3. сӣласуттам̣

184. ‘‘йе те, бхиккхаве, бхиккхӯ сӣласампанна̄ сама̄дхисампанна̄ н̃а̄н̣асампанна̄ вимуттисампанна̄ вимуттин̃а̄н̣адассанасампанна̄, дассанампа̄хам̣, бхиккхаве, тесам̣ бхиккхӯнам̣ бахука̄рам̣ [бахӯпака̄рам̣ (сйа̄.)] вада̄ми; саванампа̄хам̣, бхиккхаве, тесам̣ бхиккхӯнам̣ бахука̄рам̣ вада̄ми; упасан̇каманампа̄хам̣, бхиккхаве, тесам̣ бхиккхӯнам̣ бахука̄рам̣ вада̄ми; пайирупа̄санампа̄хам̣, бхиккхаве, тесам̣ бхиккхӯнам̣ бахука̄рам̣ вада̄ми; ануссатимпа̄хам̣, бхиккхаве, тесам̣ бхиккхӯнам̣ бахука̄рам̣ вада̄ми; анупаббаджджампа̄хам̣, бхиккхаве, тесам̣ бхиккхӯнам̣ бахука̄рам̣ вада̄ми. там̣ кисса хету? татха̄рӯпа̄нам̣, бхиккхаве, бхиккхӯнам̣ дхаммам̣ сутва̄ двайена вӯпака̄сена вӯпакат̣т̣хо [двайена вӯпакат̣т̣хо (сӣ. сйа̄.)] вихарати – ка̄йавӯпака̄сена ча читтавӯпака̄сена ча. со татха̄ вӯпакат̣т̣хо вихаранто там̣ дхаммам̣ ануссарати анувитаккети.

‘‘йасмим̣ самайе, бхиккхаве, бхиккху татха̄ вӯпакат̣т̣хо вихаранто там̣ дхаммам̣ ануссарати анувитаккети, сатисамбоджджхан̇го тасмим̣ самайе бхиккхуно а̄раддхо хоти; сатисамбоджджхан̇гам̣ тасмим̣ самайе бхиккху бха̄вети; сатисамбоджджхан̇го тасмим̣ самайе бхиккхуно бха̄вана̄па̄рипӯрим̣ гаччхати. со татха̄ сато вихаранто там̣ дхаммам̣ пан̃н̃а̄йа павичинати павичарати паривӣмам̣сама̄паджджати.

‘‘йасмим̣ самайе, бхиккхаве, бхиккху татха̄ сато вихаранто там̣ дхаммам̣ пан̃н̃а̄йа павичинати павичарати паривӣмам̣сама̄паджджати, дхаммавичайасамбоджджхан̇го тасмим̣ самайе бхиккхуно а̄раддхо хоти; дхаммавичайасамбоджджхан̇гам̣ тасмим̣ самайе бхиккху бха̄вети; дхаммавичайасамбоджджхан̇го тасмим̣ самайе бхиккхуно бха̄вана̄па̄рипӯрим̣ гаччхати. тасса там̣ дхаммам̣ пан̃н̃а̄йа павичинато павичарато паривӣмам̣сама̄паджджато а̄раддхам̣ хоти вӣрийам̣ асаллӣнам̣.

‘‘йасмим̣ самайе, бхиккхаве, бхиккхуно там̣ дхаммам̣ пан̃н̃а̄йа павичинато павичарато паривӣмам̣сама̄паджджато а̄раддхам̣ хоти вӣрийам̣ асаллӣнам̣, вӣрийасамбоджджхан̇го тасмим̣ самайе бхиккхуно а̄раддхо хоти; вӣрийасамбоджджхан̇гам̣ тасмим̣ самайе бхиккху бха̄вети; вӣрийасамбоджджхан̇го тасмим̣ самайе бхиккхуно бха̄вана̄па̄рипӯрим̣ гаччхати. а̄раддхавӣрийасса уппаджджати пӣти нира̄миса̄.

‘‘йасмим̣ самайе, бхиккхаве, бхиккхуно а̄раддхавӣрийасса уппаджджати пӣти нира̄миса̄, пӣтисамбоджджхан̇го тасмим̣ самайе бхиккхуно а̄раддхо хоти; пӣтисамбоджджхан̇гам̣ тасмим̣ самайе бхиккху бха̄вети; пӣтисамбоджджхан̇го тасмим̣ самайе бхиккхуно бха̄вана̄па̄рипӯрим̣ гаччхати. пӣтиманасса ка̄йопи пассамбхати, читтампи пассамбхати.

