2. кхан̣асуттаван̣н̣ана̄

135. чхапхасса̄йатаника̄ти чхахи пхасса̄йатанехи анит̣т̣хасам̣веданийа̄. чхадва̄рапхассапат̣ивин̃н̃аттӣти чхахипи два̄рехи а̄рамман̣асса пат̣исам̣ведана̄ хотийева саббасо дуккха̄нубхаванаттхам̣. та̄ватим̣сапуранти судассанамаха̄нагарам̣. абха̄во на̄ма наттхи саббатха̄ сукха̄нубхаванато. нирайети имина̄ дуггати бхаваса̄ман̃н̃ена итара̄па̄йа̄пи гахита̄ ева. маггабрахмачарийава̄сам̣ васитум̣ на сакка̄ти имина̄ пана саббесампи аччхиндикат̣т̣ха̄на̄нам̣ гахан̣ам̣ дат̣т̣хаббам̣. имева̄ти имасмим̣ мануссалоке ева. апа̄йопи пан̃н̃а̄йати апа̄йадуккхасадисасса дуккхасса када̄чи пат̣исам̣веданато. саггопи пан̃н̃а̄йати девабхогасадисасампаттийа̄ када̄чи пат̣илабхитаббато.

айам̣ каммабхӯмӣти айам̣ мануссалоко пурисатха̄макаран̣а̄йа каммабхӯми на̄ма та̄сам̣ йогйат̣т̣ха̄набха̄вато. таттха падха̄накаммам̣ дассенто ‘‘идха маггабха̄вана̄’’ти а̄ха. т̣ха̄на̄нӣти ка̄ран̣а̄ни. сам̣веджанийа̄нӣти сам̣вегаджанана̄ни бахӯни джа̄тиа̄дӣни. татха̄ хи джа̄ти, джара̄, бйа̄дхи, маран̣ам̣, апа̄йабхавам̣, таттхапи нирайӯпапаттихетукам̣, тираччха̄нупапаттихетукам̣, асӯрака̄йӯпапаттихетукам̣, атӣте ват̣т̣амӯлакам̣, ана̄гате ват̣т̣амӯлакам̣, паччуппанне а̄ха̄рапарийет̣т̣химӯлаканти бахӯни сам̣вегаваттхӯни паччавеккхитва̄ сам̣вегаджа̄то сан̃джа̄тасам̣вего йонисо падха̄намануйун̃джассу. сам̣вега̄ти сам̣вегама̄паджджассу.

кхан̣асуттаван̣н̣ана̄ нит̣т̣хита̄.