1. ниродхакатха̄ван̣н̣ана̄

571-572. сакасамайе ‘‘пуримачиттасса ниродха̄нантарам̣ паччхимачиттам̣ уппаджджатӣ’’ти иччхитам̣, парава̄дӣ пана ‘‘йасмим̣ кхан̣е бхаван̇гачиттам̣, тасмим̣йева кхан̣е кирийамайачиттам̣ уппаджджатӣ’’ти вадати. евам̣ сати пуримапаччхимачитта̄нам̣ сахабха̄вопи анун̃н̃а̄то хоти. тена̄ха ‘‘бхан̇гаккхан̣ена сахева̄’’ти. татха̄ ча сати випа̄какирийаккхандха̄нам̣ вийа кирийавипа̄каккхандха̄нам̣ випа̄кавипа̄каккхандха̄нам̣ кирийакирийаккхандха̄нан̃ча вуттанайена сахабха̄во ваттабботи имаматтхам̣ дассенто ‘‘бхаван̇гачиттасса̄’’тиа̄дима̄ха. таттха упапаттибхавабха̄вена есийа̄ иччхитабба̄ти упапаттесийа̄ випа̄каккхандха̄, те ча йебхуййена бхаван̇гапарийа̄йака̄ти ат̣т̣хакатха̄йам̣ вуттам̣ ‘‘упапаттесийанти сан̇кхам̣ гатасса бхаван̇гачиттасса̄’’ти. а̄дипарийоса̄наматтан̃хи тасса пат̣исандхичутичиттам̣, тада̄рамман̣ам̣ бхаван̇гантвева вуччатӣти. чаккхувин̃н̃а̄н̣а̄дӣнам̣ кирийа̄вемаджджхе патитатта̄ кирийа̄чатуккхандхаггахан̣ена гахан̣ам̣ йуттанти вуттам̣. чаккхувин̃н̃а̄н̣а̄дӣнанти хи а̄ди-саддена на сотавин̃н̃а̄н̣а̄дӣнам̣йева гахан̣ам̣, атха кхо сампат̣иччханасантӣран̣а̄нампӣти дат̣т̣хаббам̣.

ниродхакатха̄ван̣н̣ана̄ нит̣т̣хита̄.