236. н̃аттивипаннакамма̄дикатха̄

385. ан̃н̃атра̄пи дхамма̄ти еттха дхамма̄ти упайогаттхе ниссаккавачанаметанти а̄ха ‘‘ан̃н̃атра дхамма’’нти. ‘‘ан̃н̃атра̄’’ти нипа̄тапайоге дутийа̄татийа̄пан̃чамӣсу ан̃н̃атарасса самбхавато упайогавачанампи хоти. тасма̄ вуттам̣ ‘‘айамева ва̄ па̄т̣хо’’ти. ‘‘бхӯтена ваттхуна̄’’ти имина̄ дхаммасаддасса саччаттхам̣ дассети. ‘‘есева найо’’ти имина̄ саддасабха̄вамева сандха̄йа атидисати, на аттхам̣. тена вуттам̣ ‘‘еттха пана̄’’тиа̄ди. саттхуса̄сананти саттху а̄н̣а̄. саттхуа̄н̣а̄ на̄ма н̃аттиануса̄вана̄нам̣ сампада̄ти а̄ха ‘‘н̃аттисампада̄ ануса̄ванасампада̄ ча̄’’ти. ‘‘пат̣икут̣т̣хан̃чева катан̃ча̄’’ти имина̄ пат̣икут̣т̣хакатанти падасса двандава̄кйам̣ дассети. пат̣икуситаббанти пат̣икут̣т̣хам̣, каттаббанти катам̣, каммам̣. тамеваттхам̣ дассенто а̄ха ‘‘йам̣ ан̃н̃есӯ’’тиа̄ди. таттха йанти каммам̣.

387. па̄л̣ийа̄ти винайапа̄л̣ийа̄. йанти каммам̣, на карийатӣти самбандхо. еттха̄ти ат̣т̣хакатха̄йам̣. со ча кхоти со ча виттха̄ро, а̄гатоти самбандхо. касма̄ н̃аттидутийан̃аттичатуттхакамма̄намева васена а̄гато, нану н̃аттиапалоканакаммавасенапи а̄гатена бхавитаббанти а̄ха ‘‘йасма̄ пана̄’’тиа̄ди. н̃аттидутийан̃аттичатуттхесу ха̄панам̣ ва̄ ан̃н̃атха̄ каран̣ам̣ ва̄ аттхи вийа н̃аттикамме наттхӣти йоджана̄. н̃аттикамме н̃аттит̣т̣хапанато ан̃н̃акиччасса асамбхавато ха̄панам̣ ва̄ ан̃н̃атха̄ каран̣ам̣ ва̄ наттхӣти адхиппа̄йо. та̄нӣти н̃аттикаммаапалоканакамма̄ни. саббесампи камма̄нанти саббесампи чатуннам̣ камма̄нам̣. паратоти парасмим̣ парива̄ра̄васа̄не (пари. ат̣т̣ха. 482).