катам̣ хоти, самаггена катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча. пат̣ин̃н̃а̄йа катам̣ хоти, дхаммена катам̣ хоти, самаггена катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча. а̄паттийа̄ катам̣ хоти, дхаммена катам̣ хоти, самаггена катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча. десана̄га̄минийа̄ а̄паттийа̄ катам̣ хоти, дхаммена катам̣ хоти, самаггена катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча. адесита̄йа а̄паттийа̄ катам̣ хоти, дхаммена катам̣ хоти, самаггена катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча. чодетва̄ катам̣ хоти, дхаммена катам̣ хоти, самаггена катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча. са̄ретва̄ катам̣ хоти, дхаммена катам̣ хоти, самаггена катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча. а̄паттим̣ а̄ропетва̄ катам̣ хоти, дхаммена катам̣ хоти, самаггена катам̣ хоти – имехи кхо, бхиккхаве, тӣхан̇гехи саманна̄гатам̣ таджджанӣйакаммам̣ дхаммакамман̃ча хоти, винайакамман̃ча, сувӯпасантан̃ча.

дхаммакаммадва̄дасакам̣ нит̣т̣хитам̣.

а̄кан̇кхама̄начхаккам̣

6. [пари. 323] ‘‘тӣхи, бхиккхаве, ан̇гехи саманна̄гатасса бхиккхуно, а̄кан̇кхама̄но сан̇гхо, таджджанӣйакаммам̣ кареййа. бхан̣д̣анака̄рако хоти калахака̄рако вива̄дака̄рако бхассака̄рако сан̇гхе адхикаран̣ака̄рако; ба̄ло хоти абйатто а̄паттибахуло анапада̄но; гихисам̣сат̣т̣хо вихарати анануломикехи гихисам̣саггехи – имехи кхо, бхиккхаве, тӣхан̇гехи саманна̄гатасса бхиккхуно, а̄кан̇кхама̄но сан̇гхо, таджджанӣйакаммам̣ кареййа.

‘‘апарехипи, бхиккхаве, тӣхан̇гехи саманна̄гатасса бхиккхуно, а̄кан̇кхама̄но сан̇гхо, таджджанӣйакаммам̣ кареййа. адхисӣле сӣлавипанно хоти, аджджха̄ча̄ре а̄ча̄равипанно хоти, атидит̣т̣хийа̄ дит̣т̣хивипанно хоти – имехи кхо, бхиккхаве, тӣхан̇гехи саманна̄гатасса бхиккхуно, а̄кан̇кхама̄но сан̇гхо, таджджанӣйакаммам̣ кареййа.

‘‘апарехипи, бхиккхаве, тӣхан̇гехи саманна̄гатасса бхиккхуно, а̄кан̇кхама̄но сан̇гхо, таджджанӣйакаммам̣ кареййа. буддхасса аван̣н̣ам̣ бха̄сати, дхаммасса аван̣н̣ам̣ бха̄сати, сан̇гхасса аван̣н̣ам̣ бха̄сати – имехи кхо, бхиккхаве, тӣхан̇гехи саманна̄гатасса бхиккхуно, а̄кан̇кхама̄но сан̇гхо, таджджанӣйакаммам̣ кареййа.

‘‘тин̣н̣ам̣, бхиккхаве, бхиккхӯнам̣, а̄кан̇кхама̄но сан̇гхо, таджджанӣйакаммам̣ кареййа. еко бхан̣д̣анака̄рако хоти калахака̄рако вива̄дака̄рако бхассака̄рако сан̇гхе адхикаран̣ака̄рако; еко ба̄ло хоти абйатто а̄паттибахуло анапада̄но; еко гихисам̣сат̣т̣хо вихарати анануломикехи гихисам̣саггехи – имесам̣ кхо, бхиккхаве, тин̣н̣ам̣ бхиккхӯнам̣, а̄кан̇кхама̄но сан̇гхо, таджджанӣйакаммам̣ кареййа.

