7. дхаммакатха̄ван̣н̣ана̄

887-888. рӯпасабха̄во рӯпат̣т̣хоти а̄ха ‘‘рӯпат̣т̣хо на̄ма кочи рӯпато ан̃н̃о наттхӣ’’ти. йам̣ пана йато ан̃н̃ам̣, на там̣ там̣сабха̄ванти а̄ха ‘‘рӯпат̣т̣хато ан̃н̃ам̣ рӯпан̃ча на хотӣ’’ти, рӯпамева на хотӣти аттхо. етена бйатирекато таматтхам̣ са̄дхети. тасма̄ти йасма̄ рӯпато ан̃н̃о рӯпат̣т̣хо наттхи, рӯпат̣т̣хато ча ан̃н̃ам̣ рӯпам̣, тасма̄ рӯпам̣ рӯпамева рӯпасабха̄вамева̄ти ева-ка̄рена ниваттитам̣ дассети ‘‘на ведана̄дисабха̄ва’’нти. адхиппа̄йена̄ти рӯпарӯпат̣т̣ха̄нам̣ анан̃н̃атта̄дхиппа̄йена. ан̃н̃атха̄ти тесам̣ ан̃н̃атте рӯпат̣т̣хена нийамена рӯпам̣ нийатанти ваттаббанти йоджана̄. дасситойева хоти аттхато а̄паннатта̄. на хи абхинне ваттхусмим̣ парийа̄йантарабхедам̣ кароти. ан̃н̃аттанти рӯпасабха̄ва̄нам̣ рӯпарӯпат̣т̣ха̄нан̃ча. саса̄миниддесасиддха̄бхеда̄ ‘‘сила̄путтакасса сарӣра’’нти вийа, каппана̄маттато ча̄йам̣ бхедо, на параматтхатоти а̄ха ‘‘гахетва̄ вийа паватто’’ти. ведана̄дӣхи на̄наттамева̄ти ведана̄дӣхи ан̃н̃аттамева. со сабха̄воти со рӯпасабха̄во. на̄наттасан̃н̃а̄панаттханти рӯпасса сабха̄во, на ведана̄дӣнанти евам̣ бхедасса н̃а̄панаттхам̣. тан̃ча вачананти ‘‘рӯпам̣ рӯпат̣т̣хена на нийата’’нти вачанам̣. вуттаппака̄рена̄ти ‘‘рӯпат̣т̣хато ан̃н̃асса рӯпасса абха̄ва̄’’тиа̄дина̄ вутта̄ка̄рена. йади садосам̣, атха касма̄ пат̣иджа̄на̄тӣти йоджана̄.

вуттамева ка̄ран̣анти ‘‘рӯпам̣ рӯпамева, на ведана̄дисабха̄ва’’нти евам̣ вуттамева йуттим̣. парена чодитанти ‘‘на ваттаббам̣ рӯпам̣ рӯпат̣т̣хена нийата’’нтиа̄дина̄ парава̄дино чоданам̣ сандха̄йа̄ха. тамева ка̄ран̣ам̣ дассетва̄ти тамева йатха̄вуттам̣ йуттим̣ ‘‘еттха хӣ’’тиа̄дина̄ дассетва̄. чоданам̣ ниваттетӣти ‘‘атха касма̄ пат̣иджа̄на̄тӣ’’ти вуттам̣ чоданам̣ ниваттети. йаматтхам̣ сандха̄йа ‘‘ито ан̃н̃атха̄’’ти вуттам̣, там̣ дассетум̣ ‘‘рӯпа̄дӣ’’тиа̄ди вуттам̣.

дхаммакатха̄ван̣н̣ана̄ нит̣т̣хита̄.

екавӣсатимаваггаван̣н̣ана̄ нит̣т̣хита̄.