8. аччекачӣварасиккха̄падаван̣н̣ана̄

646. ат̣т̣хаме чхат̣т̣хийам̣ уппанначӣварасса ека̄дасама̄рун̣о чӣварака̄ле ут̣т̣ха̄тӣти а̄ха ‘‘чхат̣т̣хито пат̣т̣ха̄йа̄’’тиа̄ди, тена ча ‘‘даса̄ха̄на̄гата’’нти вуттатта̄ пан̃чамито пат̣т̣ха̄йа пун̣н̣амито пуббе дасасу арун̣есу ут̣т̣хитесупи чӣварам̣ ниссаггийам̣ на хоти. пун̣н̣амийа̄ саха ека̄даса диваса̄ лаббхантӣти еттакамева имина̄ сиккха̄падена ладдхам̣, чхат̣т̣хито пат̣т̣ха̄йа уппаннам̣ саббачӣварам̣ пат̣хамакатхинасиккха̄падавасенева йа̄ва чӣварака̄лам̣ ниссаггийам̣ на хотӣти дассети.

650. ида̄ни пат̣хамакатхина̄дисиккха̄падехи тасса тасса чӣварасса лаббхама̄нам̣ париха̄рам̣ идхева екато сампин̣д̣етва̄ дассенто ‘‘атирекачӣварасса̄’’тиа̄дима̄ха. ‘‘анаттхате катхине ека̄дасадиваса̄дхико ма̄со, аттхате катхине ека̄дасадиваса̄дхика̄ пан̃ча ма̄са̄’’ти айамева па̄т̣хо па̄л̣ийа̄ самети. кечи пана ‘‘дасадиваса̄дхико ма̄со, дасадиваса̄дхика̄ пан̃ча ма̄са̄ти па̄т̣хена бхавитабба’’нти ваданти, там̣ на йуттам̣, ан̃н̃атха̄ ‘‘нава̄ха̄на̄гата’’нти ваттаббато. йам̣ панеттха ма̄тика̄т̣т̣хакатха̄йан̃ча ‘‘ка̄ман̃чеса ‘даса̄хапарамам̣ атирекачӣварам̣ дха̄ретабба’нти имина̄ва сиддхо, ат̣т̣хуппаттивасена пана апуббам̣ вийа аттхам̣ дассетва̄ сиккха̄падам̣ т̣хапита’’нти (кан̇кха̄. ат̣т̣ха. аччекачӣварасиккха̄падаван̣н̣ана̄) ликханти, там̣ пама̄даликхитам̣ ‘‘пава̄ран̣ама̄сасса джун̣хапаккхапан̃чамито пат̣т̣ха̄йа уппаннасса чӣварасса нидха̄нака̄ло дассито хотӣ’’ти (кан̇кха̄. ат̣т̣ха. аччекачӣварасиккха̄падаван̣н̣ана̄) вуттатта̄. имамева ча пама̄даликхитам̣ гахетва̄ бхадантабуддхадатта̄чарийена ча ‘‘париха̄рекама̄сова, даса̄хапарамо мато’’тиа̄ди вуттанти гахетаббам̣.

аччекачӣварасадисе ан̃н̃асминти пуббе адхит̣т̣хите уппаннака̄ла̄ка̄ра̄ди са̄дисена аччекачӣварасадисе ан̃н̃асмим̣ чӣваре аччекачӣварасан̃н̃а̄йа чӣварака̄лам̣ атиккаметӣти аттхо. теневеттха дуккат̣ам̣, ана̄патти ча вутта̄, итаратха̄ тӣсупи падесу па̄читтийассева ваттаббато. аначчекачӣварампи хи чӣварака̄лам̣ атиккамайато па̄читтийамева аччекачӣвараттике вийа̄ти дат̣т̣хаббам̣. викаппанупагапаччхимаппама̄н̣асса аччекачӣварасса аттано сантаката̄, даса̄ха̄на̄гата̄йа каттикатема̄сипун̣н̣ама̄йа уппаннабха̄во, анадхит̣т̣хитаавикаппитата̄, чӣварака̄ла̄тиккамоти има̄неттха чатта̄ри ан̇га̄ни.

аччекачӣварасиккха̄падаван̣н̣ана̄ нит̣т̣хита̄.