2. нийассакаммам̣

11. тена кхо пана самайена а̄йасма̄ сеййасако ба̄ло хоти абйатто а̄паттибахуло анапада̄но; гихисам̣сат̣т̣хо вихарати анануломикехи гихисам̣саггехи; аписсу бхиккхӯ паката̄ [пакататта̄ (сӣ. сйа̄.)] парива̄сам̣ дента̄ мӯла̄йа пат̣икассанта̄ ма̄наттам̣ дента̄ аббхента̄. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма а̄йасма̄ сеййасако ба̄ло бхависсати абйатто а̄паттибахуло анапада̄но; гихисам̣сат̣т̣хо вихариссати анануломикехи гихисам̣саггехи; аписсу бхиккхӯ паката̄ парива̄сам̣ дента̄ мӯла̄йа пат̣икассанта̄ ма̄наттам̣ дента̄ аббхента̄’’ти. атха кхо те бхиккхӯ бхагавато етаматтхам̣ а̄рочесум̣.

атха кхо бхагава̄ етасмим̣ нида̄не етасмим̣ пакаран̣е бхиккхусан̇гхам̣ саннипа̄та̄петва̄ бхиккхӯ пат̣ипуччхи – ‘‘саччам̣ кира, бхиккхаве, сеййасако бхиккху ба̄ло абйатто а̄паттибахуло анапада̄но; гихисам̣сат̣т̣хо вихарати анануломикехи гихисам̣саггехи; аписсу бхиккхӯ паката̄ парива̄сам̣ дента̄ мӯла̄йа пат̣икассанта̄ ма̄наттам̣ дента̄ аббхента̄’’ти? ‘‘саччам̣ бхагава̄’’ти. вигарахи буддхо бхагава̄ – ‘‘анануччхавикам̣, бхиккхаве, тасса могхапурисасса анануломикам̣ аппатирӯпам̣ асса̄ман̣акам̣ акаппийам̣ акаран̣ӣйам̣. катхан̃хи на̄ма со, бхиккхаве, могхапурисо ба̄ло бхависсати абйатто а̄паттибахуло анапада̄но; гихисам̣сат̣т̣хо вихариссати анануломикехи гихисам̣саггехи; аписсу бхиккхӯ паката̄ парива̄сам̣ дента̄ мӯла̄йа пат̣икассанта̄ ма̄наттам̣ дента̄ аббхента̄. нетам̣, бхиккхаве, аппасанна̄нам̣ ва̄ паса̄да̄йа…пе… вигарахитва̄…пе… дхаммим̣ катхам̣ катва̄ бхиккхӯ а̄мантеси – ‘‘тена хи, бхиккхаве, сан̇гхо сеййасакасса бхиккхуно нийассакаммам̣ [нийасакаммам̣ (ка.)] кароту – нисса̄йа те ваттхаббанти. еван̃ча пана, бхиккхаве, ка̄таббам̣. пат̣хамам̣ сеййасако бхиккху чодетаббо, чодетва̄ са̄ретаббо, са̄ретва̄ а̄паттим̣ а̄ропетаббо [а̄патти а̄ропетабба̄ (сӣ. сйа̄.)], а̄паттим̣ а̄ропетва̄ бйаттена бхиккхуна̄ пат̣ибалена сан̇гхо н̃а̄петаббо –

12. ‘‘сун̣а̄ту ме, бханте, сан̇гхо. айам̣ сеййасако бхиккху ба̄ло абйатто а̄паттибахуло анапада̄но; гихисам̣сат̣т̣хо вихарати анануломикехи гихисам̣саггехи; аписсу бхиккхӯ паката̄ парива̄сам̣ дента̄ мӯла̄йа пат̣икассанта̄ ма̄наттам̣ дента̄ аббхента̄. йади сан̇гхасса паттакаллам̣, сан̇гхо сеййасакасса бхиккхуно нийассакаммам̣ кареййа – нисса̄йа те ваттхаббанти. еса̄ н̃атти.

