6. сура̄па̄навагго

1. сура̄па̄насиккха̄падаван̣н̣ана̄

328. чхат̣т̣хаваггасса пат̣хаме па̄л̣ийам̣ кин̣н̣апаккхитта̄ти пит̣т̣хапӯва̄дим̣ апаккхипитва̄ кин̣н̣асан̇кха̄там̣ дхан̃н̃ан̇кура̄дисура̄бӣджам̣ паккхипитва̄ ката̄. самбха̄расам̣йутта̄ти са̄сапа̄дианекасамбха̄рехи сан̃н̃утта̄.

мадхуката̄лана̄л̣икера̄дипуппха̄дирасо чирапарива̄сито пуппха̄саво на̄ма. татха̄ панаса̄ди пхала̄саво. муддикарасо мадхва̄саво. уччхурасо гул̣а̄саво. типхалатикат̣ука̄дина̄на̄самбха̄ра̄нам̣ расо чирапарива̄сито самбха̄расам̣йутто. бӣджато пат̣т̣ха̄йа̄ти йатха̄вутта̄нам̣ пит̣т̣ха̄дӣнам̣ маджджаттха̄йа бха̄джане паккхиттака̄лато пат̣т̣ха̄йа.

329. лон̣асовӣракам̣ суттан̃ча анекехи даббасамбха̄рехи абхисан̇кхато бхесаджджависесо. уййуттасиккха̄пада̄нам̣ ачиттакалокаваджджесу локаваджджата̄ пуббе вуттанайа̄ва̄ти таттха кин̃чипи аватва̄ идха техи аса̄дха̄ран̣аваттхувисесасиддха̄йа ачиттакапаккхепи акусалачиттата̄йа там̣ локаваджджата̄дивисесам̣ дассетумева ‘‘ваттхуаджа̄наната̄йа четтха̄’’тиа̄дина̄ вуттанти ведитаббам̣. йам̣ панеттха ваттаббам̣, там̣ пат̣хамапа̄ра̄джикаван̣н̣ана̄йам̣ виттха̄рато са̄раттхадӣпанийам̣ вираддхат̣т̣ха̄нависодханавасена вуттанти таттхева гахетаббам̣. маджджабха̄во, тасса па̄нан̃ча̄ти има̄неттха две ан̇га̄ни.

сура̄па̄насиккха̄падаван̣н̣ана̄ нит̣т̣хита̄.

2. ан̇гулипатодакасиккха̄падаван̣н̣ана̄

330. дутийе хаса̄дхиппа̄йата̄, упасампаннасса ка̄йена ка̄йа̄масананти има̄неттха две ан̇га̄ни.

ан̇гулипатодакасиккха̄падаван̣н̣ана̄ нит̣т̣хита̄.

3. хасадхаммасиккха̄падаван̣н̣ана̄

338. татийе па̄л̣ийам̣ хасадхамме хасадхаммасан̃н̃ӣтиа̄дӣсу уплава̄диматтам̣ ким̣ хасадхаммо хотӣти гахан̣авасена сати каран̣ӣйе карийама̄нам̣ хасадхаммам̣ хасадхаммоти гахан̣авасена аттхо ведитаббо. усса̄рентоти удаке т̣хитам̣ на̄вам̣ тӣре а̄ропенто.

патануппатанава̄ресӯти удакасса упаритале ман̣д̣ӯкагатийа̄ патануппатанавасена гаманаттхам̣ кхитта̄йа екисса̄ катхала̄йа васена вуттам̣. удакасса упаригоппхаката̄, хаса̄дхиппа̄йена кӣл̣ананти две ан̇га̄ни.

хасадхаммасиккха̄падаван̣н̣ана̄ нит̣т̣хита̄.

4. ана̄дарийасиккха̄падаван̣н̣ана̄

344. чатуттхе сутта̄нуломанти маха̄падеса̄. ат̣т̣хакатха̄типи ваданти. упасампаннасса пан̃н̃аттена вачанам̣, ана̄дарийакаран̣анти две ан̇га̄ни.

ана̄дарийасиккха̄падаван̣н̣ана̄ нит̣т̣хита̄.

5. бхим̣са̄панасиккха̄падаван̣н̣ана̄

345. пан̃чаме упасампанната̄, тасса дассанасаванависайе бхим̣са̄петука̄мата̄йа ва̄йамананти две ан̇га̄ни.

