7. катхинаккхандхакам̣

катхина̄нуджа̄нанакатха̄ван̣н̣ана̄

306. катхинаккхандхаке сӣсавасена̄ти падха̄нан̇гавасена. ‘‘катхинанти пан̃ча̄нисам̣се антокаран̣асаматтхата̄йа тхиранти аттхо’’ти ган̣т̣хипадесу вуттам̣. ‘‘со несам̣ бхависсатӣ’’ти йуджджатӣти ‘‘со тумха̄ка’’нти аватва̄ ‘‘неса’’нти вачанам̣ йуджджати. йе аттхатакатхина̄ти на кевалам̣ тумха̄камева, йе ан̃н̃епи аттхатакатхина̄, тесампи бхависсатӣти аттхо. ана̄мантетва̄ чаран̣анти ча̄риттасиккха̄паде вуттанайена ана̄пуччхитва̄ кулесу чаран̣ам̣. матакачӣваранти матасса сантакам̣ чӣварам̣. татруппа̄дена а̄бхатанти виха̄расантакена кхеттаваттхуа̄дина̄ а̄нӣтам̣.

пат̣хамапава̄ран̣а̄йа пава̄рита̄ти идам̣ вассаччхедам̣ акатва̄ вассам̣вуттхабха̄васандассанаттхам̣ вуттам̣ антара̄йена аппава̄рита̄нампи вуттхавасса̄нам̣ катхинаттха̄расамбхавато. тенева ‘‘аппава̄рита̄ ва̄’’ти аватва̄ ‘‘чхиннавасса̄ ва̄ паччхимика̄йа упагата̄ ва̄ на лабхантӣ’’ти еттакамева вуттам̣. ан̃н̃асмим̣ виха̄ре вуттхавасса̄пи на лабхантӣти на̄на̄сӣма̄йа ан̃н̃асмим̣ виха̄ре вуттхавасса̄ имасмим̣ виха̄ре катхинаттха̄рам̣ на лабхантӣти аттхо. кхалимаккхитаса̄т̣акоти ахатаваттхам̣ сандха̄йа вуттам̣. да̄накаммава̄ча̄ти катхинадуссада̄накаммава̄ча̄. ака̄тум̣ на лаббхатӣти имина̄ ана̄дарийена акаронтасса дуккат̣анти дӣпети. каммава̄ча̄ пана ека̄йева ват̣т̣атӣти катхинаттха̄раса̄т̣акасса да̄нака̄ле вутта̄ ека̄йева каммава̄ча̄ ват̣т̣ати. пуна тасса ан̃н̃асмим̣ ваттхе диййама̄не каммава̄ча̄йа да̄таббакиччам̣ наттхи, апалоканамева аланти адхиппа̄йо.

308. маха̄бхӯмиканти маха̄висайам̣, чатувӣсатиа̄ка̄равантата̄йа маха̄виттха̄риканти вуттам̣ хоти. пан̃чаканти пан̃чакхан̣д̣ам̣. еса найо сесесупи. пат̣хамачимилика̄ти катхинаваттхато ан̃н̃а̄ аттано пакатичимилика̄. ‘‘куччхичимиликам̣ катва̄ сиббитаматтена̄ти тхираджин̣н̣а̄нам̣ чимилика̄нам̣ екато катва̄ сиббанассетам̣ адхивачана’’нти ган̣т̣хипадесу вуттам̣. маха̄паччарийам̣ курундийан̃ча ‘‘вуттавачананидассанам̣ бйан̃джане ева бхедо, аттхе наттхӣти дассанаттхам̣ ката’’нти ваданти. пит̣т̣хианува̄та̄ропанаматтена̄ти дӣгхато анува̄тасса а̄ропанаматтена. куччхианува̄та̄ропанаматтена̄ти путхулато анува̄тасса а̄ропанаматтена. са̄руппам̣ хотӣти саман̣аса̄руппам̣ хоти. раттиниссаггийена̄ти раттиатиккантена.

катхина̄нуджа̄нанакатха̄ван̣н̣ана̄ нит̣т̣хита̄.

