3. татийапа̄т̣идесанӣйасиккха̄падам̣

562. татийе ‘‘убхато’’ти еттха каран̣аттхе тоти а̄ха ‘‘двӣхӣ’’ти. ‘‘убхатопасанна’’нти бйа̄сопи сама̄сопи йуттойева, сама̄се топаччайасса алопо хоти. ‘‘убхато’’типадасса сарӯпам̣ дассетум̣ вуттам̣ ‘‘упа̄сакенапи упа̄сика̄йапӣ’’ти. касма̄ убхато пасаннам̣ хотӣти а̄ха ‘‘тасмим̣ кира̄’’тиа̄ди. йасма̄ тасмим̣ куле…пе… сота̄панна̄йева хонти кира, тасма̄ ‘‘убхатопасанна’’нти вуттам̣ хоти. ‘‘сачепӣ’’ти еттха писаддена асӣтикот̣идханато адхикампи сампин̣д̣ети. ха̄йанасса ка̄ран̣ам̣ дассети ‘‘йасма̄’’тиа̄дина̄.

569. ‘‘гхарато нӣхаритва̄’’ти еттха ‘‘нӣхаритва̄’’ти падасса каммам̣ дассетум̣ вуттам̣ ‘‘а̄санаса̄лам̣ ва̄ виха̄рам̣ ва̄’’ти. ‘‘а̄нетва̄’’тиимина̄ нӣпуббахарадха̄туйа̄ аттхам̣ дассети. два̄рети аттано гехадва̄рети. татийам̣.