5. чӣварааччхинданасиккха̄падаван̣н̣ана̄

631. пан̃чаме йампи…пе… аччхиндӣти еттха йам̣ те ахам̣ чӣварам̣ ада̄сим̣, там̣ ‘‘майа̄ саддхим̣ паккамиссатӣ’’ти сан̃н̃а̄йа ада̄сим̣, на ан̃н̃атха̄ти купито аччхиндӣти евам̣ аджджха̄харитва̄ йоджетаббам̣.

633. екам̣ дуккат̣анти йади а̄н̣атто авассам̣ аччхиндати, а̄н̣аттиккхан̣е па̄читтийамева. йади на аччхиндати, тада̄ ева дуккат̣анти дат̣т̣хаббам̣. екава̄ча̄йа самбахула̄ а̄паттийоти йади а̄н̣атто анантара̄йена аччхиндати, а̄н̣аттиккхан̣ейева ваттхуган̣ана̄йа па̄читтийаа̄паттийо пайогакаран̣аккхан̣ейева а̄паттийа̄ а̄паджджитаббато, чӣварам̣ пана аччхиннейева ниссаггийам̣ хоти. йади со на аччхиндати, а̄н̣аттиккхан̣е екамева дуккат̣анти дат̣т̣хаббам̣. евам̣ ан̃н̃аттха̄пи ӣдисесу найо н̃а̄таббо.

635. упаджджхам̣ ган̣хиссатӣти са̄ман̣ерасса да̄нам̣ дӣпети, тена ча са̄ман̣ерака̄ле датва̄ упасампаннака̄ле аччхиндатопи па̄читтийам̣ дӣпети. ‘‘бхиккхусса са̄мам̣ чӣварам̣ датва̄’’ти идам̣ уккат̣т̣хавасена вуттам̣. а̄хара̄петум̣ пана ват̣т̣атӣти камме акате бхатисадисатта̄ вуттам̣. викаппанупагапаччхимачӣварата̄, са̄мам̣ динната̄, сакасан̃н̃ита̄, упасампанната̄, кодхавасена аччхинданам̣ ва̄ аччхинда̄панам̣ ва̄ти има̄неттха пан̃ча ан̇га̄ни.

чӣварааччхинданасиккха̄падаван̣н̣ана̄ нит̣т̣хита̄.