‘‘апаресампи, бхиккхаве, тин̣н̣ам̣ бхиккхӯнам̣, а̄кан̇кхама̄но сан̇гхо, таджджанӣйакаммам̣ кареййа. еко адхисӣле сӣлавипанно хоти, еко аджджха̄ча̄ре а̄ча̄равипанно хоти, еко атидит̣т̣хийа̄ дит̣т̣хивипанно хоти – имесам̣ кхо, бхиккхаве, тин̣н̣ам̣ бхиккхӯнам̣, а̄кан̇кхама̄но сан̇гхо, таджджанӣйакаммам̣ кареййа.

‘‘апаресампи, бхиккхаве, тин̣н̣ам̣ бхиккхӯнам̣, а̄кан̇кхама̄но сан̇гхо, таджджанӣйакаммам̣ кареййа. еко буддхасса аван̣н̣ам̣ бха̄сати, еко дхаммасса аван̣н̣ам̣ бха̄сати, еко сан̇гхасса аван̣н̣ам̣ бха̄сати – имесам̣ кхо, бхиккхаве, тин̣н̣ам̣ бхиккхӯнам̣, а̄кан̇кхама̄но сан̇гхо, таджджанӣйакаммам̣ кареййа.

а̄кан̇кхама̄начхаккам̣ нит̣т̣хитам̣.

ат̣т̣ха̄расаваттам̣

7. ‘‘таджджанӣйакаммакатена, бхиккхаве, бхиккхуна̄ самма̄ ваттитаббам̣. татра̄йам̣ самма̄ваттана̄ – на упасампа̄детаббам̣, на ниссайо да̄таббо, на са̄ман̣еро упат̣т̣ха̄петаббо, на бхиккхунова̄дакасаммути [саммати (сйа̄.)] са̄дитабба̄, самматенапи бхиккхунийо на овадитабба̄. йа̄йа а̄паттийа̄ сан̇гхена таджджанӣйакаммам̣ катам̣ хоти са̄ а̄патти на а̄паджджитабба̄, ан̃н̃а̄ ва̄ та̄дисика̄, тато ва̄ па̄пит̣т̣хатара̄; каммам̣ на гарахитаббам̣, каммика̄ на гарахитабба̄. на пакататтасса бхиккхуно упосатхо т̣хапетаббо, на пава̄ран̣а̄ т̣хапетабба̄, на савачанӣйам̣ ка̄таббам̣, на анува̄до пат̣т̣хапетаббо, на ока̄со ка̄ретаббо, на чодетаббо, на са̄ретаббо, на бхиккхӯхи [на бхиккхӯ бхиккхӯхи (сйа̄.)] сампайоджетабба’’нти.

таджджанӣйакамме ат̣т̣ха̄расаваттам̣ нит̣т̣хитам̣.

наппат̣иппассамбхетаббаат̣т̣ха̄расакам̣

8. атха кхо сан̇гхо пан̣д̣укалохитака̄нам̣ бхиккхӯнам̣ таджджанӣйакаммам̣ ака̄си. те сан̇гхена таджджанӣйакаммаката̄ самма̄ ваттанти, ломам̣ па̄тенти, неттха̄рам̣ ваттанти, бхиккхӯ упасан̇камитва̄ евам̣ ваданти – ‘‘майам̣, а̄вусо, сан̇гхена таджджанӣйакаммаката̄ самма̄ ватта̄ма, ломам̣ па̄тема, неттха̄рам̣ ватта̄ма, катхам̣ ну кхо амхехи пат̣ипаджджитабба’’нти? бхиккхӯ бхагавато етаматтхам̣ а̄рочесум̣…пе…. ‘‘тена хи, бхиккхаве, сан̇гхо пан̣д̣укалохитака̄нам̣ бхиккхӯнам̣ таджджанӣйакаммам̣ пат̣иппассамбхету.

пан̃чахи, бхиккхаве, ан̇гехи саманна̄гатасса бхиккхуно таджджанӣйакаммам̣ наппат̣иппассамбхетаббам̣. упасампа̄дети, ниссайам̣ дети, са̄ман̣ерам̣ упат̣т̣ха̄пети, бхиккхунова̄дакасаммутим̣ са̄дийати, самматопи бхиккхунийо овадати – имехи кхо, бхиккхаве, пан̃чахан̇гехи саманна̄гатасса бхиккхуно таджджанӣйакаммам̣ наппат̣иппассамбхетаббам̣.

