5. ӯнавӣсативассасиккха̄падаван̣н̣ана̄

402. пан̃чаме рӯпасиппанти херан̃н̃икасиппам̣. габбхе сайитака̄лена саддхим̣ вӣсатимам̣ вассам̣ парипун̣н̣амасса̄ти габбхавӣсо.

404. никкхаманӣйапун̣н̣ама̄сӣти са̄ван̣ама̄сасса пун̣н̣амийа̄ а̄са̄л̣хӣпун̣н̣амийа̄ анантарапун̣н̣амӣ. па̄т̣ипададивасети паччхимика̄йа вассӯпана̄йика̄йа. два̄даса ма̄се ма̄ту куччхисмим̣ васитва̄ маха̄пава̄ран̣а̄йа джа̄там̣ упасампа̄дентӣти аттхо. ‘‘тим̣са раттиндиво ма̄со, два̄дасама̄сико сам̣ваччхаро’’ти (а. ни. 3.71; 8.43; вибха. 1023) вачанато ‘‘чатта̄ро ма̄са̄ париха̄йантӣ’’ти вуттам̣. вассам̣ уккад̣д̣хантӣти вассам̣ уддхам̣ кад̣д̣ханти, ‘‘екама̄сам̣ адхикама̄со’’ти чхад̣д̣етва̄ вассам̣ упагаччхантӣти аттхо. тасма̄ татийо татийо сам̣ваччхаро терасама̄сико хоти. те две ма̄се гахетва̄ти никкхаманӣйапун̣н̣ама̄сато йа̄ва джа̄тадивасабхӯта̄ маха̄пава̄ран̣а̄. та̄ва йе две ма̄са̄ ана̄гата̄, тесам̣ аттха̄йа адхикама̄сато ладдхе две ма̄се гахетва̄. тена̄ха ‘‘йо пава̄ретва̄ вӣсативассо бхависсатӣ’’тиа̄ди. ‘‘никкан̇кха̄ хутва̄’’ти идам̣ ат̣т̣ха̄расаннам̣ васса̄нам̣ екаадхикама̄се гахетва̄ тато вӣсатийа̄ вассесупи ча̄туддасӣаттха̄йа чатуннам̣ ма̄са̄нам̣ париха̄панена саббада̄ парипун̣н̣авӣсативассатам̣ сандха̄йа вуттам̣. пава̄ретва̄ вӣсативассо бхависсатӣти маха̄пава̄ран̣а̄дивасе атикканте габбхавассена саха вӣсативассо бхависсатӣти аттхо. тасма̄ти йасма̄ габбхама̄са̄пи ган̣анӯпага̄ хонти, тасма̄. екавӣсативассоти джа̄тийа̄ вӣсативассам̣ сандха̄йа вуттам̣.

406. ан̃н̃ам̣ упасампа̄детӣти упаджджха̄йо, а̄чарийо ва̄ хутва̄ упасампа̄дети. сопӣти упасампа̄дентопи анупасампанно. ӯнавӣсативассата̄, там̣ н̃атва̄ упаджджха̄йена хутва̄ упасампа̄дананти две ан̇га̄ни.

ӯнавӣсативассасиккха̄падаван̣н̣ана̄ нит̣т̣хита̄.