‘‘сун̣а̄ту ме, бханте, сан̇гхо. айам̣ сеййасако бхиккху ба̄ло абйатто а̄паттибахуло анапада̄но; гихисам̣сат̣т̣хо вихарати анануломикехи гихисам̣саггехи; аписсу бхиккхӯ паката̄ парива̄сам̣ дента̄ мӯла̄йа пат̣икассанта̄ ма̄наттам̣ дента̄ аббхента̄. сан̇гхо сеййасакасса бхиккхуно нийассакаммам̣ кароти – нисса̄йа те ваттхаббанти. йасса̄йасмато кхамати сеййасакасса бхиккхуно нийассасса каммасса каран̣ам̣ – нисса̄йа те ваттхаббанти, со тун̣хасса; йасса наккхамати, со бха̄сеййа.

‘‘дутийампи етаматтхам̣ вада̄ми…пе… татийампи етаматтхам̣ вада̄ми – сун̣а̄ту ме, бханте, сан̇гхо. айам̣ сеййасако бхиккху ба̄ло абйатто а̄паттибахуло анапада̄но; гихисам̣сат̣т̣хо вихарати анануломикехи гихисам̣саггехи; аписсу бхиккхӯ паката̄ парива̄сам̣ дента̄ мӯла̄йа пат̣икассанта̄ ма̄наттам̣ дента̄ аббхента̄. сан̇гхо сеййасакасса бхиккхуно нийассакаммам̣ кароти – нисса̄йа те ваттхаббанти. йасса̄йасмато кхамати сеййасакасса бхиккхуно нийассасса каммасса каран̣ам̣ – нисса̄йа те ваттхаббанти, со тун̣хасса; йасса наккхамати, со бха̄сеййа.

‘‘катам̣ сан̇гхена сеййасакасса бхиккхуно нийассакаммам̣ – нисса̄йа те ваттхаббанти. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.

адхаммакаммадва̄дасакам̣

13. ‘‘тӣхи, бхиккхаве, ан̇гехи саманна̄гатам̣ нийассакаммам̣ адхаммакамман̃ча хоти, авинайакамман̃ча, дувӯпасантан̃ча. асаммукха̄ катам̣ хоти, аппат̣ипуччха̄ катам̣ хоти, аппат̣ин̃н̃а̄йа катам̣ хоти – имехи кхо, бхиккхаве, тӣхан̇гехи саманна̄гатам̣ нийассакаммам̣ адхаммакамман̃ча хоти, авинайакамман̃ча, дувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ нийассакаммам̣ адхаммакамман̃ча хоти, авинайакамман̃ча, дувӯпасантан̃ча. ана̄паттийа̄ катам̣ хоти, адесана̄га̄минийа̄ а̄паттийа̄ катам̣ хоти, десита̄йа а̄паттийа̄ катам̣ хоти – имехи кхо, бхиккхаве, тӣхан̇гехи саманна̄гатам̣ нийассакаммам̣ адхаммакамман̃ча хоти, авинайакамман̃ча, дувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ нийассакаммам̣ адхаммакамман̃ча хоти, авинайакамман̃ча, дувӯпасантан̃ча. ачодетва̄ катам̣ хоти, аса̄ретва̄ катам̣ хоти, а̄паттим̣ ана̄ропетва̄ катам̣ хоти – имехи кхо, бхиккхаве, тӣхан̇гехи саманна̄гатам̣ нийассакаммам̣ адхаммакамман̃ча хоти, авинайакамман̃ча, дувӯпасантан̃ча.

‘‘апарехипи, бхиккхаве…пе… асаммукха̄ катам̣ хоти, адхаммена катам̣ хоти, ваггена катам̣ хоти – имехи кхо, бхиккхаве…пе….

‘‘апарехипи, бхиккхаве…пе… аппат̣ипуччха̄ катам̣ хоти, адхаммена катам̣ хоти, ваггена катам̣ хоти – имехи кхо, бхиккхаве…пе….

‘‘апарехипи, бхиккхаве…пе… аппат̣ин̃н̃а̄йа катам̣ хоти, адхаммена катам̣ хоти, ваггена катам̣ хоти – имехи кхо, бхиккхаве…пе….

