2. сам̣санданабрахмачарийакатха̄ван̣н̣ана̄

273. рӯпа̄вачарамаггена̄ти рӯпа̄вачараджджха̄нена. тан̃хи рӯпабхавӯпапаттийа̄ упа̄йабха̄вато магготи вутто. йатха̄ха ‘‘рӯпупапаттийа̄ маггам̣ бха̄ветӣ’’ти (дха. са. 160). иданти идам̣ рӯпа̄вачараджджха̄нам̣. ‘‘идхавиха̄йанит̣т̣хахетубхӯто рӯпа̄вачарамагго’’тиа̄дикам̣ дӣпентам̣ вачанам̣ ана̄га̄мимаггасса таббха̄вадӣпакена ‘‘идха бха̄витамагго’’тиа̄дикена катхам̣ саметӣти чодетва̄ йатха̄ самети, там̣ дассетум̣ ‘‘пуббе пана̄’’тиа̄ди вуттам̣. таттха ‘‘пуббе’’ти имина̄ ‘‘идха бха̄витамагго’’тиа̄дикам̣ ваданти, идха̄пи пана ‘‘рӯпа̄вачарамаггена̄’’тиа̄дикам̣. таттха ана̄га̄мӣ ева̄ти ана̄га̄мипхалат̣т̣хо ева. джха̄на̄на̄га̄мӣти асамуччхиннаджджхаттасам̣йоджанопи рӯпабхаве уппаджджитва̄ ана̄ваттидхаммамаггам̣ бха̄ветва̄ таттхева паринибба̄йанато. адхиппа̄йоти йатха̄вутто двиннам̣ ат̣т̣хакатха̄вачана̄нам̣ авиродхадӣпако адхиппа̄йо.

идха̄ти ка̄малоке. таттха̄ти брахмалоке. еттха ча парава̄дӣ евам̣ пуччхитаббо ‘‘тӣхи, бхиккхаве, т̣ха̄нехӣ’’ти суттам̣ ким̣ йатха̄рутавасена гахетаббаттхам̣, уда̄ху сандха̄йабха̄ситанти? таттха джа̄нама̄но сандха̄йабха̄ситанти вадеййа. ан̃н̃атха̄ ‘‘параниммитавасаваттидеве упа̄да̄йа̄’’тиа̄ди ваттум̣ на сакка̄ ‘‘деве ча та̄ватим̣се’’ти вуттатта̄. йатха̄ хи тасса ‘‘сеййатха̄пи девехи та̄ватим̣сехи саддхим̣ мантетва̄’’тиа̄дӣсу вийа саккам̣ девара̄джа̄нам̣ упа̄да̄йа ка̄ма̄вачарадевесу та̄ватим̣садева̄ па̄кат̣а̄ пан̃н̃а̄та̄ти тесам̣ гахан̣ам̣, на тейева адхиппета̄ти суттападасса сандха̄йабха̄ситаттхам̣ сампат̣иччхитаббам̣, евам̣ ‘‘идха брахмачарийава̄со’’ти еттха̄пи анаваджджасукхаабйа̄секасукханеккхаммасукха̄дисанниссайабха̄вена маха̄нисам̣сата̄йа са̄сане паббаджджа̄ ‘‘идха брахмачарийава̄со’’ти имасмим̣ сутте адхиппета̄. са̄ хи уттаракурука̄нам̣ дева̄нан̃ча анока̄сабха̄вато дуккара̄ дуллабха̄ ча. таттха сӯрийапариватта̄дӣхипи девесу маггапат̣ила̄бха̄йа аттхита̄ вибха̄ветабба̄, уттаракурука̄нам̣ пана висеса̄надхигамабха̄во убхиннампи иччхито ева̄ти.

сам̣санданабрахмачарийакатха̄ван̣н̣ана̄ нит̣т̣хита̄.

брахмачарийакатха̄ван̣н̣ана̄ нит̣т̣хита̄.