4. а̄мисасиккха̄падаван̣н̣ана̄

164. чатуттхе ‘‘упасампаннам̣…пе… бхиккхунова̄дака’’нти имесам̣ ‘‘ман̇кукаттука̄мо’’ти имина̄ самбандхо. ‘‘аван̣н̣ам̣ каттука̄мо айасам̣ каттука̄мо’’ти имесам̣ пана васена ‘‘упасампанна’’нтиа̄дӣсу ‘‘упасампаннасса̄’’ти вибхаттивипарин̣а̄мо ка̄табботи имаматтхам̣ сандха̄йа ‘‘уджджха̄панаке вуттанайеневаттхо ведитаббо’’ти вуттам̣. ‘‘чӣварахету овадатӣ’’тиа̄дина̄ бхан̣антасса екекасмим̣ вачане нит̣т̣хите па̄читтийам̣ ведитаббам̣. ‘‘упасампаннам̣ сан̇гхена асаммата’’нти па̄л̣ивачанато ‘‘самматена ва̄ сан̇гхена ва̄ бха̄рам̣ катва̄ т̣хапито’’ти ат̣т̣хакатха̄вачанато ча ат̣т̣хахи ан̇гехи саманна̄гато самматена ва̄ виппаваситука̄мена ‘‘йа̄ва̄хам̣ а̄гамисса̄ми, та̄ва те бха̄ро хотӯ’’ти йа̄читва̄ т̣хапито тасса̄бха̄вато сан̇гхена ва̄ татхева бха̄рам̣ катва̄ т̣хапито ат̣т̣хахи гарудхаммехи ан̃н̃ена ва̄ дхаммена овадитум̣ лабхатӣти ведитаббам̣. тасма̄ ‘‘йо пана, бхиккху, асаммато бхиккхунийо овадеййа, па̄читтийа’’нти идам̣ пагева бха̄рам̣ катва̄ ат̣т̣хапитам̣ сандха̄йа вуттанти гахетаббам̣.

168. ана̄патти пакатийа̄ чӣварахету…пе… овадантам̣ бхан̣атӣти еттха а̄мисахету овадантам̣ ‘‘а̄мисахету овадатӣ’’ти сан̃н̃а̄йа евам̣ бхан̣антасса ана̄патти, ‘‘на а̄мисахету овадатӣ’’ти сан̃н̃ино пана дуккат̣ам̣, на а̄мисахету овадантам̣ пана ‘‘а̄мисахету овадатӣ’’ти сан̃н̃а̄йа бхан̣антассапи ана̄патти сачиттакатта̄ сиккха̄падасса. сесаметтха утта̄намева. упасампанната̄, дхаммена ладдхасаммутита̄, ана̄мисантарата̄, аван̣н̣ака̄мата̄йа евам̣ бхан̣ананти има̄ни панеттха чатта̄ри ан̇га̄ни.

а̄мисасиккха̄падаван̣н̣ана̄ нит̣т̣хита̄.

169. пан̃чамам̣ утта̄наттхамева.