‘‘апарехипи, бхиккхаве…пе… ана̄паттийа̄ катам̣ хоти, адхаммена катам̣ хоти, ваггена катам̣ хоти – имехи кхо, бхиккхаве…пе….

‘‘апарехипи, бхиккхаве…пе… адесана̄га̄минийа̄ а̄паттийа̄ катам̣ хоти, адхаммена катам̣ хоти, ваггена катам̣ хоти – имехи кхо, бхиккхаве…пе….

‘‘апарехипи, бхиккхаве…пе… десита̄йа а̄паттийа̄ катам̣ хоти, адхаммена катам̣ хоти, ваггена катам̣ хоти – имехи кхо, бхиккхаве…пе….

‘‘апарехипи, бхиккхаве…пе… ачодетва̄ катам̣ хоти, адхаммена катам̣ хоти, ваггена катам̣ хоти – имехи кхо, бхиккхаве…пе….

‘‘апарехипи, бхиккхаве…пе… аса̄ретва̄ катам̣ хоти, адхаммена катам̣ хоти, ваггена катам̣ хоти – имехи кхо, бхиккхаве…пе….

‘‘апарехипи, бхиккхаве, тӣхан̇гехи саманна̄гатам̣ нийассакаммам̣ адхаммакамман̃ча хоти, авинайакамман̃ча, дувӯпасантан̃ча. а̄паттим̣ ана̄ропетва̄ катам̣ хоти, адхаммена катам̣ хоти, ваггена катам̣ хоти – имехи кхо, бхиккхаве, тӣхан̇гехи саманна̄гатам̣ нийассакаммам̣ адхаммакамман̃ча хоти, авинайакамман̃ча, дувӯпасантан̃ча.

адхаммакаммадва̄дасакам̣ нит̣т̣хитам̣.

дхаммакаммадва̄дасакам̣

14. ‘‘тӣхи, бхиккхаве, ан̇гехи саманна̄гатам̣ нийассакаммам̣ дхаммакамман̃ча хоти, винайакамман̃ча, сувӯпасантан̃ча. саммукха̄ катам̣ хоти, пат̣ипуччха̄ катам̣ хоти, пат̣ин̃н̃а̄йа катам̣ хоти – имехи кхо, бхиккхаве, тӣхан̇гехи саманна̄гатам̣ нийассакаммам̣ дхаммакамман̃ча хоти, винайакамман̃ча, сувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ нийассакаммам̣ дхаммакамман̃ча хоти, винайакамман̃ча, сувӯпасантан̃ча. а̄паттийа̄ катам̣ хоти, десана̄га̄минийа̄ а̄паттийа̄ катам̣ хоти, адесита̄йа а̄паттийа̄ катам̣ хоти – имехи кхо, бхиккхаве, тӣхан̇гехи саманна̄гатам̣ нийассакаммам̣ дхаммакамман̃ча хоти, винайакамман̃ча, сувӯпасантан̃ча.

‘‘апарехипи, бхиккхаве, тӣхан̇гехи саманна̄гатам̣ нийассакаммам̣ дхаммакамман̃ча хоти, винайакамман̃ча, сувӯпасантан̃ча. чодетва̄ катам̣ хоти, са̄ретва̄ катам̣ хоти, а̄паттим̣ а̄ропетва̄ катам̣ хоти – имехи кхо, бхиккхаве, тӣхан̇гехи саманна̄гатам̣ нийассакаммам̣ дхаммакамман̃ча хоти, винайакамман̃ча, сувӯпасантан̃ча.

‘‘апарехипи, бхиккхаве…пе… саммукха̄ катам̣ хоти, дхаммена катам̣ хоти, самаггена катам̣ хоти – имехи кхо, бхиккхаве…пе….

‘‘апарехипи, бхиккхаве…пе… пат̣ипуччха̄ катам̣ хоти, дхаммена катам̣ хоти, самаггена катам̣ хоти – имехи кхо, бхиккхаве…пе….

‘‘апарехипи, бхиккхаве…пе… пат̣ин̃н̃а̄йа катам̣ хоти, дхаммена катам̣ хоти, самаггена катам̣ хоти – имехи кхо, бхиккхаве…пе….

