2. дутийапариман̣д̣аласиккха̄падаван̣н̣ана̄

дутийе ‘‘на, бхиккхаве, гихипа̄рутам̣ па̄рупитабба’’нти (чӯл̣ава. 280) евам̣ пат̣иккхиттам̣ гихипа̄рутам̣ апа̄рупитва̄ убхо кан̣н̣е самам̣ катва̄ па̄рупанам̣ париман̣д̣алапа̄рупанам̣ на̄ма, таттха йам̣кин̃чи сетапат̣апа̄рутам̣ парибба̄джакапа̄рутам̣ екаса̄т̣акапа̄рутам̣ сура̄сон̣д̣апа̄рутам̣ антепурикапа̄рутам̣ маха̄джет̣т̣хапа̄рутам̣ кут̣иппавесакапа̄рутам̣ бра̄хман̣апа̄рутам̣ па̄л̣ика̄ракапа̄рутанти евама̄ди париман̣д̣алалаккхан̣ато ан̃н̃атха̄ па̄рутам̣, саббаметам̣ гихипа̄рутам̣ на̄ма. тасма̄ йатха̄ сетапат̣а̄ ад̣д̣хапа̄лаканиган̣т̣ха̄ па̄рупанти, йатха̄ ча екачче парибба̄джака̄ урам̣ виваритва̄ двӣсу ам̣сакӯт̣есу па̄вуран̣ам̣ т̣хапенти, йатха̄ ча екаса̄т̣ака̄ манусса̄ ниваттхаса̄т̣акасса екена антена пит̣т̣хим̣ па̄рупитва̄ убхо кан̣н̣е убхосу ам̣сакӯт̣есу т̣хапенти, йатха̄ ча сура̄сон̣д̣а̄дайо са̄т̣акена гӣвам̣ париккхипитва̄ убхо анте уре ва̄ оламбенти, пит̣т̣хийам̣ ва̄ кхипанти, йатха̄ ча антепурика̄йо аккхита̄ракаматтам̣ дассетва̄ огун̣т̣хитам̣ па̄рупанти, йатха̄ ча маха̄джет̣т̣ха̄ дӣгхаса̄т̣акам̣ нива̄сетва̄ тассева екенантена сакаласарӣрам̣ па̄рупанти, йатха̄ ча кассака̄ кхеттакут̣им̣ пависанта̄ са̄т̣акам̣ паливет̣хетва̄ упакаччхаке паккхипитва̄ тассева екенантена сарӣрам̣ па̄рупанти, йатха̄ ча бра̄хман̣а̄ убхиннам̣ упакаччхака̄нам̣ антаре са̄т̣акам̣ павесетва̄ ам̣сакӯт̣есу паккхипанти, йатха̄ ча па̄л̣ика̄рако бхиккху екам̣сапа̄рупанена па̄рутам̣ ва̄маба̄хум̣ виваритва̄ чӣварам̣ ам̣сакӯт̣е а̄ропети, евам̣ апа̄рупитва̄ саббепи ете, ан̃н̃е ча еварӯпе па̄рупанадосе ваджджетва̄ ниббика̄рам̣ париман̣д̣алам̣ па̄рупитаббам̣. татха̄ апа̄рупитва̄ а̄ра̄ме ва̄ антарагхаре ва̄ ана̄дарена йам̣кин̃чи вика̄рам̣ каронтасса дуккат̣ам̣, ана̄патти пуримасадиса̄йева, йатха̄ четтха, евам̣ саббаттха. йаттха пана висесо бхависсати, таттха ваккха̄ма̄ти.