8. пат̣хамаупаккхат̣асиккха̄падаван̣н̣ана̄

528-531. ат̣т̣хаме йо катта̄ти да̄йакам̣ сандха̄йа вуттам̣. пат̣о ева пат̣ако. ‘‘аппаггхам̣ чета̄петӣ’’ти идам̣ ниссаггийапа̄читтийа̄ ана̄паттим̣ сандха̄йа вуттам̣, вин̃н̃аттипаччайа̄ пана дуккат̣амева. ‘‘пуббе аппава̄рито’’ти хи сутте вин̃н̃аттика̄ран̣ам̣ вуттам̣. ма̄тика̄т̣т̣хакатха̄йампи ‘‘чӣваре бхиййокамйата̄, ан̃н̃а̄такавин̃н̃атти, та̄йа ча пат̣ила̄бхоти има̄неттха тӣн̣и ан̇га̄нӣ’’ти (кан̇кха̄. ат̣т̣ха. упаккхат̣асиккха̄пада) ан̃н̃а̄такавин̃н̃аттита̄ пака̄сита̄, кечи пана ‘‘да̄йакена да̄тука̄момхӣти аттано сантике авуттепи йадаггханакам̣ со да̄тука̄мо, тадаггханакам̣ а̄хара̄петум̣ ват̣т̣ати ева̄’’ти ваданти, там̣ ра̄джасиккха̄падат̣т̣хакатха̄йапи на самети, дӯтена ва̄ да̄йакена ва̄ ‘‘а̄йасмантам̣ уддисса чӣварачета̄паннам̣ а̄бхата’’нти а̄рочитепи мукхавеват̣ийакаппийака̄рака̄дӣнам̣ сантика̄ а̄хара̄панасса таттха пат̣иккхиттатта̄. вуттан̃хи таттха ‘‘име две аниддит̣т̣хакаппийака̄рака̄ на̄ма, етесу ан̃н̃а̄такааппава̄ритесу вийа пат̣ипаджджитаббам̣…пе… на кин̃чи ваттабба̄. десана̄маттамева четам̣ ‘дӯтена чӣварачета̄паннам̣ пахин̣еййа̄’ти сайам̣ а̄харитва̄пи пин̣д̣апа̄та̄дӣнам̣ аттха̄йа дадантесупи есева найо’’ти. мукхавеват̣ийакаппийака̄рака̄дайо хи да̄йакена париччаттепи ваттхумхи ‘‘асукасса сантике чӣварапин̣д̣апа̄та̄дим̣ ган̣хатха̄’’ти аниддит̣т̣хатта̄ ева ‘‘на кин̃чи ваттабба̄’’ти вуттам̣, на пана тасса ваттхуно мукхавеват̣ийа̄дӣнам̣ сантакатта̄, тасма̄ идха̄пи да̄йакена ва̄ дӯтена ва̄ ‘‘йам̣ иччхатха, там̣ вадатха̄’’ти аппава̄ритасса вадато дуккат̣амева. аггхавад̣д̣ханаканти чӣваре аггхавад̣д̣ханакам̣ нисса̄йа паваттам̣ идам̣ сиккха̄падам̣, на пин̣д̣апа̄та̄дӣсу тесу аггхавад̣д̣ханасса дуккат̣аматтатта̄, пан̣ӣтапин̣д̣апа̄те суддхикапа̄читтийатта̄ ча̄ти гахетаббам̣. тенева ‘‘чӣваре бхиййокамйата̄’’ти ан̇гам̣ вуттам̣.

пат̣хамаупаккхат̣асиккха̄падаван̣н̣ана̄ нит̣т̣хита̄.