28. камманиддесаван̣н̣ана̄

199. ваггена адхаммакамман̃ча самаггена адхаммакамман̃ча ваггена дхаммакамман̃ча самаггена дхаммакамман̃ча̄ти чатта̄ри камма̄ни хонтӣти сесо. таттха ваггена адхаммакамманти ваггена сан̇гхена каран̣ӣйам̣ адхаммакаммам̣. еса найо саббаттха. вагготи ча самӯхо вуччати, со ча чатувагга̄дикаран̣ӣйа̄дӣсу йа̄ватика̄нам̣ каммаппатта̄нам̣ асаммукхӣбха̄вена, чханда̄раха̄нам̣ чханда̄на̄харан̣ена, саммукхӣбхӯта̄нан̃ча пат̣иккосанена, тесу екена̄пи ва̄ идха адхиппето. адхаммакамманти еттха пана дхаммо на̄ма ‘‘уттидутийе че, бхиккхаве, камме ека̄йа уттийа̄ каммам̣ кароти, на ча каммава̄чам̣ анусса̄вети, адхаммакамма’’нтиа̄дина̄ (маха̄ва. 387) ека̄йева н̃аттийа̄, татха̄ двӣхи н̃аттӣхи ека̄йева ва̄ каммава̄ча̄йа, татха̄ двӣхи каммава̄ча̄хӣти а̄гата̄йа ча татха̄ ха̄панаан̃н̃атха̄каран̣абха̄вена н̃аттикаммам̣ т̣хапетва̄ н̃аттичатуттхе ча камме а̄гата̄йа ча акамма̄рахасса таджджанӣйапабба̄джанӣйапат̣иса̄ран̣ӣйанийассативидхауккхепанӣйа̄нам̣ саттаннам̣ камма̄нам̣ каран̣авасена, камма̄рахасса ча вира̄дхетва̄ каран̣авасена а̄гата̄йа ча па̄л̣ийа̄ випарӣта̄ ча па̄л̣и, упасампада̄дикаммавасена а̄гата̄ ча па̄л̣и, саммукха̄винайасативинайаамӯл̣хавинайапат̣ин̃н̃а̄каран̣айебхуййасика̄тассапа̄пи- йасика̄тин̣аваттха̄ракасан̇кха̄та̄нам̣ саттаннам̣ камма̄нам̣ йатха̄ла̄бхакаран̣авасена а̄гата̄ ча па̄л̣и, тена каран̣ӣйам̣ апалоканан̃аттин̃аттидутийан̃аттичатуттхасан̇кха̄там̣ чатуббидхам̣ каммам̣ дхаммакаммам̣, таппат̣ипаккхам̣ адхаммакаммам̣. таббипарийа̄йена самагго дхаммакамман̃ча ведитаббам̣. дхаммо йатха̄вутта̄ па̄л̣и асса аттхи, дхаммена катам̣ ва̄ти дхаммикам̣. таббипарӣтам̣ адхаммикам̣. чатуттхам̣йева̄ти тесу чатӯсу каммесу чатуннам̣ пӯран̣ам̣ самаггена дхаммикам̣. сесакамма̄нам̣ бха̄вена бхиккхуна̄ дуккат̣асса бхаванам̣ лаккхӣйатӣти сесакаммесӯти бха̄валаккхан̣е саттамӣ. дуккат̣анти куппа̄нам̣ адхаммакаммаваггакамма̄нам̣ кататта̄ дуккат̣ам̣.

200. ида̄ни йадидам̣ самаггена дхаммикам̣ на̄ма, там̣ йехи сан̇гхехи ка̄таббам̣, тесам̣ пабхедам̣ дассетум̣ ‘‘чатувагго’’тиа̄дима̄ха. чатва̄дӣнам̣ сан̇кхйейавуттитта̄ чатуннам̣ вагготиа̄дина̄ виггахо. дасавӣсативаггикоти дасаннам̣ вӣсатийа̄ ча ваггабхедавасена дасавӣсатӣнам̣ вагготи виггахо, н̣ико сакаттхе. вӣсатийа̄ вагго, атирекена сахито вӣсативагготи виггахо.