а̄да̄йасаттака̄дикатха̄ван̣н̣ана̄

311. айанти а̄са̄ваччхедико катхинуддха̄ро. идха на вуттоти па̄л̣ийам̣ ма̄тика̄падабха̄джане саванантика̄нантарам̣ на вутто. таттха̄ти тасмим̣ сӣма̄тиккантике катхинуддха̄ре. ‘‘сӣма̄тиккантико на̄ма чӣварака̄ласӣма̄тиккантико’’ти кеначи вуттам̣. ‘‘бахисӣма̄йам̣ чӣварака̄ласамайасса атиккантатта̄ сӣма̄тиккантико’’ти айам̣ амха̄кам̣ кханти. сахуббха̄ре ‘‘со катачӣваро’’ти па̄т̣хо диссати, еван̃ча сати чӣварапалибодхо пат̣хамам̣ чхиджджатӣти вин̃н̃а̄йати, идха пана парива̄рапа̄л̣ийан̃ча ‘‘две палибодха̄ апуббам̣ ачаримам̣ чхиджджантӣ’’ти (пари. 415) вачанато там̣ на самети, тасма̄ вӣмам̣ситаббаметтха ка̄ран̣ам̣.

312. ‘‘сама̄да̄йава̄ро а̄да̄йава̄расадисо, упасаггаматтаметтха висесо’’ти ган̣т̣хипадесу вуттам̣. кечи пана ‘‘саббам̣ аттано париккха̄рам̣ анавасесетва̄ паккаманто ‘сама̄да̄йа паккаматӣ’ти вуччатӣ’’ти ваданти. пуна сама̄да̄йава̄репи тейева дассита̄ти самбандхо. виппакатачӣваре паккаманантикасса катхинуддха̄расса асамбхавато ‘‘йатха̄самбхава’’нти вуттам̣. паккаманантико хи катхинуддха̄ро нит̣т̣хитачӣварассева васена вутто ‘‘бхиккху аттхатакатхино катачӣварам̣ а̄да̄йа паккаматӣ’’ти вуттатта̄, тасма̄ со виппакатачӣваро на самбхаватӣти чхал̣ева уббха̄ра̄ таттха дассита̄.

татра̄йам̣ а̄дито пат̣т̣ха̄йа ва̄равибха̄вана̄ – а̄да̄йава̄ра̄ сатта, татха̄ сама̄да̄йава̄ра̄ти две саттакава̄ра̄, тато паккаманантикам̣ ваджджетва̄ виппакатачӣварасса а̄да̄йасама̄да̄йава̄равасена две чхаккава̄ра̄, тато парам̣ нит̣т̣ха̄насаннит̣т̣ха̄нана̄санантика̄нам̣ васена тӣн̣и тика̄ни дассита̄ни. таттха пат̣хаматтикам̣ антосӣма̄йам̣ ‘‘паччессам̣ на паччесса’’нти имам̣ видхим̣ ана̄маситва̄ бахисӣма̄йамева ‘‘на паччесса’’нти паваттам̣, тасма̄ паккаманантикасӣма̄тиккантикасауббха̄ра̄ таттха на йуджджанти. дутийаттикам̣ антосӣма̄йам̣ ‘‘на паччесса’’нти паваттам̣. татийаттикам̣ анадхит̣т̣хита-падена висесетва̄ паваттам̣, аттхато пат̣хаматтикена самети. анадхит̣т̣хитена̄ти ча ‘‘паччессам̣ на паччесса’’нти евам̣ анадхит̣т̣хитена, анийамитена̄ти аттхо. татийаттика̄нантарам̣ чатуттхаттикам̣ самбхавантам̣ антосӣма̄йам̣ ‘‘паччесса’’нти вачанависесена самбхавати. татха̄ ча йоджийама̄нам̣ итарехи саванантика̄дӣхи авируддхам̣ хотӣти чатуттхаттикам̣ ахутва̄ чхаккам̣ джа̄танти ведитаббам̣. евам̣ тӣн̣и тика̄ни екам̣ чхаккан̃ча̄ти пат̣хамам̣ паннарасакам̣ ведитаббам̣.

