6. пун̃н̃акирийаваттхусуттаван̣н̣ана̄

36. чхат̣т̣хе пуджджабхавапхалам̣ ниббаттенти, аттано санта̄нам̣ пунантӣти ва̄ пун̃н̃а̄ни ча та̄ни хетупаччайехи каттаббато кирийа̄ ча̄ти пун̃н̃акирийа̄, та̄йева ча тесам̣ тесам̣ пийамана̄пата̄диа̄нисам̣са̄нам̣ ваттхубха̄вато пун̃н̃акирийаваттхӯни.

ануччхиннабхавамӯласса ануггахавасена, пӯджа̄васена ва̄ аттано деййадхаммасса парасса паричча̄гачетана̄ дӣйати етена̄ти да̄нам̣, да̄намева да̄намайам̣. падапӯран̣аматтам̣ майа-саддо. чӣвара̄дӣсу чатӯсу паччайесу (дӣ. ни. ат̣т̣ха. 3.305), анна̄дӣсу ва̄ дасасу да̄наваттхӯсу, рӯпа̄дӣсу ва̄ чхасу а̄рамман̣есу там̣ там̣ дентасса тесам̣ уппа̄данато пат̣т̣ха̄йа пуббабха̄ге паричча̄гака̄ле паччха̄ соманассачиттена ануссаран̣е ча̄ти тӣсу ка̄лесу паваттачетана̄ да̄намайам̣ пун̃н̃акирийаваттху на̄ма.

ниччасӣлаупосатхасӣла̄дивасена пан̃ча ат̣т̣ха даса ва̄ сӣла̄ни сама̄дийантасса ‘‘сӣлапӯран̣аттхам̣ паббаджисса̄мӣ’’ти виха̄рам̣ гаччхантасса паббаджантасса, маноратхам̣ маттхакам̣ па̄петва̄ ‘‘паббаджито ватамхи са̄дху сут̣т̣хӯ’’ти а̄ваджджентасса, саддха̄йа па̄тимоккхам̣ парипӯрентасса, пан̃н̃а̄йа чӣвара̄дике паччайе паччавеккхантасса, сатийа̄ а̄па̄тхагатесу рӯпа̄дӣсу чаккхудва̄ра̄дӣни сам̣варантасса, вӣрийена а̄джӣвам̣ содхентасса ча паваттачетана̄ сӣлати, сӣлетӣти ва̄ сӣламайам̣ пун̃н̃акирийаваттху на̄ма.

пат̣исамбхида̄йам̣ (пат̣и. ма. 1.48) вуттена випассана̄маггена чаккхум̣ аниччато дуккхато анаттато випассантасса, сотам̣…пе… гха̄нам̣…пе… дживхам̣…пе… ка̄йам̣…пе… рӯпе…пе… дхамме…пе… чаккхувин̃н̃а̄н̣ам̣…пе… мановин̃н̃а̄н̣ам̣…пе… чаккхусампхассам̣ …пе… маносампхассам̣…пе… чаккхусампхассаджам̣ веданам̣…пе… маносампхассаджам̣ веданам̣…пе… джара̄маран̣ам̣ аниччато дуккхато анаттато випассантасса йа̄ четана̄, йа̄ ча патхавӣкасин̣а̄дӣсу сабба̄су ат̣т̣хаттим̣са̄йа а̄рамман̣есу паватта̄ джха̄начетана̄, йа̄ ча анаваджджесу камма̄йатанасиппа̄йатанавиджджа̄т̣т̣ха̄несу паричайаманасика̄ра̄дивасена паватта̄ четана̄, сабба̄ са̄ бха̄вети ета̄йа̄ти бха̄вана̄майам̣ вуттанайена пун̃н̃акирийаваттху ча̄ти бха̄вана̄майам̣ пун̃н̃акирийаваттху.

екамекан̃четтха йатха̄рахам̣ пуббабха̄гато пат̣т̣ха̄йа каронтасса ка̄йакаммам̣ хоти. тадаттхам̣ ва̄чам̣ ниччха̄рентасса вачӣкаммам̣. ка̄йан̇гам̣ ва̄чан̇ган̃ча ачопетва̄ манаса̄ чинтайантасса манокаммам̣. анна̄дӣни дентасса ча̄пи ‘‘аннада̄на̄дӣни демӣ’’ти ва̄, да̄напа̄рамим̣ а̄ваджджетва̄ ва̄ да̄нака̄ле да̄намайам̣ пун̃н̃акирийаваттху хоти. йатха̄ хи кевалам̣ ‘‘аннада̄на̄дӣни демӣ’’ти да̄нака̄ле да̄намайам̣ пун̃н̃акирийаваттху хоти, евам̣ ‘‘идам̣ да̄намайам̣ самма̄самбодхийа̄ паччайо хотӯ’’ти да̄напа̄рамим̣ а̄ваджджетва̄ да̄нака̄лепи да̄насӣсенева паваттитатта̄. ваттасӣсе т̣хатва̄ даданто ‘‘етам̣ да̄нам̣ на̄ма майхам̣ кулавам̣сахету павен̣ича̄ритта’’нти ча̄риттасӣсена ва̄ денто ча̄риттасӣлатта̄ сӣламайам̣. кхайато вайато саммасанам̣ пат̣т̣хапетва̄ дадато бха̄вана̄майам̣ пун̃н̃акирийаваттху хоти. йатха̄ хи деййадхаммапаричча̄гавасена ваттама̄на̄пи да̄начетана̄ ваттасӣсе т̣хатва̄ дадато сӣламайам̣ пун̃н̃акирийаваттху хоти пубба̄бхисан̇кха̄расса апарабха̄ге четана̄йа ча татха̄паваттатта̄.

пун̃н̃акирийаваттхусуттаван̣н̣ана̄ нит̣т̣хита̄.