201-2. пан̃чаннам̣ камма̄нам̣ нийамети ‘‘чатӯ’’тиа̄дина̄. аббха̄нам̣ упасампадам̣ пава̄ран̣ам̣ т̣хапетва̄ чатувагго ча̄тиа̄дина̄ йоджетва̄ саббакаммесу каммаппаттоти дӣпитоти йоджетаббам̣. таттха таттха ча-саддо чатувагга̄дайо каммапаттикирийа̄йам̣ самуччиноти. идха пана сабба-саддо аббха̄на̄дӣнам̣ кесан̃чи т̣хапитатта̄ падесасаббе гайхати. каммапаттоти каммасса патто йутто анурӯпо. итароти вӣсативагго атирекавӣсативагго. саббакаммесӯти еттха пана сабба-саддо саббасаббе. нану ча вӣсативаггасса каммаппаттабха̄весати атирекавӣсативаггасса пагева̄ти вин̃н̃а̄йати. татха̄ сати со касма̄ вуттоти? саччам̣, татха̄пи со чатувагга̄дина̄ сан̇гхена каттаббакаммам̣ ӯнакатарена на ват̣т̣ати, атирекена пана ват̣т̣атӣти н̃а̄панаттхам̣ вутто.

203. ида̄ни чатувагга̄дикена чханда̄харан̣ена пӯретабботи дассети ‘‘чатӯ’’тиа̄дина̄. па̄ра̄джика̄дибха̄вамана̄паннатта̄ пакатийа̄ сабха̄венева т̣хито атта̄ йесам̣, пакато ва̄ татойева каммесу авигато атта̄ йесам̣ тети пакататтака̄, па̄ра̄джикауккхиттакаладдхина̄на̄сам̣ва̄сакехи ан̃н̃е. парети екасӣмат̣т̣ха̄ та̄диса̄йева ан̃н̃е. сесепӣти авасесе пан̃чавагга̄дикаран̣ӣйепи.

204. ида̄ни ваттхун̃аттианусса̄ванасӣма̄дивипаттито, каммавипаттӣсу парисато ча пат̣иккосато ча каммасса куппа̄куппабха̄вам̣ таттха ча а̄паттиа̄дим̣ дассетум̣ ‘‘чатӯ’’тиа̄ди ма̄ха. чатувагга̄дикаттаббам̣ асам̣ва̄саган̣апӯрам̣ ва̄ камма̄рахаган̣апӯрам̣ ва̄ камман̃ча гарукат̣т̣хаган̣апӯрам̣ ва̄ парива̄са̄дикамман̃ча̄ти йоджана̄. еттха ча камма̄рахо гарукат̣т̣хато ан̃н̃о, никкхиттаватто пана гарукат̣т̣хо ган̣апӯрако хотийева. катанти чатувагга̄дина̄ катам̣.

205. ва̄реййа̄ти антара̄йе асати антамасо екопи ва̄реййа̄ти аттхо. антара̄йети па̄пехи карийама̄не джӣвитабрахмачарийантара̄йе сати. анантара̄йика̄ че на ва̄ренти, дуккат̣ам̣. дит̣т̣ха̄винти аттано аттано дит̣т̣хим̣ ладдхим̣ ‘‘адхаммакаммам̣ идам̣, на метам̣ кхаматӣ’’ти ан̃н̃аман̃н̃ам̣ а̄ви кареййунти сесо. екодхит̣т̣ха̄нанти еко бхиккху ‘‘на метам̣ кхаматӣ’’ти адхит̣т̣ха̄нам̣ кареййа̄ти сесо. татодхика̄ти тӣхи адхика̄. те пана сан̇гхатта̄ пахонти аттано каммам̣ ниттхаритум̣.

206. кхиттачитто на̄ма умматтако. дукхат̣т̣итоти веданат̣т̣о. на рӯхатӣти гайхаттам̣ на рохатӣти аттхо.

207. антамасо анантарасса̄пи а̄рочентасса паката…пе… бхиккхуноти самбандхо. екасӣма̄йам̣ тит̣т̣хатӣти екасӣмат̣т̣хо. само сам̣ва̄со асса̄ти самасам̣ва̄со. екасӣмат̣т̣хо ча со самасам̣ва̄со ча, пакататто ча со екасӣмат̣т̣хасамасам̣ва̄со ча, со ча̄йам̣ бхиккху ча̄ти саббаттха каммадха̄райо, тасса. еттха пана авипаннасӣло пакататтоти адхиппето. а̄рочентасса̄ти аттано ладдхим̣ пака̄сентасса. рӯхатӣти пат̣иккхепо рухати.

208. дхаммикам̣ камманти дхаммена каттаббам̣ апалокана̄дикаммам̣. пат̣иккосеййа̄ти нива̄реййа. тироккха̄ ка̄йаса̄маггим̣ ва̄ чхандам̣ ва̄ти ва̄-саддам̣ нетва̄ аттхо нетаббо. тироккха̄ти параммукха̄. со саммукха̄-саддо вийа нипа̄то, атха ва̄ аккха̄ индрийависайато тиро бахӣти аттхоти.

камманиддесаван̣н̣ана̄ нит̣т̣хита̄.