8. ба̄хитикасуттаван̣н̣ана̄

359. са̄ваджджата̄йа упа̄рамбхам̣ арахатӣти опа̄рамбхо. тена̄ха ‘‘досам̣ а̄ропана̄рахо’’ти. ба̄ла̄ упа̄рамбхаваттхуман̃н̃ам̣ амӯлакампи нам̣ а̄ропента̄ уггхосенти, тасма̄ те ана̄маситва̄ ‘‘вин̃н̃ӯхӣ’’ти идам̣ падам̣ гахетва̄ пан̃хена н̃а̄тум̣ иччхитена аттхена упа̄рамбха̄дӣнам̣ упари уттарам̣ парипӯретум̣ на̄саккхимха̄. там̣ ка̄ран̣анти там̣ уппаттика̄ран̣ам̣. йади хи майа̄ ‘‘вин̃н̃ӯхӣ’’ти падам̣ паккхипитва̄ вуттам̣ бхавеййа, пан̃ха̄ ме парипун̣н̣а̄ бхавеййа, на пана вутта̄. ида̄ни пана там̣ ка̄ран̣ам̣ уттарам̣ а̄йасмата̄ а̄нандена ‘‘вин̃н̃ӯхӣ’’ти евам̣ вадантена парипӯритам̣.

360. косаллапат̣ипаккхато акосаллам̣ вуччати авиджджа̄, там̣самут̣т̣ха̄нато акосалласамбхӯто. аваджджам̣ вуччати гарахитаббам̣, саха аваджджехӣти са̄ваджджо, га̄райхо. ра̄га̄дидосехи садосо. техи ева сабйа̄баджджхо, тато ева сампати а̄йатин̃ча садуккхо. сабйа̄баджджха̄дико ниссандавипа̄ко.

татха̄ аттхо вутто бхавеййа̄ти пуччха̄сабха̄генапи аттхо вутто бхавеййа, пуччхантасса пана на та̄ва читта̄ра̄дханам̣. тена̄ха – ‘‘евам̣ бйа̄каран̣ам̣ пана на бха̄рийа’’нти, гарукаран̣ам̣ на хоти виса̄раджджам̣ на сийа̄ти адхиппа̄йо. тена̄ха – ‘‘аппахӣнаакусалопи хи паха̄нам̣ ван̣н̣еййа̄’’ти. еварӯпо пана йатха̄ка̄рӣ татха̄ва̄дӣ на хоти, на евам̣ бхагава̄ти а̄ха ‘‘бхагава̄’’тиа̄ди. евам̣ бйа̄ка̄сӣти ‘‘сабба̄кусаладхаммапахӣно кхо, маха̄ра̄джа, татха̄гато’’ти евам̣ бйа̄ка̄си. суккапаккхепи есева найоти имина̄ ‘‘саббесам̣йева кусала̄нам̣ дхамма̄нам̣ упасампадам̣ ван̣н̣етӣ’’ти вутте йатха̄ пуччха̄, татха̄ аттхо вутто бхавеййа, евам̣ бйа̄каран̣ам̣ пана на бха̄рийам̣, асампа̄дитакусаладхаммопи упасампадам̣ ван̣н̣еййа. бхагава̄ пана саммадева сампа̄дитакусалатта̄ йатха̄ка̄рӣ татха̄ва̄дӣти дассетум̣ ‘‘евам̣ бйа̄ка̄сӣ’’ти имаматтхам̣ дассети. сесам̣ сувин̃н̃еййамева.

ба̄хитикасуттаван̣н̣ана̄йа лӣнаттхаппака̄сана̄ саматта̄.