13. джха̄насам̣йуттам̣

1. сама̄дхимӯлакасама̄паттисуттаван̣н̣ана̄

662. сама̄дхикусалоти сама̄дхисмим̣ кусало. тайидам̣ сама̄дхикосаллаттам̣ саха джха̄нан̇гайогена чатуббидхо джха̄насама̄дхи, тасма̄ там̣ там̣ вибха̄гам̣ джа̄нантасса сиддхам̣ хотӣти а̄ха – ‘‘пат̣хамам̣ джха̄на’’нтиа̄ди. таттха витаккавича̄рапӣтисукхекаггата̄васена пат̣хамам̣ пан̃чан̇гикам̣, пӣтисукхекаггата̄васена дутийам̣ тиван̇гикам̣, сукхекаггата̄васена татийам̣ дуван̇гикам̣, упеккхекаггата̄васена чатуттхам̣ дуван̇гикамева̄ти евам̣ тасмим̣ тасмим̣ джха̄не там̣там̣ан̇га̄нам̣ ваваттха̄не кусало. сама̄паттикусалоти сама̄паджджане кусало. ха̄сетва̄ти тосетва̄. каллам̣ катва̄ти сама̄дха̄насса пат̣ипаккхадхамма̄нам̣ дӯрӣкаран̣ена сахака̄рӣка̄ран̣ан̃ча сама̄дха̄нена сама̄паджджане читтам̣ саматтхам̣ катва̄. сесапада̄нӣти сеса̄ тайо кот̣т̣ха̄са̄. татийа̄дӣсу найесу акусалопи джха̄наттха̄йа пат̣ипаннатта̄ ‘‘джха̄йӣтева̄’’ти вутто.

сама̄дхимӯлакасама̄паттисуттаван̣н̣ана̄ нит̣т̣хита̄.

2-55. сама̄дхимӯлакат̣хитисутта̄диван̣н̣ана̄

663-716. дутийа̄дисуттесу т̣хитикусалоти еттха антогадхахетуаттхо т̣хити-саддо, тасмин̃ча пана кусалоти аттхоти а̄ха – ‘‘джха̄нам̣ т̣хапетум̣ акусало’’ти. саттат̣т̣хааччхара̄маттанти саттат̣т̣хааччхара̄маттам̣ кхан̣ам̣ джха̄нам̣ т̣хапетум̣ на саккоти адхит̣т̣ха̄навасӣбха̄васса аниппха̄дитатта̄. йатха̄париччхедена ка̄лена вут̣т̣ха̄тум̣ на саккоти вут̣т̣ха̄навасӣбха̄васса аниппха̄дитатта̄. каллам̣ джа̄там̣ асса̄ти каллитам̣, тасмим̣ каллите каллитабха̄вена касин̣а̄рамман̣есу ‘‘идам̣ на̄ма асукасса̄’’ти висайавасена сама̄паджджитум̣ асакконто на сама̄дхисмим̣ а̄рамман̣акусало. на сама̄дхисмим̣ гочаракусалоти сама̄дхисмим̣ ниппха̄дитаббе тасса гочаре каммат̣т̣ха̄насан̃н̃ите паваттит̣т̣ха̄не бхиккха̄ча̄рагочаре ча сатисампаджан̃н̃авирахито акусало. кечи пана ‘‘каммат̣т̣ха̄нагочаро пат̣хамаджджха̄на̄дикам̣, ‘евам̣ сама̄паджджитаббам̣, евам̣ бахулӣка̄табба’нти аджа̄нанто таттха акусало на̄ма̄’’ти ваданти. каммат̣т̣ха̄нам̣ абхинӣхаритунти каммат̣т̣ха̄нам̣ висесабха̄гийата̄йа абхинӣхаритум̣ акусало. саккаччака̄рӣти читтӣка̄рӣ. са̄таччака̄рӣти нийатака̄рӣ. сама̄дхисса упака̄ракадхамма̄ти аппана̄косалла̄. сама̄паттиа̄дӣхӣти а̄ди-саддена саккаччака̄рипада̄дӣнам̣йева сан̇гахо дат̣т̣хаббо чатукка̄нам̣ вуттатта̄. тена̄ха ‘‘йоджетва̄ чатукка̄ вутта̄’’ти. локийаджджха̄навасенева катхитам̣ ‘‘сама̄дхикусало’’тиа̄дина̄ найена десана̄йа паваттатта̄. на хи локуттарадхаммесу акосаллам̣ на̄ма лаббхати. йади акосаллам̣, на кусаласаддена висеситаббата̄ сийа̄ти.

сама̄дхимӯлакат̣хитисутта̄диван̣н̣ана̄ нит̣т̣хита̄.

джха̄насам̣йуттаван̣н̣ана̄ нит̣т̣хита̄.

нит̣т̣хита̄ ча са̄раттхаппака̄синийа̄

сам̣йуттаника̄йа-ат̣т̣хакатха̄йа кхандхаваггаван̣н̣ана̄.