7. па̄дукаваггаван̣н̣ана̄

647. саттамавагге пат̣иччханно хутва̄ти со кира раттибха̄ге уййа̄нам̣ гантва̄ амбам̣ абхирухитва̄ са̄кха̄йа са̄кхам̣ амбам̣ олокенто вичари. тасса татха̄ каронтассева ратти вибха̄йи. со чинтеси ‘‘саче ида̄ни отаритва̄ гамисса̄ми, дисва̄ мам̣ чороти гахессанти, раттибха̄ге гамисса̄мӣ’’ти. атхекам̣ вит̣апам̣ абхирухитва̄ нилӣно аччхи. там̣ сандха̄йетам̣ вуттам̣. со руккхато отаранто екам̣ оламбиниса̄кхам̣ гахетва̄ тесам̣ убхиннампи антаре патит̣т̣ха̄си. там̣ сандха̄йа вуттам̣ ‘‘тесам̣ двиннампи антара̄ руккхато патито’’ти. па̄л̣ийа̄ аттхам̣ на джа̄нантӣти аттано гахан̣асса аттхам̣ на джа̄нанти.

джа̄такапа̄л̣ийам̣ (джа̄. 1.4.33) пана айам̣ га̄тха̄ –

‘‘саббамидам̣ чаримам̣ катам̣, убхо дхаммам̣ на пассаре;

убхо пакатийа̄ чута̄, йо ча̄йам̣ мантеджджха̄пети;

йо ча мантам̣ адхӣйатӣ’’ти. –

евама̄гата̄. тасса̄йаматтхо (джа̄. ат̣т̣ха. 3.4.33) – саббамидам̣ чаримам̣ катанти йам̣ амхехи тӣхи джанехи катам̣, саббамидам̣ киччам̣ ла̄макам̣ ниммарийа̄дам̣ адхаммикам̣. евам̣ аттано чорабха̄вам̣ тесан̃ча мантесу ага̄равам̣ гарахитва̄ пуна итаре двейева гараханто ‘‘убхо дхаммам̣ на пассаре’’тиа̄дима̄ха. таттха убхоти име двепи джана̄ гарука̄ра̄рахам̣ пора̄н̣акадхаммам̣ на пассанти, татова дхаммапакатито чута̄. дхаммо хи пат̣хамуппаттивасена пакати на̄ма. вуттампи четам̣ –

‘‘дхаммо хаве па̄турахоси пуббе,

паччха̄ адхаммо удапа̄ди локе’’ти. (джа̄. 1.11.28);

йо ча̄йанти йо ча айам̣ нӣче нисӣдитва̄ манте аджджха̄пети, йо ча учче нисӣдитва̄ адхӣйатӣти.

са̄лӣнанти айам̣ га̄тха̄пи –

‘‘са̄лӣнам̣ оданам̣ бхун̃дже, сучим̣ мам̣сӯпасечанам̣;

тасма̄ етам̣ на сева̄ми, дхаммам̣ исӣхи севита’’нти. (джа̄. 1.4.34) –

евам̣ джа̄таке а̄гата̄. таттха сучинти пан̣д̣арам̣ парисуддхам̣. мам̣сӯпасечананти на̄наппака̄ра̄йа мам̣савикатийа̄ ситтам̣ бхун̃дже, бхун̃джа̄мӣти аттхо. сесам̣ па̄кат̣амева.

дхираттхӯти дхи аттху, нинда̄ бхаватӯти аттхо, гараха̄ма там̣ майанти вуттам̣ хоти. ладдхала̄бхоти дханала̄бхам̣ йасала̄бхан̃ча сандха̄йа вадати. винипа̄танахетуна̄ти винипа̄танасса хетубха̄вена. вутти на̄ма хотӣти йатха̄вутто дувидхопи ла̄бхо апа̄йасам̣ваттаниката̄йа сампара̄йе винипа̄танахетубха̄вена паваттанато сампати адхаммачаран̣ена паваттанато ча вутти на̄ма хотӣти аттхо. еварӯпа̄ йа̄ вуттӣти еварӯпа̄ дханала̄бхайасала̄бхасан̇кха̄та̄ йа̄ вутти. адхаммачаран̣ена ва̄ти ва̄-саддо сампин̣д̣анаттхо. тванти упайогаттхе паччаттавачанам̣, там̣ иччева ва̄ па̄т̣хо. асма̄ти па̄са̄н̣а̄дхивачанаметам̣.

па̄дукаваггаван̣н̣ана̄ нит̣т̣хита̄.

сесам̣ утта̄намева.

секхийакан̣д̣ам̣ нит̣т̣хитам̣.

адхикаран̣асаматхесу йам̣ ваттаббам̣, там̣ ат̣т̣хакатха̄йам̣ а̄гатат̣т̣ха̄нейева дассайисса̄ма.

ити самантапа̄са̄дика̄йа винайат̣т̣хакатха̄йа са̄раттхадӣпанийам̣

бхиккхувибхан̇гаван̣н̣ана̄ нит̣т̣хита̄.

маха̄вибхан̇го нит̣т̣хито.

намо тасса бхагавато арахато самма̄самбуддхасса