4. пат̣ипаттиваггаван̣н̣ана̄

31-40. айа̄тха̄вапат̣ипатти, на йатха̄пат̣ипатти, хетумхипи пхалепи айа̄тха̄ваваттхуса̄дханато. екам̣ суттам̣ дхаммавасена катхитам̣ пат̣ипаттивасена. екам̣ суттам̣ пуггалавасена катхитам̣ пат̣ипаннакавасена. сам̣са̄рамахогхасса паратӣрабха̄вато йо нам̣ адхигаччхати, там̣ па̄рети гаметӣти па̄рам̣, нибба̄нам̣, таббидхурата̄йа наттхи еттха па̄ранти апа̄рам̣, сам̣са̄роти вуттам̣ – ‘‘апа̄ра̄па̄ранти ват̣т̣ато нибба̄на’’нти. па̄ран̇гата̄ти асеккхе сандха̄йа. йепи гаччхантӣти секкхе. йепи гамиссантӣти калйа̄н̣апутхуджджане. па̄рага̄миноти еттха кита-саддо тика̄лава̄чӣти евам̣ вуттам̣.

тӣранти ориматӣрама̄ха. тена вуттам̣ ‘‘ват̣т̣амева анудха̄ватӣ’’ти. екантака̄л̣акатта̄ читтасса апабхассарабха̄вакаран̣ато кан̣ха̄бхиджа̄тихетуто ча вуттам̣ ‘‘кан̣ханти акусаладхамма’’нти. вода̄набха̄вато читтасса пабхассарабха̄вакаран̣ато сукка̄бхиджа̄тихетуто ча вуттам̣ – ‘‘сукканти кусаладхамма’’нти. килесама̄ра-абхисан̇кха̄рама̄ра-маччума̄ра̄нам̣ паваттит̣т̣ха̄ната̄йа окам̣ вуччати ват̣т̣ам̣, таббидхурата̄йа аноканти нибба̄нанти а̄ха – ‘‘ока̄ аноканти ват̣т̣ато нибба̄на’’нти.

параматтхато саман̣а̄ вуччанти арийа̄, саман̣а̄нам̣ бха̄во са̄ман̃н̃ам̣, арийамагго, тена аран̣ӣйато упагантаббато са̄ман̃н̃аттхо нибба̄нанти а̄ха – ‘‘са̄ман̃н̃аттханти нибба̄нам̣, там̣ хӣ’’тиа̄ди. брахман̃н̃аттханти еттха̄пи имина̄ найена аттхо ведитаббо. брахман̃н̃ена арийамаггена. ра̄гаккхайоти еттха ити-саддо а̄дисаддаттхо. тена ‘‘досаккхайо мохаккхайо’’ти пададвайам̣ сан̇ган̣ха̄ти. ват̣т̣атийева̄ти ваданти ‘‘ра̄гаккхайо’’ти. парийа̄йена хи арахаттасса ваттаббатта̄ти.

пат̣ипаттиваггаван̣н̣ана̄ нит̣т̣хита̄.