7. читтат̣т̣хитикатха̄ван̣н̣ана̄

335. еванти ‘‘екачиттам̣ йа̄вата̄йукам̣ тит̣т̣хатӣ’’ти вутта̄ка̄рена. ан̃н̃аттха̄ти арӯпабхавато ан̃н̃асмим̣. етена̄ти ‘‘екамева читтам̣ а̄руппе тит̣т̣хати, йа̄вата̄йукам̣ тит̣т̣хатӣ’’ти евам̣ва̄дина̄ дутийа̄пи ад̣д̣хакатха̄ пасситабба̄ пат̣хамакатха̄йа чирака̄ла̄ват̣т̣ха̄навачанасса ан̃н̃адаттху бха̄вавибха̄ванатоти адхиппа̄йо. пурима̄йа̄ти ‘‘йа̄вата̄йукам̣ тит̣т̣хатӣ’’ти пан̃хато пурима̄йа. таттха хи ‘‘вассасатам̣ тит̣т̣хатӣ’’ти пуччха̄йа ‘‘а̄манта̄’’ти анун̃н̃а̄ ката̄, паччхима̄йам̣ пана ‘‘манусса̄нам̣ екам̣ читтам̣ йа̄вата̄йукам̣ тит̣т̣хатӣ’’ти ‘‘на хевам̣ ваттаббе’’ти пат̣иккхепо като. авиродхо вибха̄ветаббо, йато таттхева анун̃н̃а̄ ката̄, на паччха̄ти адхиппа̄йо. вассасата̄дӣти ча а̄ди-саддена на кевалам̣ ‘‘две вассасата̄нӣ’’ти евама̄дийева сан̇гахитам̣, атха кхо ‘‘екам̣ читтам̣ дивасам̣ тит̣т̣хатӣ’’ти евама̄дипӣти дат̣т̣хаббам̣. ‘‘мухуттам̣ мухуттам̣ уппаджджатӣти пан̃хо сакава̄дина̄ пуччхито вийа вутто’’ти идам̣ вича̄ретаббам̣. ‘‘мухуттам̣ мухуттам̣ уппаджджатӣ’’ти пан̃хо парава̄дисса. ‘‘уппа̄давайадхаммино’’тиа̄дисуттаттхавасена пат̣ин̃н̃а̄ сакава̄дисса̄ти хи вуттам̣.

читтат̣т̣хитикатха̄ван̣н̣ана̄ нит̣т̣хита̄.