‘‘апарехипи, бхиккхаве…пе… а̄паттийа̄ катам̣ хоти, дхаммена катам̣ хоти, самаггена катам̣ хоти – имехи кхо, бхиккхаве…пе….

‘‘апарехипи, бхиккхаве…пе… десана̄га̄минийа̄ а̄паттийа̄ катам̣ хоти, дхаммена катам̣ хоти, самаггена катам̣ хоти – имехи кхо, бхиккхаве…пе….

‘‘апарехипи, бхиккхаве…пе… адесита̄йа а̄паттийа̄ катам̣ хоти, дхаммена катам̣ хоти, самаггена катам̣ хоти – имехи кхо, бхиккхаве…пе….

‘‘апарехипи, бхиккхаве…пе… чодетва̄ катам̣ хоти, дхаммена катам̣ хоти, самаггена катам̣ хоти – имехи кхо, бхиккхаве…пе….

‘‘апарехипи, бхиккхаве…пе… са̄ретва̄ катам̣ хоти, дхаммена катам̣ хоти, самаггена катам̣ хоти – имехи кхо, бхиккхаве…пе….

‘‘апарехипи, бхиккхаве, тӣхан̇гехи саманна̄гатам̣ нийассакаммам̣ дхаммакамман̃ча хоти, винайакамман̃ча, сувӯпасантан̃ча. а̄паттим̣ а̄ропетва̄ катам̣ хоти, дхаммена катам̣ хоти, самаггена катам̣ хоти – имехи кхо, бхиккхаве, тӣхан̇гехи саманна̄гатам̣ нийассакаммам̣ дхаммакамман̃ча хоти, винайакамман̃ча, сувӯпасантан̃ча.

дхаммакаммадва̄дасакам̣ нит̣т̣хитам̣.

а̄кан̇кхама̄начхаккам̣

15. [пари. 323] ‘‘тӣхи, бхиккхаве, ан̇гехи саманна̄гатасса бхиккхуно, а̄кан̇кхама̄но сан̇гхо, нийассакаммам̣ кареййа. бхан̣д̣анака̄рако хоти калахака̄рако вива̄дака̄рако бхассака̄рако сан̇гхе адхикаран̣ака̄рако; ба̄ло хоти абйатто а̄паттибахуло анапада̄но; гихисам̣сат̣т̣хо вихарати анануломикехи гихисам̣саггехи – имехи кхо, бхиккхаве, тӣхан̇гехи саманна̄гатасса бхиккхуно, а̄кан̇кхама̄но сан̇гхо, нийассакаммам̣ кареййа.

‘‘апарехипи, бхиккхаве, тӣхан̇гехи саманна̄гатасса бхиккхуно, а̄кан̇кхама̄но сан̇гхо, нийассакаммам̣ кареййа. адхисӣле сӣлавипанно хоти, аджджха̄ча̄ре а̄ча̄равипанно хоти, атидит̣т̣хийа̄ дит̣т̣хивипанно хоти – имехи кхо, бхиккхаве, тӣхан̇гехи саманна̄гатасса бхиккхуно, а̄кан̇кхама̄но сан̇гхо, нийассакаммам̣ кареййа.

‘‘апарехипи, бхиккхаве, тӣхан̇гехи саманна̄гатасса бхиккхуно, а̄кан̇кхама̄но сан̇гхо, нийассакаммам̣ кареййа. буддхасса аван̣н̣ам̣ бха̄сати, дхаммасса аван̣н̣ам̣ бха̄сати, сан̇гхасса аван̣н̣ам̣ бха̄сати – имехи кхо, бхиккхаве, тӣхан̇гехи саманна̄гатасса бхиккхуно, а̄кан̇кхама̄но сан̇гхо, нийассакаммам̣ кареййа.