‘‘йасмим̣ самайе, бхиккхаве, бхиккхуно пӣтиманасса ка̄йопи пассамбхати читтампи пассамбхати, пассаддхисамбоджджхан̇го тасмим̣ самайе бхиккхуно а̄раддхо хоти; пассаддхисамбоджджхан̇гам̣ тасмим̣ самайе бхиккху бха̄вети; пассаддхисамбоджджхан̇го тасмим̣ самайе бхиккхуно бха̄вана̄па̄рипӯрим̣ гаччхати. пассаддхака̄йасса сукхино читтам̣ сама̄дхийати.

‘‘йасмим̣ самайе, бхиккхаве, бхиккхуно пассаддхака̄йасса сукхино читтам̣ сама̄дхийати, сама̄дхисамбоджджхан̇го тасмим̣ самайе бхиккхуно а̄раддхо хоти; сама̄дхисамбоджджхан̇гам̣ тасмим̣ самайе бхиккху бха̄вети; сама̄дхисамбоджджхан̇го тасмим̣ самайе бхиккхуно бха̄вана̄па̄рипӯрим̣ гаччхати. со татха̄сама̄хитам̣ читтам̣ са̄дхукам̣ аджджхупеккхита̄ хоти.

‘‘йасмим̣ самайе, бхиккхаве, бхиккху татха̄сама̄хитам̣ читтам̣ са̄дхукам̣ аджджхупеккхита̄ хоти, упеккха̄самбоджджхан̇го тасмим̣ самайе бхиккхуно а̄раддхо хоти; упеккха̄самбоджджхан̇гам̣ тасмим̣ самайе бхиккху бха̄вети; упеккха̄самбоджджхан̇го тасмим̣ самайе бхиккхуно бха̄вана̄па̄рипӯрим̣ гаччхати.

‘‘евам̣ бха̄витесу кхо, бхиккхаве, саттасу самбоджджхан̇гесу евам̣ бахулӣкатесу сатта пхала̄ сатта̄нисам̣са̄ па̄т̣икан̇кха̄. катаме сатта пхала̄ сатта̄нисам̣са̄? дит̣т̣хева дхамме пат̣икачча ан̃н̃ам̣ а̄ра̄дхети. но че дит̣т̣хева дхамме пат̣икачча ан̃н̃ам̣ а̄ра̄дхети, атха маран̣ака̄ле ан̃н̃ам̣ а̄ра̄дхети. но че дит̣т̣хева дхамме пат̣икачча ан̃н̃ам̣ а̄ра̄дхети, но че маран̣ака̄ле ан̃н̃ам̣ а̄ра̄дхети, атха пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ антара̄паринибба̄йӣ хоти. но че дит̣т̣хева дхамме пат̣икачча ан̃н̃ам̣ а̄ра̄дхети, но че маран̣ака̄ле ан̃н̃ам̣ а̄ра̄дхети, но че пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ антара̄паринибба̄йӣ хоти, атха пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ упахаччапаринибба̄йӣ хоти. но че дит̣т̣хева дхамме пат̣икачча ан̃н̃ам̣ а̄ра̄дхети, но че маран̣ака̄ле ан̃н̃ам̣ а̄ра̄дхети, но че пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ антара̄паринибба̄йӣ хоти, но че пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ упахаччапаринибба̄йӣ хоти, атха пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ асан̇кха̄рапаринибба̄йӣ хоти. но че дит̣т̣хева дхамме пат̣икачча ан̃н̃ам̣ а̄ра̄дхети, но че маран̣ака̄ле ан̃н̃ам̣ а̄ра̄дхети, но че пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ антара̄паринибба̄йӣ хоти, но че пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ упахаччапаринибба̄йӣ хоти, но че пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ асан̇кха̄рапаринибба̄йӣ хоти, атха пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ сасан̇кха̄рапаринибба̄йӣ хоти. но че дит̣т̣хева дхамме пат̣икачча ан̃н̃ам̣ а̄ра̄дхети, но че маран̣ака̄ле ан̃н̃ам̣ а̄ра̄дхети, но че пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ антара̄паринибба̄йӣ хоти, но че пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ упахаччапаринибба̄йӣ хоти, но че пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ асан̇кха̄рапаринибба̄йӣ хоти, но че пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ сасан̇кха̄рапаринибба̄йӣ хоти, атха пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ уддхам̣сото хоти аканит̣т̣хага̄мӣ. евам̣ бха̄витесу кхо, бхиккхаве, саттасу боджджхан̇гесу евам̣ бахулӣкатесу име сатта пхала̄ сатта̄нисам̣са̄ па̄т̣икан̇кха̄’’ти. татийам̣.