11. ека̄дасамо париччхедо
нибба̄наниддесаван̣н̣ана̄
769. бхава̄бхавам̣ винанатоти кхуддакам̣, махантам̣ бхавам̣ сиббанато. саббӯпадхипат̣иниссагготи саббехи сан̇кха̄рӯпадхикилесӯпадхикхандхӯпадхӣхи пат̣иниссаджджанам̣. аччутирасам̣ ачутисампаттикам̣. нибба̄нам̣ пут̣т̣хена̄ти сугатена нибба̄нам̣ пут̣т̣хена са̄рипуттаттхерена. убхиннам̣ сутта̄нанти дхаммасена̄пативутта̄нам̣ двиннам̣ сутта̄нанти аттхо. кхайасса упаниссайатта̄ти кхайасса балавака̄ран̣атта̄. путхӯнам̣ дхамма̄нам̣ аппаматтаккхан̣е ра̄га̄диккхайаматтам̣ нибба̄нам̣ бхавеййа. саббе ба̄лапутхуджджана̄ самадхигатанибба̄на̄ саччхикатаниродха̄ бхавеййум̣. кин̃ча бхиййо ким̣ уттари ка̄ран̣ан̃ча аттхӣти аттхо. ра̄га̄дӣнам̣ сан̇кхататта̄ тесам̣ сан̇кхата̄нам̣ нибба̄нам̣ сан̇кхаталаккхан̣ам̣ бхавеййа. ким̣ панеттха̄ти етесу кхан̣есу ким̣ пана кхан̣е твам̣ вадеси. кхӣн̣есвева̄ти бхава̄дӣсу кхӣн̣есу ева. нируттароти ниппханнаха̄ро.
771. ассаддхоти ба̄хирасаддха̄йа вирахито. ванта̄соти ванта̄ вамита̄ а̄са̄ тан̣ха̄ йена̄ти ванта̄со.
ниссаран̣ийа̄ти ниссаран̣е нийутта̄. йадидам̣ неккхаммам̣ йам̣ идам̣ ка̄ма̄нам̣ етам̣ ниссаран̣ам̣ ниродхо, тасса кин̃чибхӯтасса сан̇кхатасса пат̣иччасамуппаннадхаммаджа̄тасса ниродхо ниссаран̣анти, евам̣ имина̄ пака̄рена вуттасса тасса ниссаран̣ана̄макасса абха̄ваппаттидосато ниссаран̣ана̄мака̄нам̣ пат̣хамаджджха̄наа̄ка̄са̄нан̃ча̄йатана̄нампи абха̄во бхавеййа. аттхи ниссаран̣анти аттхи нибба̄нам̣. уппа̄да̄дӣнанти уппа̄дат̣т̣хитибхан̇га̄нам̣. папан̃ча̄бха̄ватоти тан̣ха̄ма̄надит̣т̣хӣнам̣ абха̄вато.
772. апалокитанти адассанадхаммам̣.
774. абйа̄паджджханти нидуккхам̣. аккхаранти акхарам̣.
777. саддха̄буддхикарам̣ татха̄гатамате джинавачане саммохавиддхам̣санам̣ пан̃н̃а̄самбхавам̣ пан̃н̃а̄ка̄ран̣ам̣ сампаса̄данакарам̣. аттхабйан̃джанаса̄линанти аттхабйан̃джанаса̄равантам̣ сумадхурам̣ са̄ран̃н̃у джинаса̄санаса̄ран̃н̃ӯ вимха̄панам̣ аччхеракарам̣ имам̣ евам̣ вуттаппака̄рам̣ абхидхамма̄вата̄рам̣ йо джа̄на̄ти, со джано гамбхӣре нипун̣е нипун̣ан̃а̄н̣агочаре абхидхаммапит̣аке падам̣ нит̣т̣хам̣ уттамасаннит̣т̣ха̄нам̣ йа̄ти па̄пун̣а̄ти.
ити абхидхамма̄вата̄рат̣ӣка̄йа
нибба̄наниддесаван̣н̣ана̄ нит̣т̣хита̄.
ека̄дасамо париччхедо.