8. а̄диттапарийа̄йасуттаван̣н̣ана̄

235. килеса̄нам̣ ану ану бйан̃джанато парибйаттийа̄ уппаттипаччайабха̄вато анубйан̃джанам̣, хаттхапа̄да̄диавайава̄ти а̄ха – ‘‘хаттха̄ собхана̄’’тиа̄ди. нимиттагга̄хоти килесуппаттийа̄ нимиттабхӯто га̄хо. сам̣сандетва̄ гахан̣анти авайаве самодха̄нетва̄ ‘‘иттхипурисо’’тиа̄дина̄ екаджджхам̣ гахан̣ам̣. вибхаттигахан̣анти вибха̄гена анавасесаггахан̣ам̣. кумбхӣласадисоти кумбхӣлага̄хасадисо. тена̄ха – ‘‘саббамева ган̣ха̄тӣ’’ти хаттхапа̄да̄дӣсу там̣ там̣ кот̣т̣ха̄сам̣ вибхаджитва̄ гахан̣ам̣ раттапа̄садисо джалӯкага̄хасадисо. екаджаванава̄репи лаббхантӣти идам̣ чаккхудва̄ра̄нуса̄рена уппаннаманодва̄рикаджаванам̣ сандха̄йа вуттам̣.

нимиттасса̄дена гантхитанти йатха̄вутте нимитте асса̄дага̄хена гантхитам̣ самбаддхам̣. бхаван̇генева̄ти мӯлабхаван̇генева. килесабхайам̣ дассентоти татха̄ килесуппаттийа̄ сати акусалачиттена антаритам̣ че маран̣ачиттам̣ бхавеййа, екантато нирайе ва̄ тираччха̄найонийа̄ ва̄ уппатти сийа̄ти килеса̄нам̣ бха̄йитаббам̣ дассенто. ‘‘самайавасена ва̄ евам̣ вутта’’нти ватва̄ таматтхам̣ виваранто ‘‘чаккхудва̄расмин̃хӣ’’тиа̄дима̄ха. раттачиттам̣ ва̄ти ра̄гавасена раттачиттам̣ ва̄. дут̣т̣хачиттена катхам̣ а̄рамман̣араса̄нубхавананти? доманассаведануппатти ева тасса а̄рамман̣араса̄нубхаванам̣ дат̣т̣хаббам̣. имасса самайасса̄ти маран̣асамайасса.

убхиннам̣ на̄саччхидда̄нам̣ маджджхе т̣хита-ат̣т̣хитуданам̣ саха кхурат̣т̣хена чхинданам̣. дан̣д̣акава̄сӣти дӣгхадан̣д̣ака̄ маха̄ва̄си. нипаджджитва̄ ниддоккамананти имина̄ пачала̄йиканиддам̣ пат̣иккхипати. таттха хи када̄чи антара̄ миччха̄витакка̄нам̣ саллака̄нам̣ авасаро сийа̄, наттхева нипаджджитва̄ маха̄ниддам̣ оккантака̄ле. витакка̄нанти миччха̄витакка̄нам̣.

а̄диттапарийа̄йасуттаван̣н̣ана̄ нит̣т̣хита̄.