[пари. 420] ‘‘апарехипи, бхиккхаве, пан̃чахан̇гехи саманна̄гатасса бхиккхуно таджджанӣйакаммам̣ наппат̣иппассамбхетаббам̣. йа̄йа а̄паттийа̄ сан̇гхена таджджанӣйакаммам̣ катам̣ хоти там̣ а̄паттим̣ а̄паджджати, ан̃н̃ам̣ ва̄ та̄дисикам̣, тато ва̄ па̄пит̣т̣хатарам̣; каммам̣ гарахати, каммике гарахати – имехи кхо, бхиккхаве, пан̃чахан̇гехи саманна̄гатасса бхиккхуно таджджанӣйакаммам̣ наппат̣иппассамбхетаббам̣.

‘‘ат̣т̣хахи, бхиккхаве, ан̇гехи саманна̄гатасса бхиккхуно таджджанӣйакаммам̣ наппат̣иппассамбхетаббам̣. пакататтасса бхиккхуно упосатхам̣ т̣хапети, пава̄ран̣ам̣ т̣хапети, савачанӣйам̣ кароти, анува̄дам̣ пат̣т̣хапети, ока̄сам̣ ка̄рети, чодети, са̄рети, бхиккхӯхи сампайоджети [бхиккхӯ бхиккхӯхи сампайоджети (сйа̄.)] – имехи кхо, бхиккхаве, ат̣т̣хахан̇гехи саманна̄гатасса бхиккхуно таджджанӣйакаммам̣ наппат̣иппассамбхетаббам̣.

наппат̣иппассамбхетаббаат̣т̣ха̄расакам̣ нит̣т̣хитам̣.

пат̣иппассамбхетаббаат̣т̣ха̄расакам̣

9. ‘‘пан̃чахи, бхиккхаве, ан̇гехи саманна̄гатасса бхиккхуно таджджанӣйакаммам̣ пат̣иппассамбхетаббам̣. на упасампа̄дети, на ниссайам̣ дети, на са̄ман̣ерам̣ упат̣т̣ха̄пети, на бхиккхунова̄дакасаммутим̣ са̄дийати, самматопи бхиккхунийо на овадати – имехи кхо, бхиккхаве, пан̃чахан̇гехи саманна̄гатасса бхиккхуно таджджанӣйакаммам̣ пат̣иппассамбхетаббам̣.

‘‘апарехипи, бхиккхаве, пан̃чахан̇гехи саманна̄гатасса бхиккхуно таджджанӣйакаммам̣ пат̣иппассамбхетаббам̣. йа̄йа а̄паттийа̄ сан̇гхена таджджанӣйакаммам̣ катам̣ хоти там̣ а̄паттим̣ на а̄паджджати, ан̃н̃ам̣ ва̄ та̄дисикам̣, тато ва̄ па̄пит̣т̣хатарам̣; каммам̣ на гарахати, каммике на гарахати – имехи кхо, бхиккхаве, пан̃чахан̇гехи саманна̄гатасса бхиккхуно таджджанӣйакаммам̣ пат̣иппассамбхетаббам̣.

‘‘ат̣т̣хахи, бхиккхаве, ан̇гехи саманна̄гатасса бхиккхуно таджджанӣйакаммам̣ пат̣иппассамбхетаббам̣.

на пакататтасса бхиккхуно упосатхам̣ т̣хапети, на пава̄ран̣ам̣ т̣хапети, на савачанӣйам̣ кароти, на анува̄дам̣ пат̣т̣хапети, на ока̄сам̣ ка̄рети, на чодети, на са̄рети, на бхиккхӯхи сампайоджети – имехи кхо, бхиккхаве, ат̣т̣хахан̇гехи саманна̄гатасса бхиккхуно, таджджанӣйакаммам̣ пат̣иппассамбхетаббам̣.

пат̣иппассамбхетаббаат̣т̣ха̄расакам̣ нит̣т̣хитам̣.