бхим̣са̄панасиккха̄падаван̣н̣ана̄ нит̣т̣хита̄.

6. джотисиккха̄падаван̣н̣ана̄

354. чхат̣т̣хе ала̄там̣ патитанти аггикапа̄лато бахи патитам̣. виджджха̄танти виджджха̄там̣ ала̄там̣ капа̄лаггимхи паккхипитва̄ джа̄лентасса па̄читтийам̣, татха̄ кевалам̣ индханам̣ па̄тентассапи виджджха̄там̣ капа̄лаггим̣ мукхава̄та̄дина̄ уджджа̄лентассапи. гила̄ната̄дика̄ран̣а̄бха̄во, висиббетука̄мата̄, сама̄дахананти тӣн̣и ан̇га̄ни.

джотисиккха̄падаван̣н̣ана̄ нит̣т̣хита̄.

7. наха̄насиккха̄падаван̣н̣ана̄

357. саттаме па̄л̣ийам̣ нагаре тхакитети еттха ран̃н̃а̄ чирам̣ наха̄йитука̄мена ‘‘ахам̣ бахи уййа̄не ката̄раккхо васисса̄ми, нагарам̣ тхакетва̄ гопетха̄’’ти анун̃н̃а̄та̄, те тхаким̣сӯти дат̣т̣хаббам̣. асамбхиннена̄ти анат̣т̣хена, там̣ дивасам̣ пуна аггахита̄лан̇ка̄рена пабуддхаматтена̄ти адхиппа̄йо. маджджхимадесе ӯнакаддхама̄санаха̄нам̣, самайа̄дӣнам̣ абха̄воти две ан̇га̄ни.

наха̄насиккха̄падаван̣н̣ана̄ нит̣т̣хита̄.

8. дуббан̣н̣акаран̣асиккха̄падаван̣н̣ана̄

368. ат̣т̣хаме пат̣иладдханавачӣварена̄ти еттха пуббе акатакаппам̣ катипа̄хам̣ нива̄санаттха̄йа та̄вака̄ликавасена ладдхампи сан̇гайхатӣти ваданти.

369. ‘‘навам̣ на̄ма акатакаппа’’нти са̄ман̃н̃ато вуттатта̄ ан̃н̃ена бхиккхуна̄ каппабиндум̣ датва̄ парибхуттам̣ чӣварам̣, тена ва̄, тато лабхитва̄ ан̃н̃ена ва̄ кеначи диннампи катакаппамева навам̣ на̄ма на хотӣти дат̣т̣хаббам̣. ‘‘нива̄сетум̣ ва̄ па̄рупитум̣ ва̄’’ти вуттатта̄ ам̣сабаддхака̄са̄вампи па̄рупитаббато каппам̣ ка̄таббанти ваданти. чаммака̄ранӣлам̣ на̄ма чаммам̣ нӣлаван̣н̣ам̣ ка̄тум̣ йоджийама̄нам̣ нӣлам̣. пакатинӣламева̄ти кечи. йатха̄вуттачӣварасса акатакаппата̄, анат̣т̣хачӣвара̄дита̄, нива̄сана̄дита̄ти тӣн̣и ан̇га̄ни.

дуббан̣н̣акаран̣асиккха̄падаван̣н̣ана̄ нит̣т̣хита̄.

9. викаппанасиккха̄падаван̣н̣ана̄

374. наваме йена̄ти йена саддхим̣, йасса сантикети аттхо. са̄мам̣ викаппитасса апаччуддха̄ро, викаппанупагачӣварата̄, ависса̄сена парибхоготи тӣн̣и ан̇га̄ни.

викаппанасиккха̄падаван̣н̣ана̄ нит̣т̣хита̄.

10. чӣвараапанидха̄насиккха̄падаван̣н̣ана̄

378. дасаме па̄л̣ийам̣ антамасо хаса̄пеккхопӣти апи-саддена атхеййачиттам̣ кодхена дуккха̄петука̄мам̣, аван̣н̣ам̣ пака̄сетука̄ман̃ча сан̇гайхати. тенева ‘‘тиведана’’нти вуттам̣. упасампаннасса патта̄дӣнам̣ апанидха̄нам̣, вихесетука̄мата̄дӣти две ан̇га̄ни.

чӣвараапанидха̄насиккха̄падаван̣н̣ана̄ нит̣т̣хита̄.

нит̣т̣хито сура̄па̄навагго чхат̣т̣хо.