5. акусалара̄сисуттам̣

371. са̄ваттхинида̄нам̣. татра кхо бхагава̄ етадавоча – ‘‘‘акусалара̄сӣ’ти, бхиккхаве, вадама̄но пан̃ча нӣваран̣е самма̄ вадама̄но вадеййа. кевало ха̄йам̣, бхиккхаве, акусалара̄си, йадидам̣ – пан̃ча нӣваран̣а̄. катаме пан̃ча? ка̄маччханданӣваран̣ам̣, бйа̄па̄данӣваран̣ам̣, тхинамиддханӣваран̣ам̣, уддхаччакуккуччанӣваран̣ам̣, вичикиччха̄нӣваран̣ам̣. ‘акусалара̄сӣ’ти, бхиккхаве, вадама̄но име пан̃ча нӣваран̣е самма̄ вадама̄но вадеййа. кевало ха̄йам̣, бхиккхаве, акусалара̄си, йадидам̣ – пан̃ча нӣваран̣а̄.

‘‘‘кусалара̄сӣ’ти, бхиккхаве, вадама̄но чатта̄ро сатипат̣т̣ха̄не самма̄ вадама̄но вадеййа. кевало ха̄йам̣, бхиккхаве, кусалара̄си, йадидам̣ – чатта̄ро сатипат̣т̣ха̄на̄. катаме чатта̄ро? идха, бхиккхаве, бхиккху ка̄йе ка̄йа̄нупассӣ вихарати а̄та̄пӣ сампаджа̄но сатима̄, винеййа локе абхиджджха̄доманассам̣; ведана̄су…пе… читте…пе… дхаммесу дхамма̄нупассӣ вихарати а̄та̄пӣ сампаджа̄но сатима̄, винеййа локе абхиджджха̄доманассам̣. ‘кусалара̄сӣ’ти, бхиккхаве, вадама̄но име чатта̄ро сатипат̣т̣ха̄не самма̄ вадама̄но вадеййа. кевало ха̄йам̣, бхиккхаве, кусалара̄си, йадидам̣ – чатта̄ро сатипат̣т̣ха̄на̄’’ти. пан̃чамам̣.