316-320. тато идамева паннарасакам̣ упасаггависесена дутийам̣ сама̄да̄йапаннарасакам̣ на̄ма катам̣. пуна ‘‘виппакатачӣварам̣ а̄да̄йа̄’’ти татийам̣ паннарасакам̣, ‘‘сама̄да̄йа̄’’ти чатуттхам̣ паннарасакам̣ дасситанти евам̣ чатта̄ри паннарасака̄ни ведитабба̄ни. таттха пат̣хамадутийесу паннарасакесу саббена саббам̣ акатачӣварам̣ адхиппетам̣, итаресу двӣсу виппакатанти ведитаббам̣. тато парам̣ ‘‘чӣвара̄са̄йа паккаматӣ’’тиа̄дина̄ найена нит̣т̣ха̄насаннит̣т̣ха̄нана̄санаа̄са̄ваччхедикавасена еко ва̄роти идамекам̣ чатуккам̣ джа̄там̣, тасма̄ пуббе вутта̄ни тика̄ни а̄са̄ваччхедика̄ни тӣн̣и ча тика̄нӣти етам̣ ана̄са̄йадва̄дасаканти ведитаббам̣. таданантаре а̄са̄йадва̄дасаке кин̃ча̄пи пат̣хамам̣ два̄дасакам̣ лаббхати, татха̄пи там̣ ниббисесанти тамекам̣ два̄дасакам̣ авуттасиддхам̣ катва̄ висесато дассетум̣ а̄дито пат̣т̣ха̄йа ‘‘антосӣма̄йам̣ паччесса’’нти вуттам̣. там̣ дутийачатукке ‘‘со бахисӣмагато сун̣а̄тӣ’’тиа̄дивачанасса татийачатукке саванантика̄дӣнан̃ча ока̄сакаран̣аттханти ведитаббам̣. идам̣ пана два̄дасакам̣ ана̄са̄йавасенапи лаббхама̄нам̣ имина̄ авуттасиддхам̣ катва̄ на дасситанти ведитаббам̣. еваметтха две два̄дасака̄ни уддхаритабба̄ни. каран̣ӣйадва̄дасакепи йатха̄дасситам̣ ана̄са̄йадва̄дасакам̣ авуттасиддхам̣ а̄са̄йадва̄дасакан̃ча̄ти две два̄дасака̄ни уддхаритабба̄ни.

321-322. йасма̄ дисам̣гамиканаваке ‘‘дисам̣гамико паккаматӣ’’ти вачаненева ‘‘на паччесса’’нти идам̣ авуттасиддхамева, тасма̄ там̣ на вуттам̣. етта̄вата̄ ча а̄ва̄сапалибодха̄бха̄во дассито. чӣварапат̣ивӣсам̣ апавила̄йама̄ноти имина̄ чӣварапалибодхасаман̇гитамасса дассети. таттха чӣварапат̣ивӣсанти аттано паттаббачӣварабха̄гам̣. апавила̄йама̄ноти а̄кан̇кхама̄но. тасса чӣварала̄бхе сати вассам̣вуттха̄ва̄се нит̣т̣ха̄насаннит̣т̣ха̄нана̄санантика̄нам̣ васена екам̣ тикам̣, тесам̣йева васена антара̄магге екам̣, гатат̣т̣ха̄не еканти тин̣н̣ам̣ тика̄нам̣ васена екам̣ навакам̣ ведитаббам̣.

324. тато парам̣ нит̣т̣ха̄насаннит̣т̣ха̄нана̄санантикасӣма̄тиккантикасауббха̄ра̄нам̣ васена пха̄сувиха̄рапан̃чакам̣ вуттам̣. сесаметтха па̄л̣ито ат̣т̣хакатха̄то ча сувин̃н̃еййамева.

а̄да̄йасаттака̄дикатха̄ван̣н̣ана̄ нит̣т̣хита̄.

катхинаккхандхакаван̣н̣ана̄ нит̣т̣хита̄.