10. ‘‘еван̃ча пана, бхиккхаве, пат̣иппассамбхетаббам̣. техи, бхиккхаве, пан̣д̣укалохитакехи бхиккхӯхи сан̇гхам̣ упасан̇камитва̄ екам̣сам̣ уттара̄сан̇гам̣ каритва̄ вуд̣д̣ха̄нам̣ бхиккхӯнам̣ па̄де вандитва̄ уккут̣икам̣ нисӣдитва̄ ан̃джалим̣ паггахетва̄ евамасса вачанӣйо – ‘майам̣, бханте, сан̇гхена таджджанӣйакаммаката̄ самма̄ ватта̄ма, ломам̣ па̄тема, неттха̄рам̣ ватта̄ма, таджджанӣйасса каммасса пат̣иппассаддхим̣ йа̄ча̄ма̄’ти. дутийампи йа̄читабба̄. татийампи йа̄читабба̄. бйаттена бхиккхуна̄ пат̣ибалена сан̇гхо н̃а̄петаббо –

‘‘сун̣а̄ту ме, бханте, сан̇гхо. име пан̣д̣укалохитака̄ бхиккхӯ сан̇гхена таджджанӣйакаммаката̄ самма̄ ваттанти, ломам̣ па̄тенти, неттха̄рам̣ ваттанти, таджджанӣйасса каммасса пат̣иппассаддхим̣ йа̄чанти. йади сан̇гхасса паттакаллам̣, сан̇гхо пан̣д̣укалохитака̄нам̣ бхиккхӯнам̣ таджджанӣйакаммам̣ пат̣иппассамбхеййа. еса̄ н̃атти.

‘‘сун̣а̄ту ме, бханте, сан̇гхо. име пан̣д̣укалохитака̄ бхиккхӯ сан̇гхена таджджанӣйакаммаката̄ самма̄ ваттанти, ломам̣ па̄тенти, неттха̄рам̣ ваттанти, таджджанӣйасса каммасса пат̣иппассаддхим̣ йа̄чанти. сан̇гхо пан̣д̣укалохитака̄нам̣ бхиккхӯнам̣ таджджанӣйакаммам̣ пат̣иппассамбхети. йасса̄йасмато кхамати пан̣д̣укалохитака̄нам̣ бхиккхӯнам̣ таджджанӣйасса каммасса пат̣иппассаддхи, со тун̣хасса; йасса наккхамати, со бха̄сеййа.

‘‘дутийампи етаматтхам̣ вада̄ми – сун̣а̄ту ме, бханте, сан̇гхо. име пан̣д̣укалохитака̄ бхиккхӯ сан̇гхена таджджанӣйакаммаката̄ самма̄ ваттанти, ломам̣ па̄тенти, неттха̄рам̣ ваттанти, таджджанӣйасса каммасса пат̣иппассаддхим̣ йа̄чанти. сан̇гхо пан̣д̣укалохитака̄нам̣ бхиккхӯнам̣ таджджанӣйакаммам̣ пат̣иппассамбхети. йасса̄йасмато кхамати пан̣д̣укалохитака̄нам̣ бхиккхӯнам̣ таджджанӣйасса каммасса пат̣иппассаддхи, со тун̣хасса; йасса наккхамати, со бха̄сеййа.

‘‘татийампи етаматтхам̣ вада̄ми – сун̣а̄ту ме, бханте, сан̇гхо. име пан̣д̣укалохитака̄ бхиккхӯ сан̇гхена таджджанӣйакаммаката̄ самма̄ ваттанти, ломам̣ па̄тенти, неттха̄рам̣ ваттанти, таджджанӣйасса каммасса пат̣иппассаддхим̣ йа̄чанти. сан̇гхо пан̣д̣укалохитака̄нам̣ бхиккхӯнам̣ таджджанӣйакаммам̣ пат̣иппассамбхети. йасса̄йасмато кхамати пан̣д̣укалохитака̄нам̣ бхиккхӯнам̣ таджджанӣйасса каммасса пат̣иппассаддхи, со тун̣хасса; йасса наккхамати, со бха̄сеййа.

‘‘пат̣иппассаддхам̣ сан̇гхена пан̣д̣укалохитака̄нам̣ бхиккхӯнам̣ таджджанӣйакаммам̣. кхамати сан̇гхасса,

тасма̄ тун̣хӣ, еваметам̣ дха̄райа̄мӣ’’ти.

таджджанӣйакаммам̣ нит̣т̣хитам̣ пат̣хамам̣.