(11) 1. пха̄сувиха̄равагго

1-4. са̄раджджасутта̄диван̣н̣ана̄

101-4. татийасса пат̣хаме наттхи ваттаббам̣. дутийе пин̣д̣апа̄та̄диаттха̄йа упасан̇камитум̣ йуттат̣т̣ха̄нам̣ гочаро, весийа̄ гочаро асса̄ти весийа̄гочаро, миттасантхававасена упасан̇камитаббат̣т̣ха̄нанти аттхо. весийа̄ на̄ма рӯпӯпаджӣвинийо, та̄ миттасантхававасена на упасан̇камитабба̄ саман̣абха̄васса антара̄йакаратта̄, парисуддха̄сайассапи гараха̄хетуто, тасма̄ даккхин̣а̄да̄навасена сатим̣ упат̣т̣хапетва̄ упасан̇камитаббам̣. видхава̄ вуччанти матапатика̄, павуттхапатика̄ ва̄. тхуллакума̄рийоти махаллика̄ анивиддха̄ кума̄рийо. пан̣д̣ака̄ти напум̣сака̄. те хи уссаннакилеса̄ авӯпасантапарил̣а̄ха̄ лока̄мисанисситакатха̄бахула̄, тасма̄ на упасан̇камитабба̄. бхиккхунийо на̄ма уссаннабрахмачарийа̄. татха̄ бхиккхӯпи. ан̃н̃аман̃н̃ам̣ висабха̄гаваттхубха̄вато сантхававасена упасан̇камане катипа̄хенева брахмачарийантара̄йо сийа̄, тасма̄ на упасан̇камитабба̄, гила̄напуччхана̄дивасена упасан̇камане сатока̄рина̄ бхавитаббам̣. татийачатуттха̄ни утта̄наттха̄нева.

са̄раджджасутта̄диван̣н̣ана̄ нит̣т̣хита̄.

5. пха̄сувиха̄расуттаван̣н̣ана̄

105. пан̃чаме метта̄ етасса аттхӣти меттам̣, там̣самут̣т̣ха̄нам̣ ка̄йакаммам̣ меттам̣ ка̄йакаммам̣. еса найо сесадвайепи. а̄вӣти пака̄санам̣. пака̄сабха̄во четтха йам̣ уддисса там̣ ка̄йакаммам̣ карӣйати, тасса саммукхабха̄ватоти а̄ха ‘‘саммукха̄’’ти. рахоти аппака̄сам̣. аппака̄сата̄ ча йам̣ уддисса там̣ ка̄йакаммам̣ карӣйати, тасса апаччаккхабха̄ватоти а̄ха ‘‘параммукха̄’’ти. има̄ни меттака̄йакамма̄дӣни бхиккхӯнам̣ васена а̄гата̄ни тесам̣ сет̣т̣хапарисабха̄вато, гихӣсупи лаббхантийева. бхиккхӯнан̃хи меттачиттена а̄бхисама̄ча̄рикапӯран̣ам̣ меттам̣ ка̄йакаммам̣ на̄ма. гихӣнам̣ четийаванданаттха̄йа бодхиванданаттха̄йа сан̇гханимантанаттха̄йа гаманам̣ га̄мам̣ пин̣д̣а̄йа павит̣т̣хе бхиккхӯ дисва̄ паччуггаманам̣ паттаппат̣иггахан̣ам̣ а̄санапан̃н̃а̄панам̣ анугамананти евама̄дикам̣ меттам̣ ка̄йакаммам̣ на̄ма. бхиккхӯнам̣ меттачиттена а̄ча̄рапан̃н̃аттисиккха̄панам̣ каммат̣т̣ха̄накатханам̣ дхаммадесана̄ тепит̣акампи буддхавачанам̣ меттам̣ вачӣкаммам̣ на̄ма. гихӣнам̣ ‘‘четийавандана̄йа гаччха̄ма, бодхивандана̄йа гаччха̄ма, дхаммассаванам̣ карисса̄ма, дӣпама̄лам̣ пуппхапӯджам̣ карисса̄ма, тӣн̣и сучарита̄ни сама̄да̄йа ваттисса̄ма, сала̄кабхатта̄дӣни дасса̄ма, васса̄ва̄сикам̣ дасса̄ма, аджджа сан̇гхасса чатта̄ро паччайе дасса̄ма, сан̇гхам̣ нимантетва̄ кха̄данӣйа̄дӣни сам̣видахатха, а̄сана̄ни пан̃н̃апетха, па̄нӣйам̣ упат̣т̣хапетха, сан̇гхам̣ паччуггантва̄ а̄нетха, пан̃н̃атта̄сане нисӣда̄петха, чхандаджа̄та̄ усса̄хаджа̄та̄ веййа̄ваччам̣ каротха̄’’тиа̄дикатханака̄ле меттам̣ вачӣкаммам̣ на̄ма. бхиккхӯнам̣ па̄това ут̣т̣ха̄йа сарӣраппат̣иджагганам̣ катва̄ четийан̇ган̣ам̣ гантва̄ ватта̄дӣни катва̄ вивиттасена̄сане нисӣдитва̄ ‘‘имасмим̣ виха̄ре бхиккхӯ сукхӣ хонту авера̄ абйа̄паджджа̄’’ти чинтанам̣ меттам̣ манокаммам̣ на̄ма, гихӣнам̣ ‘‘аййа̄ сукхӣ хонту авера̄ абйа̄паджджа̄’’ти чинтанам̣ меттам̣ манокаммам̣ на̄ма.

