1-4. сена̄санасутта̄диван̣н̣ана̄

11-14. дутийасса пат̣хаме на̄тидӯранти гочарат̣т̣ха̄нато ад̣д̣хага̄вутато орабха̄гата̄йа на̄тидӯрам̣. на̄чча̄саннанти паччхимена пама̄н̣ена гочарат̣т̣ха̄нато пан̃чадханусатиката̄йа на атиа̄саннам̣. та̄йа ча пана на̄тидӯрана̄чча̄санната̄йа гочарат̣т̣ха̄напат̣ипариссайа̄дирахитамаггата̄йа ча гаманасса ча а̄гаманасса ча йуттарӯпатта̄ гамана̄гаманасампаннам̣. дивасабха̄ге маха̄джанасам̣кин̣н̣ата̄бха̄вена дива̄ аппа̄кин̣н̣ам̣. абха̄ваттхо хи айам̣ аппа-саддо ‘‘аппиччхо’’тиа̄дӣсу вийа. раттийам̣ мануссасадда̄бха̄вена раттим̣ аппасаддам̣. саббада̄пи джанасаннипа̄таниггхоса̄бха̄вена аппаниггхосам̣.

аппакасирена̄ти акасирена сукхенева. сӣла̄дигун̣а̄нам̣ тхирабха̄ваппаттийа̄ тхера̄. суттагеййа̄ди баху сутам̣ етесанти бахуссута̄. тамуггахадха̄ран̣ена саммадева гарӯнам̣ сантике а̄гамитабха̄вена ча а̄гато парийаттидхаммасан̇кха̄то а̄гамо етесанти а̄гата̄гама̄. сутта̄бхидхаммасан̇кха̄тасса дхаммасса дха̄ран̣ена дхаммадхара̄. винайасса дха̄ран̣ена винайадхара̄. тесам̣ дхаммавинайа̄нам̣ ма̄тика̄йа дха̄ран̣ена ма̄тика̄дхара̄. таттха таттха дхаммапарипуччха̄йа парипуччхати. аттхапарипуччха̄йа парипан̃хати вӣмам̣сати вича̄рети. идам̣, бханте, катхам̣, имасса ко аттхоти парипуччха̄парипан̃ха̄ка̄радассанам̣. авиват̣ан̃чева па̄л̣ийа̄ аттхам̣ падесантарапа̄л̣идассанена а̄гамато виваранти. анутта̄нӣкатан̃ча йуттивибха̄ванена утта̄ним̣ каронти. кан̇кха̄т̣ха̄нийесу дхаммесу сам̣сайуппаттийа̄ хетута̄йа ган̣т̣хит̣т̣ха̄набхӯтесу па̄л̣иппадесесу йа̄тха̄вато виниччхайаппада̄нена кан̇кхам̣ пат̣ивиноденти.

еттха ча на̄тидӯрам̣ на̄чча̄саннам̣ гамана̄гаманасампаннанти екам̣ ан̇гам̣, дива̄ аппа̄кин̣н̣ам̣, раттим̣ аппасаддам̣, аппаниггхосанти екам̣, аппад̣ам̣самакасава̄та̄тапасарӣсапасампхассанти екам̣, тасмим̣ кхо пана сена̄сане вихарантасса…пе… париккха̄ра̄ти екам̣, тасмим̣ кхо пана сена̄сане тхера̄…пе… кан̇кхам̣ пат̣ивинодентӣти екам̣. евам̣ пан̃ча ан̇га̄ни ведитабба̄ни. дутийа̄дӣни утта̄наттха̄ни.

сена̄санасутта̄диван̣н̣ана̄ нит̣т̣хита̄.