1-10. огха̄дисуттадасакам̣

889-898. ‘‘пан̃чима̄ни, бхиккхаве, уддхамбха̄гийа̄ни сам̣йоджана̄ни. катама̄ни пан̃ча? рӯпара̄го, арӯпара̄го, ма̄но, уддхаччам̣, авиджджа̄ – има̄ни кхо, бхиккхаве, пан̃чуддхамбха̄гийа̄ни сам̣йоджана̄ни. имесам̣ кхо, бхиккхаве, пан̃чаннам̣ уддхамбха̄гийа̄нам̣ сам̣йоджана̄нам̣ абхин̃н̃а̄йа парин̃н̃а̄йа париккхайа̄йа паха̄на̄йа чатта̄ро иддхипа̄да̄ бха̄ветабба̄. катаме чатта̄ро? идха, бхиккхаве, бхиккху чхандасама̄дхиппадха̄насан̇кха̄расаманна̄гатам̣ иддхипа̄дам̣ бха̄вети, вӣрийасама̄дхи…пе… читтасама̄дхи …пе… вӣмам̣са̄сама̄дхиппадха̄насан̇кха̄расаманна̄гатам̣ иддхипа̄дам̣ бха̄вети. имесам̣ кхо, бхиккхаве, пан̃чаннам̣ уддхамбха̄гийа̄нам̣ сам̣йоджана̄нам̣ абхин̃н̃а̄йа парин̃н̃а̄йа париккхайа̄йа паха̄на̄йа име чатта̄ро иддхипа̄да̄ бха̄ветабба̄’’ти.

(йатха̄ маггасам̣йуттам̣ татха̄ виттха̄ретаббам̣).

огхавагго ат̣т̣хамо.

тассудда̄нам̣ –

огхо його упа̄да̄нам̣, гантха̄ анусайена ча;

ка̄магун̣а̄ нӣваран̣а̄, кхандха̄ оруддхамбха̄гийа̄ти.

иддхипа̄дасам̣йуттам̣ саттамам̣.