‘‘тин̣н̣ам̣, бхиккхаве, бхиккхӯнам̣, а̄кан̇кхама̄но сан̇гхо, нийассакаммам̣ кареййа. еко бхан̣д̣анака̄рако хоти калахака̄рако вива̄дака̄рако бхассака̄рако сан̇гхе адхикаран̣ака̄рако; еко ба̄ло хоти, абйатто а̄паттибахуло анапада̄но; еко гихисам̣сат̣т̣хо вихарати анануломикехи гихисам̣саггехи – имесам̣ кхо, бхиккхаве, тин̣н̣ам̣ бхиккхӯнам̣, а̄кан̇кхама̄но сан̇гхо, нийассакаммам̣ кареййа.

‘‘апаресампи, бхиккхаве, тин̣н̣ам̣ бхиккхӯнам̣, а̄кан̇кхама̄но сан̇гхо, нийассакаммам̣ кареййа. еко адхисӣле сӣлавипанно хоти, еко аджджха̄ча̄ре а̄ча̄равипанно хоти, еко атидит̣т̣хийа̄ дит̣т̣хивипанно хоти – имесам̣ кхо, бхиккхаве, тин̣н̣ам̣ бхиккхӯнам̣, а̄кан̇кхама̄но сан̇гхо, нийассакаммам̣ кареййа.

‘‘апаресампи, бхиккхаве, тин̣н̣ам̣ бхиккхӯнам̣, а̄кан̇кхама̄но сан̇гхо, нийассакаммам̣ кареййа. еко буддхасса аван̣н̣ам̣ бха̄сати, еко дхаммасса аван̣н̣ам̣ бха̄сати, еко сан̇гхасса аван̣н̣ам̣ бха̄сати – имесам̣ кхо, бхиккхаве, тин̣н̣ам̣ бхиккхӯнам̣, а̄кан̇кхама̄но сан̇гхо, нийассакаммам̣ кареййа.

а̄кан̇кхама̄начхаккам̣ нит̣т̣хитам̣.

ат̣т̣ха̄расаваттам̣

16. ‘‘нийассакаммакатена, бхиккхаве, бхиккхуна̄ самма̄ ваттитаббам̣. татра̄йам̣ самма̄ваттана̄ – на упасампа̄детаббам̣, на ниссайо да̄таббо, на са̄ман̣еро упат̣т̣ха̄петаббо, на бхиккхунова̄дакасаммути са̄дитабба̄, самматенапи бхиккхунийо на овадитабба̄. йа̄йа а̄паттийа̄ сан̇гхена нийассакаммам̣ катам̣ хоти са̄ а̄патти на а̄паджджитабба̄, ан̃н̃а̄ ва̄ та̄дисика̄, тато ва̄ па̄пит̣т̣хатара̄; каммам̣ на гарахитаббам̣, каммика̄ на гарахитабба̄. на пакататтасса бхиккхуно упосатхо т̣хапетаббо, на пава̄ран̣а̄ т̣хапетабба̄, на савачанӣйам̣ ка̄таббам̣, на анува̄до пат̣т̣хапетаббо, на ока̄со ка̄ра̄петаббо, на чодетаббо, на са̄ретаббо, на бхиккхӯхи сампайоджетабба’’нти.

нийассакамме ат̣т̣ха̄расаваттам̣ нит̣т̣хитам̣.

17. атха кхо сан̇гхо сеййасакасса бхиккхуно нийассакаммам̣ ака̄си – нисса̄йа те ваттхаббанти. со сан̇гхена нийассакаммакато калйа̄н̣амитте севама̄но бхаджама̄но пайирупа̄сама̄но уддиса̄пенто парипуччханто бахуссуто хоти, а̄гата̄гамо дхаммадхаро винайадхаро ма̄тика̄дхаро пан̣д̣ито вийатто медха̄вӣ ладжджӣ куккуччако сиккха̄ка̄мо. самма̄ ваттати, ломам̣ па̄тети, неттха̄рам̣ ваттати, бхиккхӯ упасан̇камитва̄ евам̣ вадети – ‘‘ахам̣, а̄вусо, сан̇гхена нийассакаммакато самма̄ ватта̄ми, ломам̣ па̄теми, неттха̄рам̣ ватта̄ми. катхам̣ ну кхо майа̄ пат̣ипаджджитабба’’нти? бхиккхӯ бхагавато етаматтхам̣ а̄рочесум̣…пе…. ‘‘тена хи, бхиккхаве, сан̇гхо сеййасакасса бхиккхуно нийассакаммам̣ пат̣иппассамбхету.

