6-7. антева̄сикасутта̄диван̣н̣ана̄

151-152. анта-саддо самӣпаттхе ваттати ‘‘удакантам̣ вананта’’нтиа̄дӣсу, килесо пана атиа̄санне васати аббхантаравуттита̄йа̄ти ‘‘антева̄сика’’нти вутто вибхаттиалопена йатха̄ ‘‘ванекусало, кӯлеруккха̄’’ти. тена̄ха – ‘‘анантева̄сиканти антовасанакилесавирахита’’нти. а̄чаран̣акакилесавирахитанти самуда̄чаран̣акилесарахитам̣. анто асса васантӣти асса пуггаласса анто аббхантаре читте васанти паваттанти. те етам̣ адхибхавантӣти те килеса̄ етам̣ пуггалам̣ абхибхавитва̄ аттано васе ваттенти. тена̄ха – ‘‘аджджхоттхаранти сиккха̄пенти ва̄’’ти. техи а̄чарийехӣти техи килесасан̇кха̄техи сатте аттано гатийам̣ т̣хапентехи а̄чарийехи. саттамам̣ хет̣т̣ха̄ катхитанайамева̄ти йасма̄ хет̣т̣ха̄ кхандхавасена десана̄ а̄гата̄, идха а̄йатанавасена̄ти айамева висесо.

антева̄сикасутта̄диван̣н̣ана̄ нит̣т̣хита̄.