11. гатиануйогаван̣н̣ана̄

69-72. йа̄нисса сутта̄ни нисса̄йа ладдхи уппанна̄, тесам̣ дассанато парато ‘‘тена хи пуггало сандха̄ватӣ’’тиа̄дина̄ па̄л̣и а̄гата̄, пурато пана ‘‘на ваттаббам̣ пуггало сандха̄ватӣ’’тиа̄дина̄, тасма̄ вуттам̣ ‘‘дассенто…пе… бхавитабба’’нти. дассетва̄ти ва̄ ваттаббанти ‘‘йа̄нисса…пе… та̄ни дассетва̄ ‘тена хи пуггало сандха̄ватӣ’тиа̄дима̄ха̄’’ти ваттаббанти аттхо. дассентоти ва̄ идам̣ дассанакирийа̄йа на ваттама̄ната̄маттавачанам̣, атха кхо тасса̄ лаккхан̣аттхавачанам̣, хетубха̄вавачанам̣ ва̄ти на кочи досо.

91. со ваттабботи со джӣвасарӣра̄нам̣ анан̃н̃ата̄паджджана̄ка̄ро ваттаббо, наттхӣти адхиппа̄йо. ‘‘рӯпӣ атта̄’’ти имисса̄ ладдхийа̄ васена ‘‘йена рӯпасан̇кха̄тена аттано сабха̄вабхӯтена сарӣрена саддхим̣ гаччхатӣ’’ти евам̣ пана аттхе сати со а̄ка̄ро вутто ева хоти, татха̄ ча сати ‘‘рӯпам̣ пуггалоти ананун̃н̃а̄татта̄’’ти евампи ваттум̣ на сакка̄. йасма̄ пана ‘‘идха сарӣраниккхепа̄’’ти анантарам̣ ваккхати, тасма̄ ‘‘со ваттаббо’’ти вуттам̣. нирайӯпагасса пуггаласса антара̄бхавам̣ на иччхатӣти идам̣ пура̄тана̄нам̣ антара̄бхавава̄дӣнам̣ васена вуттам̣. адхуна̄тана̄ пана ‘‘уддхам̣па̄до ту на̄рако’’ти ваданта̄ тассапи антара̄бхавам̣ иччхантева, кечи пана асан̃н̃ӯпага̄нам̣. арӯпӯпага̄нам̣ пана саббепи на иччханти. таттха йе ‘‘сан̃н̃уппа̄да̄ ча пана те дева̄ тамха̄ ка̄йа̄ чавантӣ’’ти суттасса аттхам̣ миччха̄ гахетва̄ чутӯпапа̄така̄лесу асан̃н̃ӣнам̣ сан̃н̃а̄ аттхӣти антара̄бхаватова асан̃н̃ӯпапаттим̣ иччханти, тадан̃н̃есам̣ васена ‘‘саведано…пе… пат̣иккхипатӣ’’ти дассенто ‘‘йе пана̄’’тиа̄дима̄ха. ке паневам̣ иччханти? саббаттхива̄дӣсу екачче.

92. невасан̃н̃а̄на̄сан̃н̃а̄йатанети невасан̃н̃а̄на̄сан̃н̃а̄йатане бхаве, ачиттуппа̄де ва̄ сан̃н̃а̄ аттхӣти иччхантӣти на ваттаббанти самбандхо. йато со сан̃н̃а̄бхавена асан̇гахито, бхавантарабха̄вена ча сан̇гахито.

93. индханупа̄да̄но агги вийа индханена рӯпа̄диупа̄да̄но пуггало рӯпа̄дина̄ вина̄ наттхӣти еттха айамадхиппа̄йавибха̄вана̄ – йатха̄ на вина̄ индханена агги пан̃н̃а̄пӣйати, на ча там̣ ан̃н̃ам̣ индханато сакка̄ пат̣иджа̄нитум̣, на̄пи анан̃н̃ам̣. йади хи ан̃н̃ам̣ сийа̄, на ун̣хам̣ индханам̣ сийа̄, атха анан̃н̃ам̣, нидахитаббам̣йева да̄хакам̣ сийа̄, евам̣ на вина̄ рӯпа̄дӣхи пуггало пан̃н̃а̄пӣйати, на ча техи ан̃н̃о, на̄пи анан̃н̃о сассатуччхедабха̄ваппасан̇гатоти парава̄дино адхиппа̄йо. таттха йади аггиндханопама̄ локавоха̄рена вутта̄, апал̣иттам̣ кат̣т̣ха̄дииндханам̣ нидахитаббан̃ча, пал̣иттам̣ бха̄сурун̣хам̣ аггида̄хакан̃ча, тан̃ча оджат̣т̣хамакарӯпам̣ пабандхавасена паваттам̣ аниччам̣ сан̇кхатам̣ пат̣иччасамуппаннам̣. йади евам̣ пуггало рӯпа̄дӣхи ан̃н̃о аниччо ча а̄панно, атха параматтхато ча, тасмим̣йева кат̣т̣ха̄дисан̃н̃ите рӯпасан̇кха̄тапал̣итте йам̣ усумам̣ со агги там̣сахаджа̄та̄ни тӣн̣ибхӯта̄ни индханам̣. евампи сиддхам̣ лаккхан̣абхедато аггиндхана̄нам̣ ан̃н̃аттанти агги вийа индханато рӯпа̄дӣхи ан̃н̃о пуггало аниччо ча а̄паджджатӣти.

гатиануйогаван̣н̣ана̄ нит̣т̣хита̄.