8. пат̣ипаннасуттам̣

488. ‘‘пан̃чима̄ни, бхиккхаве, индрийа̄ни. катама̄ни пан̃ча? саддхиндрийам̣…пе… пан̃н̃индрийам̣ – има̄ни кхо, бхиккхаве, пан̃чиндрийа̄ни. имесам̣ кхо, бхиккхаве, пан̃чаннам̣ индрийа̄нам̣ саматта̄ парипӯратта̄ арахам̣ хоти, тато мудутарехи арахаттапхаласаччхикирийа̄йа пат̣ипанно хоти, тато мудутарехи ана̄га̄мӣ хоти, тато мудутарехи ана̄га̄мипхаласаччхикирийа̄йа пат̣ипанно хоти, тато мудутарехи сакада̄га̄мӣ хоти, тато мудутарехи сакада̄га̄мипхаласаччхикирийа̄йа пат̣ипанно хоти, тато мудутарехи сота̄панно хоти, тато мудутарехи сота̄паттипхаласаччхикирийа̄йа пат̣ипанно хоти. йасса кхо, бхиккхаве, има̄ни пан̃чиндрийа̄ни саббена саббам̣ саббатха̄ саббам̣ наттхи, тамахам̣ ‘ба̄хиро путхуджджанапаккхе т̣хито’ти вада̄мӣ’’ти. ат̣т̣хамам̣.