9. ан̃н̃абха̄гийасиккха̄падаван̣н̣ана̄

наваме ан̃н̃абха̄гийасса̄тиа̄дӣсу ан̃н̃абха̄гасса идам̣, ан̃н̃абха̄го ва̄ асса аттхӣти ан̃н̃абха̄гийам̣. адхикаран̣анти а̄дха̄ро ведитаббо, ваттху адхит̣т̣ха̄нанти вуттам̣ хоти. йо хи со ат̣т̣хуппаттийам̣ ‘‘даббо маллапутто на̄ма̄’’ти чхагалако вутто. со йва̄йам̣ а̄йасмато даббасса маллапуттасса бха̄го кот̣т̣ха̄со паккхо мануссаджа̄ти чева бхиккхубха̄во ча, тато ан̃н̃асса бха̄гасса кот̣т̣ха̄сасса паккхасса хоти тираччха̄наджа̄тийа̄ чева чхагалакабха̄васса ча, со ва̄ ан̃н̃абха̄го асса аттхи, тасма̄ ан̃н̃абха̄гийасан̇кхйам̣ лабхати. йасма̄ ча тесам̣ ‘‘имам̣ майам̣ даббам̣ маллапуттам̣ на̄ма карома̄’’ти ваданта̄нам̣ тасса на̄макаран̣асан̃н̃а̄йа а̄дха̄ро ваттху адхит̣т̣ха̄нам̣, тасма̄ ‘‘адхикаран̣а’’нти ведитаббо. тан̃хи сандха̄йа ‘‘саччам̣ кира тумхе, бхиккхаве, даббам̣ маллапуттам̣ ан̃н̃абха̄гийасса адхикаран̣асса̄’’тиа̄ди (па̄ра̄. 391) вуттам̣. на вива̄да̄дхикаран̣а̄дӣсу ан̃н̃атарам̣, касма̄? асамбхавато. на хи меттийабхӯмаджака̄ чатуннам̣ адхикаран̣а̄нам̣ кассачи ан̃н̃абха̄гийасса адхикаран̣асса кин̃чидесам̣ лесаматтам̣ уппа̄дийим̣су, на ча чатуннам̣ адхикаран̣а̄нам̣ лесо на̄ма аттхи. джа̄тилеса̄дайо хи пуггала̄нам̣йева леса̄ вутта̄, на вива̄да̄дхикаран̣а̄дӣнам̣. тан̃ча ‘‘даббо маллапутто’’ти на̄мам̣ тасса ан̃н̃абха̄гийа̄дхикаран̣абха̄ве т̣хитасса чхагалакасса кочи десо хоти тхерам̣ па̄ра̄джикена дхаммена ануддхам̣сетум̣ лесаматто, еттха ча диссати ападиссати ‘‘асса айа’’нти вохарӣйатӣти десо, джа̄тиа̄дӣсу ан̃н̃атаракот̣т̣ха̄сассетам̣ адхивачанам̣. ан̃н̃ампи ваттхум̣ лиссати силиссати воха̄раматтенева ӣсакам̣ аллӣйатӣти лесо, джа̄тиа̄дӣнам̣йева ан̃н̃атаракот̣т̣ха̄сассетам̣ адхивачанам̣. падабха̄джане (па̄ра̄. 393) пана йасса ан̃н̃абха̄гийасса адхикаран̣асса кин̃чидесам̣ лесаматтам̣ упа̄да̄йа па̄ра̄джикена дхаммена ануддхам̣сеййа, там̣ йасма̄ ат̣т̣хуппаттивасенева а̄вибхӯтам̣, тасма̄ там̣ авибхаджитва̄ йа̄ни ‘‘адхикаран̣а’’нти вачанаса̄ман̃н̃ато аттхуддха̄равасена паватта̄ни чатта̄ри адхикаран̣а̄ни, тесам̣ ан̃н̃абха̄гийата̄ ча таббха̄гийата̄ ча йасма̄ апа̄кат̣а̄, джа̄нитабба̄ ча винайадхарехи, тасма̄ тан̃ча аваса̄не а̄паттан̃н̃абха̄гийена чоданан̃ча а̄вика̄тум̣ ‘‘ан̃н̃абха̄гийасса адхикаран̣асса̄ти а̄паттан̃н̃абха̄гийам̣ ва̄ хоти адхикаран̣ан̃н̃абха̄гийам̣ ва̄’’тиа̄ди вуттам̣, сеса̄ виниччхайакатха̄ ат̣т̣хаме вуттасадиса̄йева. айам̣ пана висесо – идам̣ ан̃н̃абха̄гийасса адхикаран̣асса кин̃чидесам̣ лесаматтам̣ упа̄да̄йа па̄ра̄джикена дхаммена ануддхам̣санаваттхусмим̣ пан̃н̃аттам̣, идха ча а̄паттан̃н̃абха̄гийачодана̄йа татха̄сан̃н̃инопи ана̄патти. ан̇гесу ча ан̃н̃абха̄гийасса адхикаран̣асса кин̃чидесам̣ лесаматтам̣ упа̄дийаната̄ адхика̄ти.

ан̃н̃абха̄гийасиккха̄падаван̣н̣ана̄ нит̣т̣хита̄.