2. дон̣абра̄хман̣асуттаван̣н̣ана̄

192. дутийе паватта̄роти (дӣ. ни. т̣ӣ. 1.285) па̄вачанабха̄вена ватта̄ро. йасма̄ те тесам̣ манта̄нам̣ паваттанака̄, тасма̄ а̄ха ‘‘паваттайита̄ро’’ти. судде бахи катва̄ рахобха̄ситаббат̣т̣хена манта̄ ева там̣там̣аттхаппат̣ипаттихетута̄йа мантападам̣. анупанӣта̄са̄дха̄ран̣ата̄йа рахассабха̄вена ваттаббакирийа̄йа адхигамӯпа̄йам̣. саджджха̄йитанти га̄йанавасена саджджха̄йитам̣. там̣ пана удатта̄нудатта̄дӣнам̣ сара̄нам̣ сампада̄васенева иччхитанти а̄ха ‘‘сарасампаттивасена̄’’ти. ан̃н̃есам̣ вуттанти па̄вачанабха̄вена ан̃н̃есам̣ вуттам̣. самупабйӯл̣ханти сан̇гахетва̄ упарӯпари сан̃н̃ӯл̣хам̣. ра̄сикатанти ируведайаджуведаса̄маведа̄дивасена, таттха̄пи паччекам̣ мантабрахма̄дивасена, аджджха̄йа̄нува̄ка̄дивасена ча ра̄сикатам̣. тесанти манта̄нам̣ каттӯнам̣. диббена чаккхуна̄ олокетва̄ти диббачаккхупарибхан̣д̣ена йатха̄каммӯпаган̃а̄н̣ена сатта̄нам̣ каммассаката̄дим̣, паччаккхато дассанат̣т̣хена диббачаккхусадисена пуббенива̄сан̃а̄н̣ена атӣтакаппе бра̄хман̣а̄нам̣ мантаджджхенавидхин̃ча олокетва̄. па̄вачанена саха сам̣сандетва̄ти кассапасамма̄самбуддхасса йам̣ вачанам̣ ват̣т̣асаннисситам̣, тена саха авируддхам̣ катва̄. на хи тесам̣ виват̣т̣асанниссито аттхо паччаккхо хоти. апара̄парети ат̣т̣хака̄дӣхи апара̄паре паччхима̄ окка̄кара̄джака̄ла̄дӣсу уппанна̄. паккхипитва̄ти ат̣т̣хака̄дӣхи гантхитамантападесу килесасаннисситапада̄нам̣ таттха таттха паде паккхипанам̣ катва̄. вируддхе акам̣сӯти бра̄хман̣адхаммикасутта̄дӣсу (су. ни. бра̄хман̣адхаммикасуттам̣ 286 а̄дайо) а̄гатанайена сам̣килесаттхадӣпанато паччанӣкабхӯте акам̣су.

усӯнам̣ асанакаммам̣ иссаттхам̣, дханусиппена джӣвика̄. идха пана иссаттхам̣ вийа̄ти иссаттхам̣, саббаа̄вудхаджӣвика̄ти а̄ха ‘‘йодха̄джӣвакаммена̄’’ти, а̄вудхам̣ гахетва̄ упат̣т̣ха̄накаммена̄ти аттхо. ра̄джапорисам̣ на̄ма вина̄ а̄вудхена порохечча̄маччакамма̄дира̄джакаммам̣ катва̄ ра̄джупат̣т̣ха̄нам̣. сиппан̃н̃атарена̄ти гахита̄васесена хаттхиассасиппа̄дина̄. кума̄рабха̄вато пабхути чаран̣ена кома̄рабрахмачарийам̣.

удакам̣ па̄тетва̄ дентӣти два̄ре т̣хитассева бра̄хман̣асса хаттхе удакам̣ а̄син̃чанта̄ ‘‘идам̣ те, бра̄хман̣а, бхарийам̣ поса̄панаттха̄йа дема̄’’ти ватва̄ денти. касма̄ пана те евам̣ брахмачарийам̣ чаритва̄пи да̄рам̣ парийесанти, на йа̄ваджӣвам̣ брахмача̄рино хонтӣти? миччха̄дит̣т̣хивасена. тесан̃хӣ евам̣ дит̣т̣хи хоти ‘‘йо путтам̣ на уппа̄дети, со кулавам̣саччхедакаро хоти, тато нирайе паччатӣ’’ти. чатта̄ро кира абха̄йитаббам̣ бха̄йанти ган̣д̣уппа̄дако, кикӣ, континӣ, бра̄хман̣оти. ган̣д̣уппа̄да̄ кира маха̄патхавийа̄ кхайанабхайена маттабходжана̄ хонти, на бахум̣ маттикам̣ кха̄данти. кикӣ сакун̣ика̄ а̄ка̄сапатанабхайена ан̣д̣асса упари утта̄на̄ сети. континӣ сакун̣ӣ патхавӣкампанабхайена па̄дехи бхӯмим̣ на сут̣т̣ху аккамати. бра̄хман̣а̄ кулавам̣сӯпаччхедабхайена да̄рам̣ парийесанти. а̄ху четтха –

‘‘ган̣д̣уппа̄до кикӣ чева, контӣ бра̄хман̣адхаммико;

ете абхайам̣ бха̄йанти, саммӯл̣ха̄ чатуро джана̄’’ти. (су. ни. ат̣т̣ха. 2.293);

сесаметтха утта̄намева.

дон̣абра̄хман̣асуттаван̣н̣ана̄ нит̣т̣хита̄.