1. сӣтибха̄васуттаван̣н̣ана̄

85. навамасса пат̣хаме сӣтибха̄ванти нибба̄нам̣, килесавӯпасамам̣ ва̄. нигган̣ха̄тӣти ачча̄раддхавӣрийата̄дӣхи уддхатам̣ читтам̣ уддхаччапаккхато раккхан̣авасена нигган̣ха̄ти. пагган̣ха̄тӣти атиситхилавӣрийата̄дӣхи лӣнам̣ читтам̣ косаджджапа̄тато раккхан̣авасена пагган̣ха̄ти. сампахам̣сетӣти самаппаваттачиттам̣ татха̄паваттийам̣ пан̃н̃а̄йа тосети уттеджети ва̄. йада̄ ва̄ пан̃н̃а̄пайогамандата̄йа упасамасукха̄надхигамена ва̄ нирасса̄дам̣ читтам̣ бха̄вана̄йа на паккхандати, тада̄ джа̄тиа̄дӣни сам̣вегаваттхӯни паччавеккхитва̄ сампахам̣сети самуттеджети. аджджхупеккхатӣти йада̄ пана читтам̣ алӣнам̣ ануддхатам̣ анирасса̄дам̣ а̄рамман̣е самаппаваттам̣ саммадева бха̄вана̄вӣтим̣ отин̣н̣ам̣ хоти, тада̄ паггаханиггахасампахам̣санесу кин̃чи бйа̄па̄рам̣ акатва̄ самаппаваттесу ассесу са̄ратхӣ вийа аджджхупеккхати, упеккхакова хоти. пан̣ӣта̄дхимуттикоти пан̣ӣте уттаме маггапхале адхимутто ниннапон̣апаббха̄ро.

сӣтибха̄васуттаван̣н̣ана̄ нит̣т̣хита̄.