наппат̣иппассамбхетаббаат̣т̣ха̄расакам̣

18. ‘‘пан̃чахи, бхиккхаве, ан̇гехи саманна̄гатасса бхиккхуно нийассакаммам̣ наппат̣иппассамбхетаббам̣. упасампа̄дети, ниссайам̣ дети, са̄ман̣ерам̣ упат̣т̣ха̄пети, бхиккхунова̄дакасаммутим̣ са̄дийати, самматопи бхиккхунийо овадати – имехи кхо, бхиккхаве, пан̃чахан̇гехи саманна̄гатасса бхиккхуно нийассакаммам̣ наппат̣иппассамбхетаббам̣.

[пари. 420] ‘‘апарехипи, бхиккхаве, пан̃чахан̇гехи саманна̄гатасса бхиккхуно нийассакаммам̣ наппат̣иппассамбхетаббам̣. йа̄йа а̄паттийа̄ сан̇гхена нийассакаммам̣ катам̣ хоти там̣ а̄паттим̣ а̄паджджати, ан̃н̃ам̣ ва̄ та̄дисикам̣, тато ва̄ па̄пит̣т̣хатарам̣; каммам̣ гарахати, каммике гарахати – имехи кхо, бхиккхаве, пан̃чахан̇гехи саманна̄гатасса бхиккхуно нийассакаммам̣ наппат̣иппассамбхетаббам̣.

‘‘ат̣т̣хахи, бхиккхаве, ан̇гехи саманна̄гатасса бхиккхуно нийассакаммам̣ наппат̣иппассамбхетаббам̣. пакататтасса бхиккхуно упосатхам̣ т̣хапети, пава̄ран̣ам̣ т̣хапети, савачанӣйам̣ кароти, анува̄дам̣ пат̣т̣хапети, ока̄сам̣ ка̄рети, чодети, са̄рети, бхиккхӯхи сампайоджети – имехи кхо, бхиккхаве, ат̣т̣хахан̇гехи саманна̄гатасса бхиккхуно нийассакаммам̣ наппат̣иппассамбхетаббам̣.

наппат̣иппассамбхетаббаат̣т̣ха̄расакам̣ нит̣т̣хитам̣.

пат̣иппассамбхетаббаат̣т̣ха̄расакам̣

19. ‘‘пан̃чахи, бхиккхаве, ан̇гехи саманна̄гатасса бхиккхуно нийассакаммам̣ пат̣иппассамбхетаббам̣. на упасампа̄дети, на ниссайам̣ дети, на са̄ман̣ерам̣ упат̣т̣ха̄пети, на бхиккхунова̄дакасаммутим̣ са̄дийати, самматопи бхиккхунийо на овадати – имехи кхо, бхиккхаве, пан̃чахан̇гехи саманна̄гатасса бхиккхуно нийассакаммам̣ пат̣иппассамбхетаббам̣.

‘‘апарехипи, бхиккхаве, пан̃чахан̇гехи саманна̄гатасса бхиккхуно нийассакаммам̣ пат̣иппассамбхетаббам̣. йа̄йа а̄паттийа̄ сан̇гхена нийассакаммам̣ катам̣ хоти там̣ а̄паттим̣ на а̄паджджати, ан̃н̃ам̣ ва̄ та̄дисикам̣, тато ва̄ па̄пит̣т̣хатарам̣; каммам̣ на гарахати, каммике на гарахати – имехи кхо, бхиккхаве, пан̃чахан̇гехи саманна̄гатасса бхиккхуно нийассакаммам̣ пат̣иппассамбхетаббам̣.

‘‘ат̣т̣хахи, бхиккхаве, ан̇гехи саманна̄гатасса бхиккхуно нийассакаммам̣ пат̣иппассамбхетаббам̣.

