6. севана̄суттаван̣н̣ана̄

6. чхат̣т̣хе джӣвитасамбха̄ра̄ти джӣвитаппаваттийа̄ самбха̄ра̄ паччайа̄. самуда̄нетабба̄ти самма̄ н̃а̄йена анаваджджаун̃чха̄чарийа̄дина̄ уддхамуддхама̄нетабба̄ па̄пун̣итабба̄. те пана самуда̄нита̄ сама̄хата̄ на̄ма хонтӣти а̄ха ‘‘сама̄харитабба̄’’ти. дуккхена уппаджджантӣти сулабхуппа̄да̄ на хонти. етена гочараасаппа̄йа̄дибха̄вам̣ дассети. раттибха̄гам̣ ва̄ дивасабха̄гам̣ ва̄ти бхумматтхе упайогавачананти а̄ха ‘‘раттикот̣т̣ха̄се ва̄ дивасакот̣т̣ха̄се ва̄’’ти. раттим̣йева паккамитаббам̣ саман̣адхаммасса таттха аниппхаджджанато. сан̇кха̄пӣти ‘‘йадаттхамахам̣ паббаджито, на метам̣ идха ниппхаджджати, чӣвара̄ди пана самуда̄гаччхати, на̄хам̣ тадаттхам̣ паббаджито, ким̣ ме идха ва̄сена̄’’ти пат̣исан̇кха̄йапи. тена̄ха ‘‘са̄ман̃н̃аттхасса бха̄вана̄па̄рипӯриагаманам̣ джа̄нитва̄’’ти. анантарава̄ре сан̇кха̄пӣти саман̣адхаммасса ниппхаджджанабха̄вам̣ джа̄нитва̄. со пуггало ана̄пуччха̄ паккамитаббам̣, на̄нубандхитабботи ‘‘со пуггало’’ти падасса ‘‘на̄нубандхитаббо’’ти имина̄ самбандхо. йасса йена хи самбандхо, дӯрат̣т̣хенапи со бхавати. там̣ пуггаланти со пуггалоти паччаттавачанам̣ упайогавасена парин̣а̄метва̄ там̣ пуггалам̣ ана̄пуччха̄ паккамитаббанти аттхо. аттхавасена хи вибхаттипарин̣а̄моти. а̄пуччха̄ паккамитаббанти ча катан̃н̃укатаведита̄йа нийоджанам̣. еварӯпоти йам̣ нисса̄йа бхиккхуно гун̣ехи вуддхийева па̄т̣икан̇кха̄, паччайехи на париссайо, еварӯпо дан̣д̣акамма̄дӣхи нигган̣ха̄ти чепи, на париччаджитабботи дассети ‘‘сачепӣ’’тиа̄дина̄.

севана̄суттаван̣н̣ана̄ нит̣т̣хита̄.