8. упаккхат̣асиккха̄падаван̣н̣ана̄

ат̣т̣хаме бхиккхум̣ панева уддисса̄ти ‘‘иттханна̄масса бхиккхуно дасса̄мӣ’’ти евам̣ ападиситва̄. чӣварачета̄паннанти хиран̃н̃а̄дикам̣ чӣварамӯлам̣. упаккхат̣ам̣ хотӣти саджджитам̣ хоти, сам̣харитва̄ т̣хапитам̣. чета̄петва̄ти париваттетва̄, ка̄ретва̄ ва̄ кин̣итва̄ ва̄ти аттхо. чӣварена аччха̄десса̄мӣти воха̄равачанаметам̣, иттханна̄масса бхиккхуно дасса̄мӣти айам̣ панеттха аттхо. татра че соти йатра со гахапати ва̄ гахапата̄нӣ ва̄, татра со бхиккху пуббе аппава̄рито упасан̇камитва̄ чӣваре викаппам̣ а̄паджджеййа чети айаметтха падасамбандхо. викаппам̣ а̄паджджеййа̄ти висит̣т̣хакаппам̣ адхикавидха̄нам̣ а̄паджджеййа. йатха̄ пана тама̄паджджати, там̣ дассетум̣ са̄дху вата̄тиа̄дима̄ха. таттха са̄дхӯти а̄йа̄чане нипа̄то. вата̄ти паривитакке. манти атта̄нам̣ ниддисати. а̄йасма̄ти парам̣ а̄лапати. еварӯпам̣ ва̄ еварӯпам̣ ва̄ти а̄йата̄дӣсу ан̃н̃атарам̣. калйа̄н̣акамйатам̣ упа̄да̄йа̄ти сундарака̄матам̣ висит̣т̣хака̄матам̣ читтена гахетва̄, тасса ‘‘а̄паджджеййа че’’тиимина̄ самбандхо, саче пана еварӯпам̣ а̄паджджантасса тасса вачанена йо пат̣хамам̣ адхиппетато мӯлам̣ вад̣д̣хетва̄ сундаратарам̣ чета̄пети, тасса пайоге бхиккхуно дуккат̣ам̣, пат̣ила̄бхена ниссаггийам̣ хоти. таттха ‘‘идам̣ ме, бханте, чӣварам̣ пуббе аппава̄ритам̣ ан̃н̃а̄такам̣ гахапатикам̣ упасан̇камитва̄ викаппам̣ а̄паннам̣ ниссаггийа’’нти (па̄ра̄. 529) имина̄ найена ниссаджджанавидха̄нам̣ ведитаббам̣.

са̄ваттхийам̣ упанандам̣ а̄раббха чӣваре викаппам̣ а̄паджджанаваттхусмим̣ пан̃н̃аттам̣, са̄дха̄ран̣апан̃н̃атти, ана̄н̣аттикам̣, тикапа̄читтийам̣, н̃а̄таке ан̃н̃а̄такасан̃н̃ино вематикасса ва̄ дуккат̣ам̣. махаггхам̣ чета̄петука̄мам̣ аппаггхам̣ ва̄, етенева мӯлена ‘‘ан̃н̃ам̣ еварӯпам̣ ва̄ дехӣ’’ти вадантасса, вуттанайена н̃а̄такаппава̄рите вин̃н̃а̄пентасса, аттано дханена ган̣хантасса, умматтака̄дӣнан̃ча ана̄патти. чӣваре бхиййокамйата̄, ан̃н̃а̄такавин̃н̃атти, та̄йа ча пат̣ила̄бхоти има̄неттха тӣн̣и ан̇га̄ни. самут̣т̣ха̄на̄дӣни чатуттхасадиса̄нева̄ти.

упаккхат̣асиккха̄падаван̣н̣ана̄ нит̣т̣хита̄.