сиккха̄каран̣ӣйакатха̄ван̣н̣ана̄
2438. па̄т̣идесанӣйа̄нантарам̣ уддит̣т̣ха̄ни пан̃часаттати секхийа̄ни маха̄вибхан̇ге вуттавиниччхайа̄нева̄ти тадева атидисанто а̄ха ‘‘секхийа̄ пана йе дхамма̄’’тиа̄ди. йе пана пан̃часаттати секхийа̄ дхамма̄ па̄т̣идесанӣйа̄нантарам̣ уддит̣т̣ха̄, тесам̣ аттхавиниччхайо маха̄вибхан̇ге вуттова̄ти йоджана̄, аттхикехи татова гахетаббо, на пуна идха дассесса̄мӣти адхиппа̄йо.
ити винайаттхаса̄расандӣпанийа̄ винайавиниччхайаван̣н̣ана̄йа
сиккха̄каран̣ӣйакатха̄ван̣н̣ана̄ нит̣т̣хита̄.
2439-40. савибхан̇га̄нам̣ убхатовибхан̇гасахита̄нам̣ убхатопа̄тимоккха̄нам̣ бхиккхӯнам̣, бхиккхунӣнан̃ча па̄тимоккха̄нам̣ ат̣т̣хакатха̄са̄ро саббат̣т̣хакатха̄нам̣ са̄рабхӯто йо со аттхо висесато самантапа̄са̄дика̄йам̣ вутто. там̣ саббам̣ са̄рабхӯтам̣ аттхам̣ сама̄да̄йа йо винайассавиниччхайо бхиккхӯнам̣, бхиккхунӣнан̃ча хитаттха̄йа майа̄ като вирачитоти самбандхо.
2441. но амха̄кам̣ пат̣ибха̄н̣аджам̣ пат̣ибха̄н̣ато джа̄там̣ имам̣ ту имам̣ винайавиниччхайам̣ пана йе джантуно сатта̄ сун̣анти, те джантуно джанасса сатталокасса хите адхисӣласиккха̄пака̄сакатта̄ упака̄раке суматасса собхан̣анти буддха̄дӣхи матасса, собхан̣ехи ва̄ буддха̄дӣхи матасса пат̣ивиддхасса аматамаха̄нибба̄насса айане ан̃джасабхӯте джанасса та̄йане ка̄йикава̄часикавӣтиккамапат̣ипаккхатта̄ апа̄йабхайанива̄ран̣ат̣т̣хена та̄н̣абхӯте винайе винайапит̣аке пакатан̃н̃уно йатха̄сабха̄вам̣ джа̄нанта̄ тан̃н̃уно бхаванти там̣ там̣ каппийа̄каппийам̣ севитабба̄севитаббам̣ джа̄нанта̄ бхавантева̄ти аттхо.
2442. бахаво са̄рабхӯта̄ найа̄ еттха̄ти бахуса̄ранайо, тасмим̣ бахуса̄ранайе. параме уттаме винайе винайапит̣аке виса̄радатам̣ веса̄раджджам̣ асам̣хӣран̃а̄н̣ам̣ абхипаттхайата̄ висесато иччхантена буддхимата̄ н̃а̄н̣а̄тисайамантена йатина̄ саббака̄лам̣ тивидхасиккха̄парипӯран̣е аситхилапаваттасамма̄ва̄йа̄мена бхиккхуна̄ имасмим̣ винайавиниччхайе парама̄ уттаритара̄ махатӣ а̄дарата̄ каран̣ӣйатама̄ висесена ка̄табба̄йева̄ти аттхо.
2443. иччевам̣ сӣлависуддхиса̄дхане винайапит̣аке веса̄раджджахетута̄йа имасса винайавиниччхайасса сӣлависуддхиа̄дисаттависуддхипарампара̄йа адхигантаббасса аматамаха̄нибба̄насса паттийа̄пи мӯлабхӯтатам̣ дассетума̄ха ‘‘авагаччхатӣ’’тиа̄ди.
йо пана бхиккху аттхайуттам̣ махата̄ пайоджанаттхена, абхидхеййаттхена ча саманна̄гатам̣ имам̣ винайассавиниччхайам̣ авагаччхати авечча йа̄тха̄вато джа̄на̄ти, со апарампарам̣ маран̣а̄бха̄ва̄ амарам̣ джара̄йа̄бха̄ва̄ аджарам̣ ра̄га̄дикилесараджапат̣ипаккхатта̄ араджам̣ анекаппака̄рарога̄нам̣ аппаваттихетутта̄ аруджам̣ сантипадам̣ саббакилесадаратхапарил̣а̄ха̄нам̣ вӯпасамахетутта̄ сантисан̇кха̄там̣ нибба̄нападам̣ адхигаччхати сӣлависуддхиа̄дисаттависуддхипарампара̄йа гантва̄ пат̣ивиджджхатӣти йоджана̄.
ити винайаттхаса̄расандӣпанийа̄ винайавиниччхайаван̣н̣ана̄йа
бхиккхунивибхан̇гакатха̄ван̣н̣ана̄ нит̣т̣хита̄.