8. вибхаттиха̄расампа̄тавибха̄вана̄

70. йена йена а̄ват̣т̣аха̄расампа̄тена суттаттха̄ а̄ват̣т̣етабба̄, со а̄ват̣т̣аха̄расампа̄то парипун̣н̣о, ‘‘катамо вибхаттиха̄расампа̄то’’ти пуччхитаббатта̄ ‘‘таттха катамо вибхаттиха̄расампа̄то’’тиа̄ди вуттам̣. таттха катамо сам̣ван̣н̣ана̄висесо вибхаттиха̄расампа̄то на̄ма̄ти пуччхати.

‘‘катаме суттаттха̄ каттха вибхатта̄’’ти пуччхитаббатта̄ ‘‘тасма̄ раккхитачиттасса̄’’тиа̄ди вуттам̣. йа̄ ‘‘тасма̄…пе… гочаро’’ти га̄тха̄ вутта̄, тиссам̣ га̄тха̄йам̣ вутто кусалапаккхо дхаммо кусалапаккхена дхаммена сатисам̣варо дхаммо ниддиситаббо вибхаджитаббо, акусалапаккхена дхаммена ниддиситаббо вибхаджитаббо.

катхам̣? ‘‘раккхитачиттасса̄’’ти падена вутто кусалапаккхо сатисам̣варо дхаммо ‘‘чаккхудва̄расам̣варо…пе… манодва̄расам̣варо’’ти чхаббидхена кусалапаккхена дхаммена ниддиситаббо вибхаджитаббо. ‘‘самма̄сан̇каппо’’ти падена вутто кусалапаккхо самма̄сан̇каппо дхаммо ‘‘неккхаммасан̇каппо абйа̄па̄да-сан̇каппо авихим̣са̄сан̇каппо’’ти тивидхена кусалапаккхена дхаммена вибхаджитаббо. ‘‘самма̄дит̣т̣хипуреккха̄ро’’ти падена вутта̄ кусалапаккха̄ дхаммаджа̄ти ‘‘дуккхе н̃а̄н̣ам̣, дуккхасамудайе н̃а̄н̣ам̣, дуккханиродхе н̃а̄н̣ам̣, дуккханиродхага̄минипат̣ипада̄йа н̃а̄н̣ам̣, пуббанте н̃а̄н̣ам̣, апаранте н̃а̄н̣ам̣, пуббанта̄паранте н̃а̄н̣ам̣, идаппаччайата̄пат̣иччасамуппаннесу дхаммесу н̃а̄н̣а’’нти (дха. са. 1063) ат̣т̣хавидхена кусалапаккхена дхаммена вибхаджитабба̄. ‘‘н̃атва̄на удайаббайа’’нти падена вуттам̣ кусалапаккхаудайаббайан̃а̄н̣ам̣ дхаммаджа̄там̣ пан̃н̃а̄савидхена удайаббайан̃а̄н̣ена кусалапаккхена вибхаджитаббам̣. ‘‘тхинамиддха̄бхибхӯ’’ти падена вуттам̣ тхинамиддха̄бхибхаванам̣ кусалапаккхам̣ дхаммаджа̄там̣ ‘‘сота̄паттимагга̄бхибхаванам̣ сакада̄га̄мимагга̄бхибхаванам̣ ана̄га̄мимагга̄бхибхаванам̣ арахаттамагга̄бхибхавана’’нти чатуббидхена кусалапаккхена вибхаджитаббам̣.

сатисам̣варо кусалапаккхо ‘‘локийо сатисам̣варо, локуттаро сатисам̣варо’’ти дуббидхена вибхаджитабботи. локийо сатисам̣варо ка̄ма̄вачарова̄ти екавидхена вибхаджитаббо. локуттара̄ сатисам̣варо ‘‘дассанабхӯми, бха̄вана̄бхӯмӣ’’ти дуббидхена вибхаджитаббо. ка̄ма̄вачаро сатисам̣варо ‘‘ка̄йа̄нупассана̄сатисам̣варо ведана̄нупассана̄сатисам̣варо читта̄нупассана̄сатисам̣варо дхамма̄нупассана̄сатисам̣варо’’ти чатуббидхена вибхаджитаббо. локуттаро сатисам̣варопи татха̄ чатуббидхена вибхаджитаббо. самма̄сан̇каппасамма̄дит̣т̣хийопи локийалокуттаравасена дуббидха̄дибхедена вибхаджитабба̄. падат̣т̣ха̄ненапи падат̣т̣ха̄наха̄расампа̄те вуттанайена вибхаджитабба̄.

акусалапаккхена ‘‘араккхитена читтена̄’’ти падена вутто асам̣варо ‘‘чаккхуасам̣варо …пе… ка̄йаасам̣варо, чопанака̄йаасам̣варо, ва̄ча̄асам̣варо, маноасам̣варо’’ти ат̣т̣хавидхена вибхаджитаббо. ‘‘миччха̄дит̣т̣хихатена̄’’ти падена гахито миччха̄сан̇каппо ‘‘ка̄мавитакко бйа̄па̄давитакко вихим̣са̄витакко’’ти тивидхена вибхаджитаббо. ‘‘миччха̄дит̣т̣хӣ’’ти падена вутта̄ миччха̄дит̣т̣хи ‘‘дуккхе ан̃н̃а̄н̣ам̣…пе…идаппаччайата̄пат̣иччасамуппаннесу дхаммесу ан̃н̃а̄н̣а’’нти ат̣т̣хавидхена вибхаджитабба̄, два̄сат̣т̣хидит̣т̣хивидхенапи вибхаджитабба̄. тхинамиддхам̣ пан̃чавидхена сасан̇кха̄рикавидхена вибхаджитаббам̣.

‘‘еттакова вибхаттиха̄расампа̄то парипун̣н̣о’’ти ваттаббатта̄ ‘‘нийутто вибхаттиха̄расампа̄то’’ти вуттам̣. йена йена сам̣ван̣н̣ана̄висесабхӯтена вибхаттиха̄расампа̄тена суттаппадесаттха̄ вибхатта̄, со со сам̣ван̣н̣ана̄висесабхӯто вибхаттиха̄расампа̄то нийуттоти йатха̄раха ниддха̄ретва̄ йуджджитабботи аттхо гахетабботи.

ити вибхаттиха̄расампа̄те саттибала̄нурӯпа̄ рачита̄

вибха̄вана̄ нит̣т̣хита̄.

пан̣д̣итехи пана…пе… гахетабботи.