на пакататтасса бхиккхуно упосатхам̣ т̣хапети, на пава̄ран̣ам̣ т̣хапети, на савачанӣйам̣ кароти, на анува̄дам̣ пат̣т̣хапети, на ока̄сам̣ ка̄рети, на чодети, на са̄рети, на бхиккхӯхи сампайоджети – имехи кхо, бхиккхаве, ат̣т̣хахан̇гехи саманна̄гатасса бхиккхуно нийассакаммам̣ пат̣иппассамбхетаббам̣.

пат̣иппассамбхетаббаат̣т̣ха̄расакам̣ нит̣т̣хитам̣.

20. ‘‘еван̃ча пана, бхиккхаве, пат̣иппассамбхетаббам̣. тена, бхиккхаве, сеййасакена бхиккхуна̄ сан̇гхам̣ упасан̇камитва̄ екам̣сам̣ уттара̄сан̇гам̣ каритва̄ вуд̣д̣ха̄нам̣ бхиккхӯнам̣ па̄де вандитва̄ уккут̣икам̣ нисӣдитва̄ ан̃джалим̣ паггахетва̄ евамасса вачанӣйо – ‘ахам̣, бханте, сан̇гхена нийассакаммакато самма̄ ватта̄ми, ломам̣ па̄теми, неттха̄рам̣ ватта̄ми, нийассасса каммасса пат̣иппассаддхим̣ йа̄ча̄мӣ’ти. дутийампи йа̄читабба̄. татийампи йа̄читабба̄. бйаттена бхиккхуна̄ пат̣ибалена сан̇гхо н̃а̄петаббо –

‘‘сун̣а̄ту ме, бханте, сан̇гхо. айам̣ сеййасако бхиккху сан̇гхена нийассакаммакато самма̄ ваттати, ломам̣ па̄тети, неттха̄рам̣ ваттати, нийассасса каммасса пат̣иппассаддхим̣ йа̄чати. йади сан̇гхасса паттакаллам̣, сан̇гхо сеййасакасса бхиккхуно нийассакаммам̣ пат̣иппассамбхеййа. еса̄ н̃атти.

‘‘сун̣а̄ту ме, бханте, сан̇гхо. айам̣ сеййасако бхиккху сан̇гхена нийассакаммакато самма̄ ваттати, ломам̣ па̄тети, неттха̄рам̣ ваттати, нийассасса каммасса пат̣иппассаддхим̣ йа̄чати. сан̇гхо сеййасакасса бхиккхуно нийассакаммам̣ пат̣иппассамбхети. йасса̄йасмато кхамати сеййасакасса бхиккхуно нийассасса каммасса пат̣иппассаддхи, со тун̣хасса; йасса наккхамати, со бха̄сеййа.

‘‘дутийампи етаматтхам̣ вада̄ми – сун̣а̄ту ме, бханте, сан̇гхо. айам̣ сеййасако бхиккху сан̇гхена нийассакаммакато самма̄ ваттати, ломам̣ па̄тети, неттха̄рам̣ ваттати, нийассасса каммасса пат̣иппассаддхим̣ йа̄чати. сан̇гхо сеййасакасса бхиккхуно нийассакаммам̣ пат̣иппассамбхети. йасса̄йасмато кхамати сеййасакасса бхиккхуно нийассасса каммасса пат̣иппассаддхи, со тун̣хасса; йасса наккхамати, со бха̄сеййа.

‘‘татийампи етаматтхам̣ вада̄ми – сун̣а̄ту ме, бханте, сан̇гхо. айам̣ сеййасако бхиккху сан̇гхена нийассакаммакато самма̄ ваттати, ломам̣ па̄тети, неттха̄рам̣ ваттати, нийассасса каммасса пат̣иппассаддхим̣ йа̄чати. сан̇гхо сеййасакасса бхиккхуно нийассакаммам̣ пат̣иппассамбхети. йасса̄йасмато кхамати сеййасакасса бхиккхуно нийассасса каммасса пат̣иппассаддхи, со тун̣хасса; йасса наккхамати, со бха̄сеййа.

‘‘пат̣иппассаддхам̣ сан̇гхена сеййасакасса бхиккхуно нийассакаммам̣. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.

нийассакаммам̣ нит̣т̣хитам̣ дутийам̣.