4. ка̄ран̣апа̄лӣсуттаван̣н̣ана̄

194. чатуттхе пан̣д̣ито ман̃н̃ети еттха ман̃н̃ети идам̣ ‘‘ман̃н̃атӣ’’ти имина̄ сама̄наттхам̣ нипа̄тападам̣. тасса ити-саддам̣ а̄нетва̄ аттхам̣ дассенто ‘‘пан̣д̣итоти ман̃н̃атӣ’’ти а̄ха. ануматипуччха̄васена четам̣ вуттам̣. тенева̄ха ‘‘уда̄ху но’’ти. ‘‘там̣ ким̣ ман̃н̃ати бхавам̣ пин̇гийа̄нӣ саман̣асса готамасса пан̃н̃а̄веййаттийа’’нти вуттамеваттхам̣ пуна ган̣ханто ‘‘пан̣д̣ито ман̃н̃е’’ти а̄ха, тасма̄ вуттам̣ ‘‘бхавам̣ пин̇гийа̄нӣ саман̣ам̣ готамам̣ пан̣д̣итоти ман̃н̃ати уда̄ху но’’ти, йатха̄ те кхамеййа, татха̄ нам̣ катхехӣти адхиппа̄йо. ахам̣ ко на̄ма, мама ависайо есоти дассети. ко ча̄ти хетуниссакке паччаттавачананти а̄ха ‘‘куто ча̄’’ти. татха̄ ча̄ха ‘‘кена ка̄ран̣ена джа̄нисса̄мӣ’’ти, йена ка̄ран̣ена саман̣асса готамасса пан̃н̃а̄веййаттийам̣ джа̄неййам̣, там̣ ка̄ран̣ам̣ майи наттхӣти адхиппа̄йо. буддхойева бхавеййа абуддхасса саббатха̄ буддхан̃а̄н̣а̄нубха̄вам̣ джа̄нитум̣ асаккун̣еййатта̄ти. вуттан̃хетам̣ – ‘‘аппаматтакам̣ панетам̣, бхиккхаве, ораматтакам̣ сӣламаттакам̣, йена путхуджджано татха̄гатасса ван̣н̣ам̣ вадама̄но вадеййа (дӣ. ни. 1.7). аттхи, бхиккхаве, ан̃н̃ева дхамма̄ гамбхӣра̄ дуддаса̄ дуранубодха̄…пе… йехи татха̄гатасса йатха̄бхӯтам̣ ван̣н̣ам̣ самма̄ вадама̄но вадеййа̄’’ти (дӣ. ни. 1.28) ча. еттха̄ти ‘‘сопи нӯнасса та̄дисо’’ти етасмим̣ паде.

пасаттхаппасаттхоти пасаттхехи па̄сам̣сехи аттано гун̣ехева со пасаттхо, на тасса киттина̄, пасам̣са̄сабха̄венева па̄сам̣соти аттхо. тена̄ха ‘‘саббагун̣а̄на’’нтиа̄ди. ман̣иратананти чаккаваттино ман̣иратанам̣.

садеваке па̄сам̣са̄нампи па̄сам̣соти дассетум̣ ‘‘пасаттхехи ва̄’’ти дутийавикаппо гахито. аран̣ӣйато аттхо, со ева васатӣти васоти аттхавасо. тасса тасса пайогасса а̄нисам̣сабхӯтам̣ пхаланти а̄ха ‘‘аттхавасанти аттха̄нисам̣са’’нти. аттхо ва̄ пхалам̣ тададхӣнавуттита̄йа васо етасса̄ти аттхавасо, ка̄ран̣ам̣.

кхуддакамадхӯти кхуддакамаккхика̄хи катадан̣д̣акамадху. анел̣аканти ниддосам̣ апагатамаккхикан̣д̣акам̣.

уда̄харӣйати уббегапӣтивасена̄ти уда̄нам̣, татха̄ ва̄ уда̄харан̣ам̣ уда̄нам̣. тена̄ха ‘‘уда̄ха̄рам̣ уда̄харӣ’’ти. йатха̄ пана там̣ вачанам̣ уда̄нанти вуччати, там̣ дассетум̣ ‘‘йатха̄ хӣ’’тиа̄ди вуттам̣. сесам̣ сувин̃н̃еййамева.

ка̄ран̣апа̄лӣсуттаван̣н̣ана̄ нит̣т̣хита̄.