3. парин̃н̃а̄ва̄раван̣н̣ана̄

206-208. тасса̄пӣти пуггалока̄сава̄рассапи. ока̄се пуггалассева̄ти йатха̄гахите ока̄се йо пуггало, тассева ока̄сависит̣т̣хапуггалассева̄ти аттхо. йатха̄ пана пуггалава̄ре лаббхама̄не пуггалока̄сава̄ропи лаббхати, евам̣ ока̄сава̄ропи лаббхеййа̄ти чоданам̣ сандха̄йа̄ха ‘‘ока̄сава̄ропи ча̄’’ти. тасма̄ти йасма̄ вуччама̄нопи ока̄со пуггаласса висесабха̄венева вуччеййа, на висум̣, тасма̄.

ан̃н̃атха̄ти паваттива̄ре вийа а̄да̄наниккхепапариччхиннам̣ каммаджасанта̄нам̣ екаттена гахетва̄ тасса уппа̄даниродхавасена парин̃н̃а̄вачане. ‘‘йо рӯпаккхандхам̣ париджа̄на̄тӣ’’ти саннит̣т̣ха̄нападасан̇гахитаттха̄бха̄вадассанамукхена итарассапи абха̄вам̣ дассетум̣ ‘‘рупаккхандхапариджа̄нанасса абха̄ва̄’’ти вуттам̣. ‘‘а̄манта̄’’ти ча катам̣, тасма̄ паватте читтаккхан̣авасеневеттха тайо аддхо лаббхантӣти аттхо. ‘‘аггамаггасаман̇гин̃ча арахантан̃ча̄’’ти двиннам̣ пада̄нам̣ ‘‘рӯпаккхандхан̃ча на париджа̄нанти ведана̄ккхандхан̃ча на париджа̄ниттха̄’’ти двӣхи падехи йатха̄ккамам̣ самбандхо. ‘‘т̣хапетва̄ авасеса̄ пуггала̄’’ти пана паччекам̣ йоджетаббам̣. аггамагга…пе… наттхӣти имина̄ арахаттамагган̃а̄н̣ассева парин̃н̃а̄маттхакаппаттийа̄ парин̃н̃а̄киччам̣ са̄тисайам̣, тадабха̄ва̄ на итаресанти дассети. йато тассева ваджирӯпамата̄ вутта̄, сеса̄нан̃ча виджджӯпамата̄. тена̄ти тена йатха̄вуттена вачанена. тадавасесасаббапуггалети тато аггамаггасаман̇гито авасесасаббапуггале. имам̣ пана йатха̄вуттадосам̣ парихаранта̄ ‘‘путхуджджана̄дайо сандха̄йа̄’’ти ваданти.

парин̃н̃а̄ва̄раван̣н̣ана̄ нит̣т̣хита̄.

кхандхайамакаван̣н̣ана̄ нит̣т̣хита̄.