9-10. упа̄лисутта̄диван̣н̣ана̄

99-100. наваме аджджхога̄хетва̄ адхиппетаматтхам̣ самбхавитум̣ са̄дхетум̣ дуккха̄ни дурабхисамбхава̄ни. ат̣т̣хакатха̄йам̣ пана таттха нива̄сойева дуккхоти дассетум̣ ‘‘самбхавитум̣ дуккха̄ни дуссаха̄нӣ’’ти вуттам̣. аран̃н̃аванапаттха̄нӣти аран̃н̃алаккхан̣аппатта̄ни ванасан̣д̣а̄ни. ванапаттхасаддо хи сан̣д̣абхӯте руккхасамӯхепи ваттатӣти аран̃н̃аггахан̣ам̣. павивеканти пака̄рато, пака̄рехи ва̄ вивечанам̣, рӯпа̄дипутхутта̄рамман̣е пака̄рато гамана̄диирийа̄патхаппака̄рехи аттано ка̄йасса вивечанам̣, гаччхатопи тит̣т̣хатопи нисаджджатопи нипаджджатопи екассева паватти. тенева хи вивечетабба̄нам̣ вивечана̄ка̄расса ча бхедато бахувидхатта̄ те екаттена гахетва̄ ‘‘павивека’’нти екавачанена вуттам̣. дуккарам̣ павивеканти ва̄ павивекам̣ каттум̣ на сукханти аттхо. екӣбха̄вети екаттабха̄ве. двайам̣двайа̄ра̄моти двиннам̣ двиннам̣ бха̄ва̄бхирато. харанти вийа̄ти сам̣харанти вийа вигха̄туппа̄данена. тена̄ха ‘‘гхасанти вийа̄’’ти. бхайасанта̄суппа̄данена кха̄дитум̣ а̄гата̄ йаккхараккхасаписа̄ча̄дайо вийа̄ти адхиппа̄йо. ӣдисасса̄ти аладдхасама̄дхино. тин̣апан̣н̣амига̄дисаддехӣти ва̄терита̄нам̣ тин̣апан̣н̣а̄дӣнам̣ мигапаккхиа̄дӣнан̃ча бхӣсанакехи бхеравехи саддехи. вивидхехи ча ан̃н̃ехи кха̄н̣уа̄дӣхи йаккха̄диа̄ка̄рехи упат̣т̣хитехи бхӣсанакехи. гхат̣ена кӣл̣а̄ гхат̣ика̄ти еке. дасамам̣ утта̄намева.

упа̄лисутта̄диван̣н̣ана̄ нит̣т̣хита̄.

упа̄ливаггаван̣н̣ана̄ нит̣т̣хита̄.

дутийапан̣н̣а̄сакам̣ нит̣т̣хитам̣.