31. викаппана̄ниддесо

викаппана̄ чева̄ти –

221. саммукха̄ параммукха̄ти, дуве вутта̄ викаппана̄;

саммукха̄йа викаппенто, бйаттассекасса сантике;

‘‘имам̣ чӣварам̣ туйхам̣, викаппемӣ’’ти бха̄сайе.

222. етта̄вата̄ нидхетум̣ва, каппатӣ на ча каппати;

парибхога̄дикам̣ тена, аппаччуддхат̣абха̄вато.

223. ‘‘майхам̣ сантакам̣ парибхун̃джа ва̄ виссаджджехи ва̄ йатха̄паччайам̣ ва̄ карохӣ’’ти –

тена паччуддхат̣ейева, парибхога̄ди каппати.

224. апара̄ саммукха̄века̄, бхиккхуссекасса сантике;

гахетва̄ на̄мамекасса, пан̃чаннам̣ сахадхамминам̣.

225. ‘‘имам̣ чӣварам̣ тиссасса бхиккхуно, тисса̄йа бхиккхунийа̄, тиссасса са̄ман̣ерасса, тисса̄йа са̄ман̣ерийа̄, тисса̄йа сиккхама̄на̄йа викаппемӣ’’ти ваттаббам̣.

тена бхиккхуна̄ ‘‘тиссасса бхиккхуно, тисса̄йа бхиккхунийа̄, тиссасса са̄ман̣ерасса, тисса̄йа са̄ман̣ерийа̄, тисса̄йа сиккхама̄на̄йа сантакам̣ парибхун̃джа ва̄ виссаджджехи ва̄ йатха̄паччайам̣ ва̄ карохӣ’’ти ваттаббам̣.

226. параммукха̄викаппане-кассантикевамӣрайе;

‘‘имам̣ чӣварам̣ туйхам̣ викаппанаттха̄йа даммӣ’’ти.

227. тена ваттаббо ‘‘ко те митто ва̄ сандит̣т̣хо ва̄’’ти. итарена чевам̣ ваттаббам̣ ‘‘тиссо бхиккхӯ’’ти ва̄ ‘‘тисса̄ бхиккхунӣ’’ти ва̄ ‘‘тиссо са̄ман̣еро’’ти ва̄ ‘‘тисса̄ са̄ман̣ерӣ’’ти ва̄ ‘‘тисса̄ сиккхама̄на̄’’ти ва̄.

пуна тена ‘‘ахам̣ тиссасса тисса̄йа ва̄ даммӣ’’ти викаппетва̄ тенева ‘‘тиссасса бхиккхуно, тисса̄йа бхиккхунийа̄, тиссасса са̄ман̣ерасса, тисса̄йа са̄ман̣ерийа̄, тисса̄йа сиккхама̄на̄йа сантакам̣ парибхун̃джа ва̄ виссаджджехи ва̄ йатха̄паччайам̣ ва̄ карохӣ’’ти паччуддхаритаббам̣.

228. дӯрасантикаттекаттабахубха̄вам̣ виджа̄нийа;

‘‘етам̣ има’’нти ‘‘ета̄ни, има̄нӣ’’теттха йоджайе.

229. даса̄хам̣ ма̄самекам̣ ва̄, пан̃ча ва̄ катхинаттхате;

па̄рипӯраттхамӯнасса, пачча̄са̄ сати ма̄сакам̣;

нуппа̄дайати ниссаггим̣, на̄дхит̣т̣хитавикаппитанти.