7. сам̣видаханасиккха̄падаван̣н̣ана̄

181. саттаме ‘‘паччха̄ гаччхантӣнам̣ чора̄ аччхиндим̣сӯ’’ти еттха ‘‘паттачӣвара’’нти па̄т̣хасесоти а̄ха ‘‘паччха̄ гаччхантӣнам̣ паттачӣвара’’нти. та̄ бхиккхунийоти паччха̄ гаччхантийо бхиккхунийо. ‘‘паччха̄ гаччхантӣна’’нти ча вибхаттивипарин̣а̄менеттха самбандхо ведитаббо. па̄л̣ийам̣ ‘‘гаччха̄ма бхагини, гаччха̄ма аййа̄’’ти бхиккхупуббакам̣ сам̣видха̄нам̣ вуттам̣, ‘‘гаччха̄ма аййа, гаччха̄ма бхагинӣ’’ти бхиккхунӣпуббакам̣. екаддха̄намагганти екам̣ аддха̄насан̇кха̄там̣ маггам̣, екато ва̄ аддха̄намаггам̣. хиййоти суве. парети татийадивасе.

182-183. двидха̄ вуттаппака̄роти па̄дагаманавасена паккхагаманавасена ва̄ти двидха̄ вуттаппабхедо. чатуннам̣ магга̄нам̣ самбандхат̣т̣ха̄нам̣ чатуккам̣, тин̣н̣ам̣ магга̄нам̣ самбандхат̣т̣ха̄нам̣ син̇гха̄т̣акам̣. ‘‘га̄мантаре га̄мантаре’’ти еттха ан̃н̃о га̄мо га̄мантаранти а̄ха ‘‘никкхамане ана̄патти…пе… бхиккхуно па̄читтийа’’нти. ‘‘сам̣видха̄йа̄’’ти па̄л̣ийам̣ ависесена вуттатта̄ ‘‘нева па̄л̣ийа̄ саметӣ’’ти вуттам̣, ‘‘еттхантаре сам̣видахитепи бхиккхуно дуккат̣а’’нти вуттатта̄ ‘‘на сесаат̣т̣хакатха̄йа саметӣ’’ти вуттам̣. аддхайоджанам̣ атиккамантасса̄ти асати га̄ме аддхайоджанам̣ атиккамантасса. йаттха хи аддхайоджанаббхантаре ан̃н̃о га̄мо на хоти, там̣ идха ага̄макам̣ аран̃н̃анти адхиппетам̣, аддхайоджанаббхантаре пана га̄ме сати га̄мантараган̣ана̄йа ева а̄патти.

185. рат̣т̣хабхедети рат̣т̣хавилопе. чаккасама̄рул̣ха̄ти ирийа̄патхачаккам̣ сакат̣ачаккам̣ ва̄ сама̄рул̣ха̄. сесам̣ утта̄намева. двиннампи сам̣видахитва̄ маггаппат̣ипатти, ависан̇кетам̣, самайа̄бха̄во, ана̄пада̄, га̄мантароккаманам̣ ва̄ аддхайоджана̄тиккамо ва̄ти има̄ни панеттха пан̃ча ан̇га̄ни. екатоупасампанна̄дӣхи саддхим̣ гаччхантасса пана ма̄туга̄масиккха̄падена а̄патти.

сам̣видаханасиккха̄падаван̣н̣ана̄ нит̣т̣хита̄.