1. камманиродхасуттаван̣н̣ана̄

146. сампати виджджама̄насса чаккхусса там̣ниббаттасса каммасса ча адхиппетатта̄ ‘‘на чаккху пура̄н̣ам̣, каммамева пура̄н̣а’’нти ватва̄ йатха̄ тасса чаккхусса пура̄н̣апарийа̄йо вутто, там̣ дассенто а̄ха – ‘‘каммато пана̄’’тиа̄ди. паччайана̄мена̄ти пуримаджа̄тисам̣сиддхатта̄ ‘‘пура̄н̣а’’нти ваттаббасса паччайабхӯтасса каммасса на̄мена. евам̣ вуттанти ‘‘пура̄н̣акамма’’нти евам̣ вуттам̣. паччайехи абхисама̄гантва̄ катанти тан̣ха̄виджджа̄дипаччайехи абхимукхабха̄вена сама̄гантва̄ самечча ниббаттитам̣. четана̄йа̄ти каммачетана̄йа. пакаппитанти абхисамӣхитам̣. ведана̄йа̄ти атта̄нам̣ нисса̄йа а̄рамман̣ам̣ катва̄ паватта̄йа ведана̄йа. ваттхӯти ниббаттика̄ран̣ам̣ паваттат̣т̣ха̄нанти випассана̄пан̃н̃а̄йа пасситаббам̣. каммасса ниродхена̄ти килеса̄нам̣ ануппа̄даниродхасиддхена каммасса ниродхена. вимуттим̣ пхусатӣти арахаттапхалавимуттим̣ па̄пун̣а̄ти. а̄рамман̣абхӯто ниродхо нибба̄нам̣ ‘‘камманиродхо’’ти вуччати, ‘‘каммам̣ нируджджхати еттха̄’’ти катва̄. ‘‘джха̄йатха, бхиккхаве, ма̄ пама̄даттха̄’’ти вуттатта̄ ‘‘пуббабха̄гавипассана̄ катхита̄’’ти вуттам̣.

камманиродхасуттаван̣н̣ана̄ нит̣т̣хита̄.