28. чораваттхукатха̄

91. дит̣т̣хапубботи ан̇гулима̄ло пуббе дит̣т̣хо. айанти чоро. соти ан̇гулима̄ло. ан̃н̃есам̣ сантика̄ вачанам̣ сун̣антӣти йоджана̄. тети манусса̄. уббиджджантипӣти ка̄йена уббиджджантипи. уттасантипӣти читтена уттасантипи. ан̇гулима̄ло бхиккхӯхи на пабба̄джито, нану бхагавата̄ пана сайам̣ пабба̄джито, атха касма̄ ‘‘на бхиккхаве’’ти вуттанти а̄ха ‘‘бхагава̄ сайам̣ дхаммасса̄мӣ’’ти. дхаммасса̄мӣти ча дхаммасса иссаро, дхаммена ва̄ деваманусса̄нам̣ иссаро, адхипатӣти аттхо. бхиккхӯнам̣ акаран̣аттха̄йа бхиккхӯнам̣ сиккха̄паданти йоджана̄. таттха̄ти ‘‘на бхиккхаве’’тиа̄дивачане. ‘‘дхаджам̣ бандхитва̄’’тиа̄дина̄ дхаджасса бандханам̣ дхаджабандхо, дхаджабандхо вийа̄ти дхаджабандхо, дхаджабандхо хутва̄ чаратӣти дхаджабандхоти вачанаттхам̣ дассети. тасма̄ти йасма̄ дхаджабандхо, тасма̄. йоти чоро. пантхадуханам̣ ва̄ти пантхе духанам̣ ва̄. пан̃н̃а̄йати ча̄ти еттха часаддо ва̄кйасампин̣д̣анаттхо. на кевалан̃хи вичаратийева, атха кхо пан̃н̃а̄йати ча̄ти аттхо. иданти чоракаммам̣. раджджанти ра̄джабха̄вам̣. соти ра̄джапутто. хӣти саччам̣, йасма̄ ва̄. тасминти ра̄джапутте. пуббети пуббака̄ле. танти чорам̣. еванти имина̄ка̄рена, джа̄нанти чети йоджана̄. адиссама̄на̄ти атта̄нам̣ апан̃н̃а̄йама̄на̄. идам̣ сандхиччхеда̄дичоре сандха̄йа вуттам̣, на амбалабуджа̄дичоре. паччха̄пӣти тхеййакаран̣ато паччха̄пи. тепӣти чорепи.

92. бхайена̄ти бхайато. ете пана̄ти бхиккхӯ пана. ладдха̄бхайатта̄ти ра̄джато ладдхо абхайо имехӣти ладдха̄бхайа̄, тесам̣ бха̄во ладдха̄бхайаттам̣, тасма̄. ка̄рабхедакоти еттха ка̄расаддо руккхависесе =09 ча сакка̄ре ча бандхана̄лайе ча паваттати, идха пана бандхана̄лайети дассенто а̄ха ‘‘ка̄рам̣ вуччати бандхана̄га̄ра’’нти. бандхана̄га̄ран̃хи каронти там̣ павесите джане хим̣санти еттха̄ти ‘‘ка̄ра̄’’ти вуччати. идха̄ти ‘‘ка̄рабхедако’’типаде. дӣпабандханам̣ ва̄ хотӯти йоджана̄. имехи падехи на кевалам̣ бандхана̄га̄рам̣йева ка̄ра̄ на̄ма хоти, атха кхо андубандхана̄дӣнипи ка̄ра̄йева на̄ма̄ти дассети. йоти чоро. етесӯти бандханесу. мун̃читва̄ ва̄ти раджджубандханам̣ ниббет̣хетва̄ ва̄. имехи падехи на кевалам̣ ка̄ра̄йа бхинданато ева ка̄рабхедако на̄ма хоти, атха кхо чхинданамун̃чанавиваран̣ехипи ка̄рабхедакойева на̄ма̄ти дассети. дӣпантаранти бандханадӣпато антарам̣ ан̃н̃ам̣ дӣпанти аттхо. чаккава̄л̣абандханам̣ бхиндитва̄ чаккава̄л̣антарам̣ гато ат̣т̣хакатха̄йам̣ на вутто. соти начорако. га̄манигамапат̣т̣ана̄дӣнӣти еттха пат̣т̣ананти на̄ва̄пат̣т̣анам̣, сакат̣апат̣т̣анан̃ча. кен̣ийа̄ти ран̃н̃о да̄таббаа̄йена. танти кен̣им̣. нидха̄нанти никкхан̣итва̄ т̣хапитам̣ дханам̣. упасам̣харитва̄ти ра̄джа̄дӣнам̣ сантикам̣ харитва̄. танти касикамма̄дӣхи сампа̄детва̄ джӣвантам̣. таттхева̄ти бандха̄питат̣т̣ха̄нейева.

93. йаттха̄ти йасмим̣ т̣ха̄не. йо кочи пала̄тоти самбандхо. нанти йам̣ кин̃чи джанам̣, ликха̄петӣти йоджана̄. пан̣н̣е ва̄ти кусе ва̄. асса̄ти джанасса. дан̣д̣анти дханадан̣д̣ам̣. ликхитакоти ликхитабботи ликхито, сойева ликхитако.

94. йо пана каса̄хи хан̃н̃атӣти самбандхо. имина̄ ан̃н̃ехи каса̄хи хан̃н̃атӣти каса̄хатоти вачанаттхам̣ дассети. ‘‘айамева те дан̣д̣о хотӯ’’ти имина̄ катам̣ дан̣д̣акаммам̣ имасса̄ти катадан̣д̣акаммоти вачанаттхам̣ дассети. аллаван̣оти тинтаван̣о. гха̄тетва̄ти ханитва̄ пахаритва̄ти аттхо. ган̣д̣иган̣д̣ийоти пхот̣апхот̣а̄. саннисинна̄сӯти ган̣д̣ӣсу пакатисарӣрена самам̣ нисинна̄су.

95. катадан̣д̣акаммабха̄во та̄ва пуриманайенева ведитаббо хоту, катхам̣ пана лаккхан̣а̄хатабха̄во ведитабботи а̄ха ‘‘йасса пана̄’’тиа̄ди. таттха таттена̄ти та̄пена. лаккхан̣анти сан̃н̃а̄н̣ам̣. соти джано. бхуджиссоти бхуджо етассаттхӣти бхуджиссо (ма. ни. т̣ӣ. 2.426). парехи апа̄лито ча анаджджхохара̄пито ча хутва̄ сайамева атта̄нам̣ па̄ланена ча бходжанам̣ аджджхохаран̣ена ча саманна̄гатоти вуттам̣ хоти. асса̄ти лаккхан̣а̄хатасса. ван̣а̄ти арӯни. та̄ни хи йасма̄ ван̣анти гатта̄ни вичун̣н̣а̄ни каронти, тасма̄ ван̣а̄ти вуччанти. рӯл̣ха̄ти тарун̣амам̣сена руха̄. тиман̣д̣алаваттхасса лаккхан̣а̄хатасса джанасса̄ти самбандхо.