таттха навака̄нам̣ чӣваракамма̄дӣсу саха̄йабха̄вагаманам̣ саммукха̄ ка̄йакаммам̣ на̄ма, тхера̄нам̣ пана па̄дадхованасин̃чанабӣджанада̄на̄дибхедампи саббам̣ са̄мӣчикаммам̣ саммукха̄ ка̄йакаммам̣ на̄ма, убхайехипи дунниккхитта̄нам̣ да̄рубхан̣д̣а̄дӣнам̣ тесу аван̃н̃ам̣ акатва̄ аттана̄ дунниккхитта̄нам̣ вийа пат̣иса̄манам̣ параммукха̄ меттам̣ ка̄йакаммам̣ на̄ма. ‘‘деваттхеро тиссаттхеро’’ти вуттам̣ евам̣ паггайхавачанам̣ саммукха̄ меттам̣ вачӣкаммам̣ на̄ма, виха̄ре асантам̣ пана пат̣ипуччхантасса ‘‘кухим̣ амха̄кам̣ деваттхеро, кухим̣ амха̄кам̣ тиссаттхеро, када̄ ну кхо а̄гамиссатӣ’’ти евам̣ пийавачанам̣ параммукха̄ меттам̣ вачӣкаммам̣ на̄ма. метта̄синехасиниддха̄ни пана найана̄ни уммӣлетва̄ пасаннена мукхена олоканам̣ саммукха̄ меттам̣ манокаммам̣ на̄ма, ‘‘деваттхеро тиссаттхеро арого хоту абйа̄паджджо’’ти саманна̄харан̣ам̣ параммукха̄ меттам̣ манокаммам̣ на̄ма. ка̄ман̃четтха метта̄синехасиниддха̄нам̣ найана̄нам̣ уммӣланам̣, пасаннена мукхена олоканан̃ча меттам̣ ка̄йакаммамева. йасса пана читтасса васена найана̄нам̣ метта̄синехасиниддхата̄, мукхасса ча пасанната̄, там̣ сандха̄йа вуттам̣ ‘‘меттам̣ манокаммам̣ на̄ма̄’’ти. сама̄дхисам̣ваттанаппайоджана̄ни сама̄дхисам̣ваттаника̄ни.

сама̄насӣлатам̣ гатоти тесу тесу диса̄бха̄гесу вихарантехи бхиккхӯхи саддхим̣ сама̄насӣлатам̣ гато. йа̄йанти йа̄ айам̣ майхан̃чева тумха̄кан̃ча паччаккхабхӯта̄. дит̣т̣хӣти самма̄дит̣т̣хи. арийа̄ти ниддоса̄. ниййа̄тӣти ват̣т̣адуккхато ниссарати ниггаччхати. сайам̣ ниййантӣйева хи там̣саман̇гипуггалам̣ ват̣т̣адуккхато ниййа̄петӣти вуччати. йа̄ саттху анусит̣т̣хи, там̣ каротӣти таккаро, тасса, йатха̄нусит̣т̣хам̣ пат̣ипаджджакасса̄ти аттхо. дуккхаккхайа̄йа̄ти саббадуккхаккхайаттхам̣. дит̣т̣хиса̄ман̃н̃агатоти сама̄надит̣т̣хибха̄вам̣ упагато.

пха̄сувиха̄расуттаван̣н̣ана̄ нит̣т̣хита̄.

6-10. а̄нандасутта̄диван̣н̣ана̄

106-110. чхат̣т̣хе адхисӣлети нимиттаттхе бхуммам̣, сӣланимиттам̣ на упавадати на ниндатӣти аттхо. аттани камме ча ану ану пеккхати сӣлена̄ти атта̄нупеккхӣ. саттама̄дӣни утта̄наттха̄нева.

а̄нандасутта̄диван̣н̣ана̄ нит̣т̣хита̄.

пха̄сувиха̄раваггаван̣н̣ана̄ нит̣т̣хита̄.